單身女子隨筆: 一杯酒的時間

在媽媽家中吃飯的時候見到小初問我係唔係屋企，我無用腦就覆：又摟屌？一直以黎我同小初傾計都好少用腦，用第一感覺去覆，佢話唔係，只係想黎我度飲酒，我感覺佢今次比較平靜，無上次臨去見小依咁跳左掣，如果好似朋友咁飲酒傾計，我覺得好好，畢竟我無可以一齊飲酒傾計既朋友。

好耐無見小初，應該係四月到依家，見到佢第一個感覺係佢好似好攰，同埋無之前咁佻皮。佢次次黎親都好突然，根本黎唔切執屋，所以佢不時會見到我屋企最亂既一面，不過佢唔係無憾，唔洗咁好招呼，好似兄弟咁入到屋自己撥開啲野搵位坐。佢帶左支白酒黎，果酸好重，我唔喜歡，調左杯紫玉蘭LONG ISLAND，其實只係VODKA加WHISKY加啲減啲溝埋加可樂而已，份量雖然隨意但唔敢重手，第一次試溝，飲左一杯醉足十二個鐘。

傾計都係講下工作、生活、同引版是非，我同小初都很喜歡戒指男，希望師姐能在情路上修成正果，無幾多個男人可以做到纏而不擾。一整晚不著邊際既話題，小初居然知道咩係漢服，一般同人講漢服只會覺得我傻既先留意呢啲，而我地可以為一個朝代既男裝展開討論。

不其然想起我同初戀曾經諗過結婚，我很想有一套唐朝既婚服，當時我連紙樣同裁縫都物色好，又同一位我很欣賞的飾物設計師套交情問佢可唔可以幫我整結婚介指，當時初戀問我點解搵呢個人整戒指，佢唔會用鑽石唔會用純金，只會用銅、銀、木做材料。我說：呢位先生由初出道到現在，我識左佢十年，十年間他的手工除了更精進之外，身旁的女友一路支持到成為妻子，要知道藝術之路困難重重，他們是一對互相欣賞和尊重既恩愛夫妻，結婚戒指不在於價值在於意義，可以找到一位婚姻幸福既人造一對結婚戒指俾我，比起鑽石還要珍貴。

當時沒有同小初講，只是心思轉了一回，笑了笑。



半杯酒落肚醉醉地既小初開始扭計話要按摩，我笑佢依家酒量差左咁多，半杯已經紅都臉哂，我都未開始。佢唔理我，自己除上衣趴係床度指指自己，而我騎上去按揉有點繃緊的肌肉，整個氛圍很自然，不帶情慾。小初擔心我會唔會唔開心又收埋唔講。我很喜歡這種比朋友親密一點的關係，聊天飲酒，醉左一齊瞓覺，是交換心靈，是互相陪伴，那麼純粹，那麼愉快。