【大學故】《上到大學，原來真係會咩都唔同曬》: 二十八
(二十八)
*雪琪視覺
其實我唔係無諗過嘉浩會出軌，畢竟我同佢一齊之前，佢同陳俊賢都係學校出曬名既playboy。
雖然係咁，但憑住籃球隊副隊長同跆拳道學會會長呢個名銜，加上本身個樣唔係差同溫柔既嘉浩一樣得到好多女同學既青睞。
當初無諗過嘉浩會對我認真，所以即使我中意佢都唔敢太放個心係佢到。
直到同佢一齊半年後，佢同我坦白曬以前同佢一齊過既女，仲係我面前del曬所有女同學既電話。
初期我都半信半疑，但見到之後佢隨左我同小熙以外，都冇再同其他女仔傾計聯絡，我先慢慢全心全意咁愛上嘉浩。
我愛你更多 相對在刺傷我
愛你也許是場最悲慘戰火
以前就係因為我太自卑，成日check住男朋友，逼得佢太緊先會令我ex反感而離開我。
於是，我同嘉浩一齊後從來都冇check過佢電話同電腦，百分百信任佢，反而令嘉浩自動同我報告佢行蹤同呷醋。
但估唔到，我對你既信任竟然變成對你既放任，到頭黎傷害既都係我自己。
「雪琪，你乖喇，食少少野先好無？」已經陪我坐左成晚既小熙拎起岩岩係canteen呀賢買黎既粥，好溫柔咁對住坐係床上邊發呆既我講。
的確，我已經一日一夜冇食過野，但點解我完全冇胃口。
「我... 唔想食...」我無望佢，好輕聲咁答。
「乖喇，食少少喇！而家十點幾喇，你已經超過廿四個鐘冇食野喇！」小熙既聲音帶著憤怒，但更多既係擔憂。
「原... 原來已經十點幾喇？你返去喇，聽日你唔係反早咩？」我一下子清醒咁望一望鐘，原來已經咁夜。
「唔走啊！我今晚係度同你訓，大不了咪走堂！」小熙好倔強咁望實我，繼而又拉我落床逼我食粥。「你唔食既話，我就陪你一齊唔食！」
小熙出動到苦肉計，同李穎熙咁熟既我當然知道當年佢為左減肥唔食野，結果搞到胃病既佢如果唔定時食野就會好易胃痛。
「唉，怕左你」我抬頭望住倔強堅持既小熙，不自覺地嘆左口氣。「我食喇，咁好未？」
聽到我既回應後，小熙自然露出笑顏，好興奮咁望住我一啖一啖咁食曬成碗粥。
Alice今晚應該會返屋企訓，所以而家房入邊得我同小熙兩個，對話間都唔需要就住就住。
「雪琪啊，你有冇睇到紀念日？」小熙呢刻訓左係我隔離，另左過黎望住我講。
「... 有啊。同嘉浩一齊睇...」一諗起嘉浩，我個心又開始痛。
「方力申係同stephy結婚之前，都有同過第二個女仔一齊，但佢好清楚自己最愛既依然係stephy... 所以點都好，佢都唔會離開stephy。」小熙清澈乾淨既雙眼望實我，閃過一絲悲傷。
「... stephy都知道架，所以最後都忍唔到咪分開囉... 正如我同嘉浩一樣，佢地十年都捱唔過，我地呢三年幾又算得係咩...」我又回憶起ceci一絲不掛咁係嘉浩身下既畫面。
「但最後唔係一齊返咩？仲一齊返係因為仲愛啊...！」小熙攬住我，我feel到佢既眼淚一滴滴咁流落黎。
「雪琪... 我知你一時三刻接受唔到呢件事，嘉浩個陣飲左酒... 我諗或者佢只係當左ceci係你姐... 感情係冇得解架喇... 可唔可以比多最後一次機會嘉浩同自己，我唔想你唔再相信人。」
是孽債很多 就似個鎖 隨行差踏錯
便困死當初那快樂
仲忍係因為仲愛...
嘉浩，我地到底可唔可以真係當咩事都冇發生過，從頭黎多次？
*小熙視覺
其實我咁講都係唔想雪琪唔開心。我真係好憎嘉浩。
同佢fd左咁耐，個傻婆心裡面點諗我又點會唔知啊。
係，佢口口聲聲好決絕咁話唔想再見到嘉浩。但其實佢仲係好愛嘉浩。
感情呢樣野，無話講時間架。stephy同方力申一齊左十年去到談婚論嫁既地步都可以分手，但都唔代表一齊得兩三年既情侶注定要分手架！
如果咁就代表無真愛，時間就係代表一切既話，咁呢個世界就唔需要結婚呢個承諾。更何況，結左婚都可以離婚。
愛情由頭到尾都係無得計架啦。
雪琪，我都唔知叫你俾個機會嘉浩岩唔岩。但我肯定既係，為左一個人而唔再相信任何人其實係好辛苦既事，何必咁樣難為自己？
一次機會，可能佢真係肯知錯以後更加珍惜你呢？
「點啊bb，雪琪佢無野啊嘛」我放學之後呀賢就黎接我，而嘉浩都因為無心情番學而係佢隔離同佢一齊出黎揾我。
「佢心情平復番好多啦，但都係唔好刺激佢住，俾啲時間佢啦」我望住嘉浩個個呆滯既眼神，我從來未見過一直都係陽光男孩既佢有咁頹廢既一日。
「唉，點解到你地兩個搞壇咁既野」呀賢都忍唔住嘆左一口氣。
「喂，咩『你地』啊，唔好加個地字好喎，依家係藍嘉浩偷食咋！」我聽到呀賢個句話就好似責怪埋雪琪咁，就好自然扯火。
「咁我都係講事實咋嘛，佢都唔肯聽嘉浩解釋一味叫佢走」呀賢反擊
「偷食解咩釋啊，掩飾咋？！」
「喂妳唔好咁蠻不講理好喎！」呀賢皺住眉頭咁講
「我蠻不講理？唔好話你淨係幫住你兄弟！」一諗到雪琪琴日個樣，同埋呀賢依家係咁偏幫嘉浩，我真係恨不得兜巴車佢兩個一巴。
「嘉浩係有錯但個日佢係飲醉左先咁咋，仲有個條ceci明知嘉浩有女朋友仲乘人之危，妳唔去發佢老脾？」
陳俊賢，你知唔知你講緊乜啊！
「就算ceci幾姣幾賤都好，藍嘉浩都唔應該受到引誘啦！你有女朋友架！」呢一刻我已經嬲到忍唔住係咁推開呀賢同埋嘉浩「咁點解你要俾ceci入屋啊？！」
「妳癲完未呀？嘉浩有幾愛雪琪你唔係唔知啊？」呀賢捉實我
「我點會知啊？！依家又唔係我同佢拍拖！我淨係知佢依家傷到雪琪好深咋！」我嬲到忍唔住喊左出黎，然後我另轉面同嘉浩講「枉我琴日仲幫你講盡好說話叫雪琪諗清楚俾多次機會你，我真係好撚白痴好撚蠢呀！」
「嘉浩有幾後悔你知唔知啊？」呀賢忍住道氣話「因為唔想ceci再煩住曬，嘉浩岩岩走黎學校係為左quit U啊！你估佢咁得閒陪我黎接妳放學啊？」
「你以為咁樣就代表好撚有誠意好撚偉大啊？」
「妳乜事啊？要發脾氣番去先發啊！」呀賢好惡咁同我講
陳俊賢，你為左你好兄弟居然咁惡對我，你係咪唔記得你講過啲咩啊？
「呀賢，夠啦，你地唔好嘈啦」嘉浩係隔離好頹咁講「我自己做錯過既，就要負責... 就算雪琪原唔原諒我都好，我呢一世，都淨係會愛佢一個...」
「如果你唔係真心既，你唔好再搞雪琪啊！」
「我知錯啦，我真係好後悔... 直到失去個一刻，我先知道我有幾愛佢。」
「咁耐以黎，雪琪好少發我脾氣。正正因為我有耐性，而雪琪又夠率直既關係，我地既相處一直都好好」嘉浩呆望住地下好輕聲咁講「如果佢肯俾多次機會我地重頭黎過，我一定唔會再俾佢有機會流一滴眼淚。」
我望住嘉浩流露出識佢咁耐都未見過既神情，突然好想喊。
若果有多次機會，結局係咪可以改寫？