《台灣個表妹嚟咗我屋企住》【完】: (四十七)日本姓氏

咁早起身，好無聊⋯⋯

我又唔好意思叫醒表妹，只好返房嘗試用電腦解答我頭先嘅一個疑問。

一個似曾相識嘅姓氏，我好似冇幾耐之前都見過，但諗極都諗唔起。

我用部電腦上網搜尋''田川''呢兩隻字，希望搵到些少線索，但係搜尋結果依然畀唔到啲咩頭緒我。

呢個好明顯係日本嘅一個姓氏，而顯示嘅結果，的確有啲姓田川嘅日本名人，城市嚟講就有田川市⋯⋯但係好似同小南姓名之謎完全冇關係喎！



我一直搵一直搵，都解決唔到呢個難題。

正常嚟講，表妹嘅全名應該係程小南，點解會殺出一個日本名呢？而天生成日FF嘅我，就開始猜測下因由⋯⋯

莫非表妹有中二病？當咗自己係日本人，定還是佢畀個日本女鬼上咗身呢？諗到呢度，我不禁有少少心寒⋯⋯

「星星表哥！」

「嘩！」我突然嚇咗一跳。



喺本能反應下我望向聲音嘅來源，由於頭先返房時冇閂好道門，見到門嘅罅隙有半個陰暗嘅人臉⋯⋯

有一隻眼睛死死咁盯住我，然後陰暗人臉嘅嘴角微微向上揚，漸漸露出半個陰森嘅笑容。

「嘻嘻⋯嘻嘻⋯你做緊咩呀⋯」

喺半秒間嘅思考當中，透過對我嘅稱謂同埋呢把熟悉的聲線，令我可以肯定喺門外嘅係小南。

唔通佢真係一隻女鬼，想嚟搵替身？而咁啱畀我識穿到佢嘅身份，佢要嚟殺我⋯⋯



唔好呀！我唔想死呀！

只見小南緩緩地打開房門，身後似乎收埋咗一啲野⋯⋯

驚青到死嘅我，就霎時間嗌咗出嚟。

「唔好呀！！！」