《台灣個表妹嚟咗我屋企住》【完】: (九十二)貪玩

星期六，帶咗小南去溜冰。

一開始佢着住對溜冰鞋，只係扶住場邊圍住嚟行，睇住佢完全唔識溜冰都夠膽行出去場嘅中間，喺溜冰場上步履蹣跚，真係令人佩服佢嘅固執，亦不禁笑佢呢種傻氣。

小南永遠都唔肯放棄⋯⋯

見佢不斷地跌跌碰碰咁嘅樣，我就拖住佢一齊溜。

玩咗一日，又係時候返屋企等小南煮飯畀我食。





屈指一算已經有四日冇食過小南煮嘅食物，所以真係好懷念嗰種味道，習慣咗食佢煮嘅嘢，有啲嘢習慣咗就冇咁易改。

企喺廚房門口，見到流住汗大戰緊嘅小南，望住佢專心炒菜嘅模樣，確實係特別迷人⋯⋯

無聊起嚟，我就貪玩咁熄咗盞廚房燈。

「喂呀！做咩嘢呀你！」怕黑嘅小南立即揸住支鑊鏟擰轉身指向我。「信唔信我今晚加料，多碟炒人肉呀！」

「信呀⋯⋯」我乖乖咁開返燈。





「哼⋯⋯」小南繼續專心炒菜。

我行上前攬住佢，然後話：「不如我幫你啦。」

「乜你識煮咩？我仲記得你上次煮過啲嘢㗎喎⋯⋯」小南重提舊事，刺中我嘅弱點。

「同埋⋯⋯咪攬住我啦，我出哂汗㗎，仲有你唔驚畀姨丈睇到咩？」小南細細咁講。

「驚呀⋯⋯咁我出去等你啦。」我摸一摸小南個頭，然後走返出去。





「咁就乖啦。」

但喺我離開廚房嘅同時，又順手熄多次燈。

「衰人表哥！！」小南用一聲咆吼，表示對我暴行嘅不滿。

小南呢個大廚請完病假返嚟真係好，我好掛住佢煮嘅嘢食。

食完晚飯之後，突然間我好急屎，於是就衝入廁所運功排毒⋯⋯

但運運下功，無啦啦眼前一黑，中斷咗我嘅運功，原來係頭上盞燈畀人熄咗，唔使審實係小南啦⋯⋯

而喺漆黑之中，可能係環境導致我能夠更加專心，所以我依然成功排毒。

出返去廳，小南扮到若無其事咁坐喺梳化上睇電視。





於是我為咗試探佢，就向阿爸落手：「阿爸，頭先係咪有人熄我燈呀？」

阿爸眨一眨眼，再答：「冇呀⋯⋯係咪盞燈壞壞地咋？」

「可能係啩。」

坐喺隔離嘅小南就捂住嘴偷偷咁笑。

睇嚟小南嘅老爺政策有效啦，阿爸竟然會包庇小南，同佢狼狽為奸。

再咁落去，我往後喺呢頭家仲有立足嘅餘地嗎？

你哋好嘢！我忍！





到咗臨瞓前，我就去沖返個靚涼，點鬼知沖沖下⋯⋯

啲水變凍咗嘅？

屌那星！又嚟？

今次仲要用水攻⋯⋯無理由大搖大擺咁出去開返個熱水爐嘅，搞到我要縮埋一舊嚟沖涼。

估唔到玩一次小南，佢會咁狼死雙倍奉還。

我都要報仇呀！

之不過沖完出返去客廳，個仇家已經逃走咗，但係君子報仇，十年不晚！睇住嚟啦小南你個衰妹⋯⋯

吹乾個頭，我就拎本日記出嚟寫低今日同小南發生嘅事情，寫寫下，原來我同小南嘅故事唔經唔覺已經寫咗好多頁紙。





數數日子，剩返得二十一日⋯⋯

其實我從來都未認真問過小南，到底二十一日之後佢會留返低同我一齊，定係會離開我返去台灣。

因為我好驚個答案同我預期有出入，所以我唔敢去問佢，但一直拖嚟去總有一日⋯⋯

算啦，過得一日得一日，見步行步啦。

寫完日記，然後我就瞓落張床上面篤下手機。

原本諗住睇下啲網絡文學，點知發現軒少send咗個訊息嚟喎⋯⋯

「明天食飯，我、阿yo、阿榮同埋你同你條女呀！ok？」





聽日？反正聽日都冇嘢做，帶下小南見下我班朋友都好喎。

跟住我就簡單咁回覆佢⋯⋯

「ok。」

覆咗軒少之後，今日被玩弄完嘅我就倒頭大睡。