【大學故】《上到大學，原來真係會咩都唔同曬》: 十四
(十四)
*小熙視覺
真係好攰，好辛苦。
自從個日係酒吧接呀賢返屋企，加上呀賢同雪琪既行徑同對話，種種跡象都令我去懷疑佢兩個既關係。
我知我講出黎呀賢一定會話我係亂諗係太敏感，但三年喇，我地四個都friend左三年，點解我而家先會黎介意？
係咪我同佢地唔同學校所以少左好多共同話題？
太多太多既諗法同可能性係我腦袋出現，我為左令自己無時間諗呢啲事，我可以話係去到接近自虐咁濟。
每日訓得五個鐘，繼續chur project, paper, danso。
而Whatsapp上，同呀賢雪琪都已經減少到接近無咁濟，多數都係講「早晨」、「我上堂/練舞/溫書/食飯啦」、「早抖」就冇，或者係比個時間我自己緩衝一下，又或者係上天比我同呀賢既考驗掛。
其實我知，呀賢同雪琪feel到我既疏遠。
佢兩個先後轟炸我Whatsapp千字文、單機都試過，而我都係話「無事，我忙姐。完左Run U就輕鬆啲架喇。」但其實得我一個知我亂諗野。
終於，我從來都無諗過我胡思亂想出黎既畫面，竟然會成真。
就係個一日，我地danso要去呀賢雪琪學校表演。
因為當時已經避左佢兩個成個月，而我都已經諗清楚要相信自己，呀賢同雪琪，於是就通知左佢兩個係我表演完之後一齊慶功。
加上個日咁岩係我同呀賢第三年紀念日，所以決定要同佢坦白返我呢個月既改變同諗法。
「小熙，既然距離表演仲有兩三個鐘，你又set好曬野，不如你去搵下你啲朋友喇？仲有好多人未化妝同set頭，一間就會好亂架喇！」 排舞老師對住我講，同時又打發左幾個teamate走。
我望一望仲整緊個頭既呀朗，又望一望手機，點左下頭就企左起身準備搵雪琪。
「記得表演前一個鐘返黎啊！」 老師叮嚀我同幾個run u teammates 就繼續同負責人開會。
我拎起電話，check左雪琪time table 係空堂，加上佢話就算走堂都會黎睇我表演，所以我肯定佢呢個時間係hall到hea緊。於是就諗住上去比個suprise佢，話曬都成個月冇見，掛住就一定架喇。
拎住係canteen買返黎雪琪最愛既炸雞外賣，行到去雪琪宿舍大樓下面諗住打比雪琪叫佢落黎接我之制，就見到迎向而黎係雪琪既Roomate, Alice。
之前已經見過我無數次既Alice好理所當然地就帶左我入宿舍。
「你又黎搵雪琪啊？你地感情真係好架姐。」
「哈哈，我咁岩run u team所以咪黎探下佢囉。」
一路行一路有傾有笑咁就到左雪琪房門口，Alice一打開門，我真係百感交集，畫面比我上次見到嘉浩同Ceci更加震撼。
當時房入邊既呀賢同雪琪係背向門口，所以仲未見到呆左係到既我同開門既Alice。
「濕曬喇！」 雪琪皺起眉頭咁瞪住坐係床度無著上身衫既呀賢。
而呀賢就用好輕浮既語氣咁講「邊到濕啊？」
係，係佢地既對話，我完完全全隻字不漏咁聽到曬。
當佢兩個另轉頭見到我既時候，同樣係驚訝既表情。
「小熙？你點解係度既？」 呀賢首先企起身向我走過黎。
而家係咩意思？姐係我唔應該係度阻住你地？
我不自覺咁退後左一步，眼淚已經控制唔到咁不停湧出，我緊咬住雙唇為免我會崩潰咁叫出黎，四肢好似突然間無曬力咁，手上既外賣都隨之而跌左落地。
「小熙，唔係你諗咁架！頭先⋯...」
我唔想知。我真係唔想聽。
我本能咁向外走，衝左出宿舍。
我開頭聽到呀賢係後邊不停叫我既喊聲，我自知跑唔過佢，於是求其係一個轉角位到蹲下躲起。
我唔知自己喊左幾耐，淨係知當我回神之時已經過左本來既表演時間。
腳都已經麻痺左，加上情緒太波動同呢排休息根本唔夠，我已經開始覺得暈厥，但意志力要我頂住，所以我比自己坐係地下到休息同調整下呼吸。
「小熙？你係咪度呀？」 終於，呀朗搵到我。
我而家係佢眼中一定係狼狽不堪，臉上既妝容應該都已經比我喊到花曬，本來set好既髮型都已經亂蓬蓬。
「小熙, 你點啊？」 呀朗好溫柔咁拎左張紙巾幫我擦眼淚。
「表演係咪完左喇？」 我dup低頭，捉實呀朗件衫講。
「你唔洗擔心，冇事。已經表演完。」佢一下一下咁摸我個頭咁安慰我。
「我... 想返屋企」 呢刻，就比我逃避下喇。
「好，我送你返去？」
我冇出聲咁點左下頭，無視左手機上又再打黎既雪琪。
*呀朗視覺
係的士上面，小熙一直都望住窗外面無出聲。
我唔知佢發生左啲咩事，但係我好擔心佢，我唔想見到佢呢個樣... 我唔想，見到佢流眼淚。
李穎熙呢個女仔真係好特別。由第一日係ocamp見到佢個陣我已經覺得佢好可愛。
俾人撞親唔出聲，如果唔係我留意到，我諗佢真係諗住等我地成村人行到半路先番黎搵佢。
同組個條姣婆ceci不斷打佢好朋友既男朋友主意，如果我係佢，我一定忍唔住屌佢一獲。
或者因為以往我曾經做過mk仔，識親都係mk妹；又或者我讀開band3垃圾中學，學校幾乎無乖乖女咁濟。
19歲仔，真係咩女仔都識過，就係未識過乖女。
我真係... 好鍾意呢個女仔。
但原來佢有男朋友，有個佢好愛亦都對佢好好既男朋友。
我鍾意佢，但我唔會打擾佢地。
因為我知道，摯愛俾人搶走既痛。
「呢度就係啦，多謝你地52蚊」個司機係一棟大廈面前停低左。
我俾完錢就跟住小熙落車「唔該曬」
「咁... 我送到你去呢度啦，你小心啲啊」我首先開口講
「不如你陪我坐一陣啊」小熙係大廈門前另轉面，淚水好似又想流落黎咁。
「... 咁好啦」我遲疑左兩秒，就繼續跟住佢上樓。
「隨便坐啦。」小熙講完，就坐左係梳化。
我無講野，坐左係佢隔離。
「... 跳舞個度... 真係好對唔住」小熙dup低頭講
「傻啦，比賽呢啲野幾時都可以有既」我輕聲講
「點解你唔問我咩事既」
「我覺得... 如果你唔想講既，就無謂逼你啦。同埋... 我估應該係同你男朋友有關既，所以...」
「哈哈，你好聰明。」小熙無表情咁乾笑左兩聲「我男朋友同我最好既朋友搭上左。」
聽到呢度，我成個人呆曬。
「咁... 會唔會係誤會啊？」我嘗試去安慰同埋推翻呢個可能已經係事實既『事實』。
「如果你女朋友去左你好朋友間房，然後你好朋友除左件衫，兩個人講埋啲好意淫既野，你覺得係誤會？」小熙一路講，雙眼又開始變紅。
「...」
望住佢喊，我好心痛。
我唔識安慰佢，我乜都做唔到。
明明我仲話過，當佢男朋友唔係佢隔離既時候，我一定會係佢隔離。
「呢啲mk仔，得個樣架姐!唔洗驚佢架，總之... 你男朋友唔係你隔離個陣，我都會隨時係你隔離既。」
終於我忍唔住，一手攬住坐係隔離既小熙，然後鍚左落佢額頭。
*呀賢視覺
「點算呀」雪琪見我好失落咁行番入佢房，即刻好焦慮咁話「小熙唔肯聽我電話呀」
「佢都唔肯聽我電話」我好擔心咁話，同時依然不斷打俾小熙。
「不如你試下去佢屋企？可能佢番左屋企！小熙每次唔開心都會番屋企然後較大個喇叭黎播住音樂喊架啦！」雪琪不斷諗啲可能性。
「係喎！」雪琪點醒左我「咁呢度啲野... 」我望一望雪琪張床上面個堆五顏六色既野「唉本身諗住整surprise比個傻妹等佢開心下... 點知依家」我好無奈咁講。
我無諗過小熙會無啦啦上黎搵雪琪。
識我既人都知我art方面不嬲好差，所以我就諗住叫係中學有修過art既雪琪幫我整呢樣野俾小熙。
其實雪琪已經幫左我幾晚，但係到今朝都係差少少。我知道小熙今日會黎我學校跳舞，所以我即刻拿拿聲走去雪琪hall度叫佢幫我搞埋啲收尾。
本身諗住等小熙比賽完就俾個驚喜佢，但點知...
「你快啲去搵小熙先啦，呢度我幫你搞點！總之今日一定可以俾到佢！」雪琪指一指前面張櫈繼續話「你件衫呀，再電聯啦」
我著番件仲係半濕既衫就即刻衝去小熙屋企。
「司機唔該xx大廈」
「死啦雪琪，無時間啦點算...」我一衝到去雪琪hall房，佢一開門我就即刻一輪嘴轟炸佢。
「唉呀你冷靜啲啦老細，有我係度就算依家先開工都趕得切！」雪琪拍曬心口咁講「坐低先啦！」
「呢個我痴極都唔得囉，頂，乜依家啲diy咁難架咩！」
「睇過... 白痴！你都未met個雙面膠紙點痴啊？」
「唉真係食屎，小熙一定知唔係出自我手筆。」我望住雪琪好似梵高再世咁幫我份野加插圖，忍唔住長嘆左一口氣。
「你定啦，小熙一定會好感動既，你為佢做咁多」雪琪笑住話「幫我拎把間尺黎啊」
「要間尺做咩啊」我好順口咁問
「緊係度個長度fit唔fit啦，唔通度你條撚有幾長咩」
「丫妳...咁撚串」我頂左雪琪一下，但一個唔小心，將檯面個杯水撞瀉左。
「頂！」雪琪手上面既彩色畫紙俾我整到濕曬，但下一秒佢見到我件衫都濕左一大截。
「唉你... 洗咪晾下佢啊，你擺係冷氣位下面張櫈到啦，我roomate應該唔介意既。」
整好曬之後，雪琪好懊惱咁望住手上面個堆紙
「做咩停曬手啊？」
「濕曬啦！」佢啤住我
唔知點解個刻我好想玩鳩下佢
「邊度濕啊」我笑笑口咁問
就係呢個時候，我地先發現房門俾人打開左，而小熙就企左係我地後面。
「你所打既電話號碼暫時未能接通...」
小熙你快啲聽電話好無。
「xx大廈，呢度到啦！」