《台灣個表妹嚟咗我屋企住》【完】: (三十八)女教師

夢遊中嘅表妹喺我眼前，漫無目的咁喺間屋入面行嚟行去。

唔知仲以為佢鬼上身。

算啦，都係去叫返醒佢先⋯⋯

我行過拍一拍小南嘅膊頭：「喂喂！」

啱啱仲係喺夢中嘅小南就頓時醒過嚟：「咦⋯」





「喂，做咩小南你喺度嘅？」我明知故問。

只見小南一面驚訝，終於都意識到自己又再次夢遊。

「冇嘢呀⋯等你返嚟囉。」

「係咩？咁你一定等咗好耐啦，頭先仲見你行嚟行去唔知做咩。」

「頭先唔覺你返嚟呀⋯⋯唔好講住先啦，等你返嚟畀嘢我食呀。」小南試圖打圓場咁話。





「吓⋯嘢食？你冇食飯咩？」我問。

「今晚嗰餐唔夠飽呀！」小南顯得有啲怨氣。

「但係依家咁夜，邊有嘢食呀？」

「唔理你呀！總之我想食嘢。」小南好任性咁話。

「吓⋯⋯」





本來仲以為佢想避開頭先佢夢遊嘅事先話肚餓，但如今睇嚟係真㗎喎。

咁夜⋯仲諗住返嚟瞓覺，但表妹成日都煮飯畀我食，咁我都冇理由唔理佢啩？

如果係咁不如帶佢落街食宵夜啦。

於是我話：「咁⋯我哋去食糖水啦。」

「好呀！好呀！快啲去啦。」

「但係你換咗件衫先啦，唔通你想扮做hello kitty出街咩？」同時我都要安置好女教師先。

「哈哈⋯⋯咁又係喎。」小南都知道咁樣出街有啲古怪。

「咁快啲去換啦。」說罷，我就將女教師藏喺背後，慢慢行入自己間房。





殊不知竟然畀小南察覺得到，佢迅速就搶去咗我手上嘅女教師。

「咦，咩嚟㗎？」小南好專心咁睇住個封面。「女教師之日常？」

「唔⋯咪又係碟一隻，快啲畀返我啦小南。」我心知不妙想快啲拎返，因為絕對唔可以畀小南知道內容係咩嚟。

「唔畀！你話畀我知係咩嚟先啦。」女仔嘅好奇心真係麻煩。

「其實呢⋯⋯依隻係教英文嘅碟嚟啫，你表哥我要讀書㗎嘛。」咁樣講希望可以呃到小南。

「但係封面寫住日文㗎喎。」竟然逃唔過小南嘅法眼。

「咁係因為⋯」點都要兜落去㗎喇，牽強啲都冇所謂。「用日文嚟教英文呀！係唔係冇聽過呢？哈哈⋯」





小南先係用一種好懷疑嘅眼神望住我，然後話：「真嘅？」

「梗係真㗎喇，你睇下個老師幾靚？讀起嚟都精神啲啦。」我指個封面話。

好在老師着得夠保守，否則我真係點兜兜唔到。

「好啦，信你喇。」估唔到我咁講佢都信。「嗱，畀返你。」

我即刻接過嚟，然後話：「咁就啱啦，快啲去換衫啦。」

「但你搵日要借畀我睇下喎，我都想學下英文。」聽到呢句說話，我嘅額頭都忍唔住標冷汗。

睇嚟小南真係唔知隻碟嘅內容⋯⋯咁我就真係要收得好啲。

「嗯嗯⋯等我睇完先啦。」





跟住我就返入房將隻碟收埋喺一個好隱蔽嘅地方，之後就同表妹落街食糖水。

原來金屋藏嬌都係一件令人心驚膽顫嘅事情。