浮事的，第二個的士佬既故事。: 原來如此

握手過後，梓風終於按捺不住，問道：「咁....大佬，你地大費周章咁捉我返黎，為咩呢？」

「我都唔記得左自我介紹添，我叫占史，比面既咪叫聲史哥囉。」男人說

「好。史哥，請問咩事呢？」梓風追問道。

「拿，成件事係咁既。你都係的士佬黎丫，呢期好紅果個「車神風」，你有無聽過？」史哥問。

「有～比人指明道姓CALL車果個丫嘛？不過我唔識佢架喎，我相信我地係唔同車隊既。」梓風道。





「唔係唔係。我唔洗你識佢，我要你今晚跟我去一個地方，之後同佢賽車，賽贏佢就搞掂啦。」史哥說：「簡單？」

「簡單？人地有名你叫車神，你叫我贏就贏？」梓風道。

「無錯，佢今晚係輸硬比你既，你放心啦。」史哥說。

「我當佢真係會輸比我丫，咁點解你要搵我？」梓風不解地問：「我幫你，我又有咩好處？」

「無解既，咁岩TIFFANY係我既債仔，咁岩我又搵緊一個手車勁既的士佬，咁岩佢又話佢識一個，話介紹你黎幫手，叫我清左佢條數去。咁我地呢D食大茶飯既，幾廿萬當交個朋友，有咩所謂呢？」史哥說





「點解要搵的士佬？」風問。

「喂～你今晚既身份係綠的車神黎架！！紅綠車神大對決，你知唔知幾受歡迎呀？我呢D做莊既人好均真既，雖然你唔係揸綠的，但總算你都係個的士佬丫～我係一個仆街，但我係一個有原則既仆街。」史哥道。

「至於好處方面，本來你幫完我之後我都諗住比廿萬你洗下既，不過我班靚仔D醫藥費又咁貴......」史哥未說完，梓風已把他打斷。

「我唔要錢。總之完事後你放我走，好好咁比我過返D正常既生活就得啦。」梓風說。

「放就實放你既，你放心。你知道台灣人有句話，「做妓女的是欠錢，不是欠幹！」。我留住你做咩姐？不過，可唔可以過返正常既生活就睇你自己造化啦。」史哥饒有意味地說道。