【大學故】《上到大學，原來真係會咩都唔同曬》: 十六
(十六)
*雪琪視覺
「點啊氹番小熙未啊？」我完成埋手上個件diy禮物既最後一個步驟，隨即拎起電話wtsapp呀賢。
「bb，你睇完小熙表演未啊」隔左無耐我就收到wtsapp，但並唔係呀賢既訊息，而係嘉浩。
係喎，嘉浩未知呢單野架喎。
「你依家係邊啊，我想見你啊」我快速輸入
或者嘉浩可以幫到陳俊賢。
「我就黎到你學校啦(豬)」嘉浩唔洗幾秒就覆我
藍嘉浩呢期真係好奇怪，點解無啦啦對我好左咁多。佢已經連續幾日過黎接我放學。
大男人既佢平時好少過黎接我。我地搵對方既次數多數都係我過去搵佢兩三次佢就會過黎搵我一次。
雖然佢好溫柔好細心成日都會做出暖男舉動，但佢無啦啦乜都就曬我我覺得好唔自在咁。
可能... 係我多心掛。
我換好曬衫之後拎埋呀賢份禮物就落左去搵嘉浩。到宿舍門口，離遠已經見到嘉浩等緊我。
「bb！」我加快腳步行去佢個邊。
佢一見到我，就即刻露出佢個好charm既笑容，並且拉住我隻手然後攬住左我。
「我好掛住妳」佢係我耳仔邊細細聲咁講
「我都掛住你」我好敷衍咁答左佢之後，即刻同佢講小熙件事。
嘉浩無出聲，淨係好靜咁聽我講。
「之後小熙就跑左出去，呀賢搵極都搵唔到佢，跟住我係咁打俾佢都唔聽我電話，過左無耐呀賢番左黎，我就叫佢去小熙屋企搵佢啦... 但係佢依家都未覆我啊」我一臉擔憂咁講「都唔知小熙會唔會有咩事添加，個傻婆成日有咩都收收埋埋唔同人講。」
「一係我試下打俾佢？」嘉浩一路講，一路解緊電話屏幕
「嗯」
李穎熙我唔該你快啲聽電話啦。
「喂？小熙？」
我回過神望住嘉浩「小熙聽左？係咪啊？」我捉實嘉浩手臂。
嘉浩示意我唔好出聲。
「... 好啊，你係邊啊？... 咁我依家過黎啊」講完呢句嘉浩就收左線
「點啊？」
「小熙依家係屋企樓下個海旁，佢話想見我...」嘉浩話
「咁我地快啲去啦！」我一野拉住佢諗住衝出去截的士
「吱吱～」呢個時候我電話響
「陳俊賢？喂你仲未氹好小熙啊？」我好焦急咁講
「... 我地... 分左手」電話另一邊既呀賢緩緩咁講。
*小熙視覺
陳俊賢，點解你要咁做，到底我算係啲乜。
一個我被撇底卻又很不慣
我坐左係度已經唔知幾耐，我淨係知我啲眼淚由始至終都無停過。
三年黎，呀賢未試過好似岩岩咁對我。
係咪佢已經唔再愛我，所以就唔需要再鍚住我？
係咪佢已經同雪琪一齊左，所以以前好溫柔好就住我個個陳俊賢已經唔再屬於我而係屬於程雪琪？
比起嬲，我只係覺得好無助。
點解你地要咁對我啊。
當初如果雪琪知道嘉浩同ceci單野，崩潰個個係咪會係雪琪？
我真係好白痴，幫你保守呢個秘密，點知到頭黎原來你係有份傷我。
其實明知只得我是外人
我腦海不斷諗起呀賢同雪琪。
陳俊賢，你地兩個係咪已經做過我地兩個做過曬既野喇？
男朋友，好朋友。
我係咪要係呢一日之間失去曬？
「小熙！」
我抬高頭，望到遠處跑緊過黎既嘉浩，同埋佢身後既雪琪。
點解... 我唔想見到程雪琪...
「小熙！」嘉浩見我想起身走，即刻加快腳步跑過黎然後捉住我。
「放手啊」淚水又忍唔住流落黎，係咁對嘉浩作出掙扎
但係對於學開跆拳道既嘉浩黎講，比起要掙扎佢而離開係仲難過推開陳俊賢。
「小熙啊！你聽我講啦好無啊？」嘉浩摸住我個頭好溫柔咁講。
我一路喊一路唔出聲咁聽嘉浩講。
可能我依家覺得嘉浩都係受害者，所以我肯聽佢講。
佢舉起佢手上面一個紙袋，然後遞到去我面前。
「呢個係雪琪幫呀賢整俾你既禮物，三週年。」
我呆左一呆，但隨即個腦又諗起岩岩係雪琪房見到個一幕，又諗起呀賢頭先咁對我...
「我唔聽啊！你地走啊！」我襯嘉浩不留神即刻甩開佢然後向後跑。
我唔會信你地。
就算你地搵嘉浩做中間人都係無用。
陳俊賢我地玩完啦。
『第時我結婚，你要做我伴娘架！』
『屌，邊個恰你姐係同程雪琪過唔去！』
『我地第時要一齊環遊世界！』
我望住雪琪同我傾過既whatsapp紀錄，對比我而家既情況相當諷刺。
程雪琪，係咪連你都要離開我喇？
我唔想返屋企，又唔想返hall喊。呀賢由頭先係我屋企走左就已經無再搵我，而雪琪同嘉浩都無再打電話比我。
「呀朗，你而家係邊啊？」我望住電話冇乜電，又攰又肚餓，好無助咁唯有又麻煩呀朗。
「我係屋企啊，你見點啊？」呀朗好擔心咁問。
「我... 唔知點算好⋯」我dup低頭，雙目無神咁講。
「我黎搵你喇好冇？」
今日已經麻煩過呀朗太多次，於是我拒絕左「你入荃灣都遠... 我可唔可以黎搵你？」
「好喇，你小心啲。我係地鐵站接你喇。」
搭左車半個鐘左右就到左屯門，離遠就見到呀朗換返平日出街衫同落左妝。
「對唔住啊，我又麻煩你」我唔好意思咁望住佢。
「傻喇，點會。我話過你男朋友唔係你隔離個陣，我會係你身邊架嘛。」呀朗都係笑得咁溫柔。
「嗯⋯」眼淚又不自覺咁湧上眼睛，但我強忍住左。然後笑左笑「我同佢... 分左手喇... 」
我feel到呀朗窒左窒，然後好慌亂咁唔知講咩好。
「我... 冇事啊。過一陣應該冇事。」我笑住咁講。
行左冇幾耐就到左呀朗屋企，非常相信呀朗既我一啲遲疑都冇就跟住一個人住既佢上左去。
「朗仔！返黎喇？」幫我地開門既係一個笑得好親切既太太，應該係呀朗媽咪黎。
「咦？」佢望一望我之後，即刻陰陰嘴咁笑「女朋友啊？」
「唔係啊姑媽，我同學黎架。佢上黎同我傾跳舞啲野炸嘛！」呀朗面都紅曬好緊張咁解釋，而佢姑媽無視左佢，捉住我就抆左我入屋。
「hello auntie ，我係呀朗同學，小熙啊。唔好意思，打擾曬。」我冇諗過呀朗姑媽會係咁熱情咁係咁捉住我問東問西。
「如果唔係我上黎幫你執屋，都唔知你有個咁可愛既女朋友啊，朗仔！」
「唔... 唔係啊，姑媽... 佢... 」呀朗未講完已經比姑媽無視加插嘴講「小熙啊，你要好好地咁睇實個衰仔啊！佢以前好衝動架，少少唔妥就同人打交！」
姑媽繼續佢滔滔不絕既談話，而我同呀朗都係陪下笑咁點兩下頭。
終於呀朗搵到機會，即係入位「姑媽，都夜喇，你唔洗返去煮飯咩？」
「係喎！原來八點幾喇！咁我返去喇，朗仔記得送返人地返去喇！」
「唔好意思啊，我姑媽係熱情左啲」呀朗好抱歉咁望一望我。
「唔緊要，佢都係為你好姐。」我笑左笑咁搖左下頭。
呀朗係房到拎左支結他出黎，坐係我隔離「你咪話好中意男仔彈結他既，我而家滿足下你既喜好喇。」
其實呀朗佢真係好好，望住為左開解我而咁努力既佢，心中一陣暖流，我定睛咁望住專心彈結他既佢。
『或者 候補 做到 比天 更好
才可 令你 替我上訴。』
一曲完左之後，呀朗抬起頭同我對到眼。然後我feel到佢慢慢咁哄埋黎⋯⋯。