我們怎麼了？: 26

阿斌離開香港前的兩個星期，從詠莉的口中，我收到一個消息。 

「秋凝前日還咗錢天恩佢地，天恩話，秋凝同佢講，佢冇BB。」詠莉在我們晚餐的時候，突然說出這個消息。

「哦，係咩？」我覺得很驚訝，但也告訴自己絕對不能表露出來。 

詠莉：「你唔奇怪我同你講咩？」 

我：「冇諗奇唔奇怪，反正我都唔理，應承過妳，我只係理妳一個。」 





詠莉：「謝宣諾，你話過要娶我。」 

「係喇煩。」我親了詠莉一吻，又繼續碗上的晚餐。 

回家後，我在房間想了很久，最後還是決定在Msn中找秋凝問過明白。 

【※諾哥※】：『秋凝。』 

【秋凝妹~小秘密】：『係？搵我？』 





【※諾哥※】：『有嘢想問妳，有時間？』 

【秋凝妹~小秘密】：【哦，講啦。】 

【※諾哥※】：『之前聽詠莉佢地講你等錢用，宜家有冇事？要幫手嘅可以搵我。』 

輸進這句說話後，我像是一個等放榜的中學生般守在電腦前，等待秋凝的回覆。我看著那個對話框中，代表秋凝正在鍵入回覆的一句「輸入中…」，那感覺像是過了很久。 

但秋凝忽而輸入又突然停下，反反覆覆地，良久也沒有吐出一句話來。這時我的心跳得更加厲害。因為那好像是一件很複雜的事情，正在被我慢慢掀開，不知道當中，會不會有讓秋凝重新注意我的可能？ 





終於，秋凝回覆了我。

【秋凝妹~小秘密】：【我冇事，只係屋企有事，宜家已經搞掂。同埋我已經俾返啲錢佢地，叫佢地盡量唔好周圍講人嘅事。】 

【※諾哥※】：『唔係呀，佢地都係關心妳。』 

【秋凝妹~小秘密】：【得啦，我冇事，再傾，88。】 

秋凝說完，便很快的下了線。我心情立即變得很差，心裡面很像有一股力量想往外爆發，但卻找不到出口。 

我對秋凝沒有死心，不過自己也快要去美國，又可以再做什麼？ 

我想得入神之時，媽媽突然在門外出現，揚揚手示意我到大廳外。 

我走出廳外，看見爸爸跟叔叔在坐著，連霜姐也在一旁。 





我：「媽咪，乜嘢事？」 

媽咪：「我地講緊去美國嘅安排同時間，你都一齊聽。」 

「哦。」 

叔叔：「哥，阿嫂，公司果度我會幫你地睇實，但基本操作阿嫂妳都可以喺美國果邊同我用電郵聯絡，宜家科技方便，應該問題唔大，最緊要阿哥你好好養病。」 

爸爸：「我諗我地唔使去好耐，因為最近幾個星期我都冇事，休息多咗仲覺得精神好咗，可能幾個月就返。」 

媽咪：「搞一大輪嘢你想幾個月就返？喺香港你咪成日同班朋友去賭錢玩天光，去到美國你先可以安心休息。仲有個仔去果邊讀書呀，唔通去幾個月我地返嚟叫佢自己一個喺果邊呀？阿晨呀，你預我地點都去一年喇好嘛？總之你幫我睇住，要辛苦你唔可以成日返英國喇。」

叔叔：「我外國果邊嘅朋友一早有叫我返去幫佢手，不過我已經好肯定咁拒絕咗佢，所以你地放心，我一定會幫你地睇公司。」 





我：「阿叔又係果個踢國家隊嘅朋友呀？佢叫你返去踢英超呀？哈哈哈。」 

爸爸：「又笑個阿叔，你阿叔為咗幫阿爸都唔知放棄幾多嘢呀衰仔。」 

叔叔：「所以我唔話你知啦諾仔，由我講俾你知開始你已經唔信我，所以我唔益你，哈哈。」 

我：「有英超唔踢幫阿爸睇住公司，果然係好細佬，好細佬。」 

叔叔，「使乜講，你阿爺阿嫲死咗，你阿爸就係我最親嘅人，所以我點可以唔幫佢？返英國又算得係乜？」 

我：「咁媽咪呀，我地幾時會過去？」 

媽咪：「我地會去咗紐約先，我有個舊同學喺果邊，安排好所有嘢先搵屋。」 

爸爸：「點解唔搵咗屋先？」 





媽咪：「隔山買牛點得？就算租都好，唔親眼睇過我都唔放心，所以去到先揀，反正有時間。」 

我：「會唔會有花園呀？我上網睇外國啲屋企可以喺美國整個龍門呀。」 

爸爸：「你媽咪肯先奇。」 

媽咪：「你鐘意咪整，反正地方咁大。」 

我：「真嘅？多謝媽咪！」 

爸爸：「嘩，媽咪今次咁大方？奇怪奇怪。」 

媽咪：「阿諾少肯陪我地去，我都唔知幾多謝佢。」 





我：「咁我地即係幾時起程？我要同班兄弟講，要玩餐勁。」 

「呢日呀。」媽咪將她的記事本推到我面門，我看見上面有一個用紅圈，紅圈內那個日子，就是我要離開香港的日子。 

那一天，是九月十五號，我真的離開了香港的日子。