我們怎麼了？: 53

「佢點講？」謝宣諾問諾爸，諾爸坐在門前玄關下的小沙發，邊脫鞋子邊低著頭回答：「阿晨冇講咩…只係話，既然都咁耐冇見，搞轉名又要手續咁煩，話不如遲小小先見喎。」 

「咁阿叔話遲啲咪遲啲囉。」諾媽看到謝宣諾的失望表情，連忙在旁打完場。 

「嗯，都冇辦法啦…阿爸你唔使除鞋啦，我地去食飯喇。」 

「諾仔，其實媽咪都有小小嘢問你。」諾媽這時又拉著謝宣諾問：「都成個星期，你都仲未同我同你阿爸講，你幾時帶家寶俾我地見？我地兩老第一個孫，你唔係諗住同我地講句就算呀？就算你同Sandy係分開咗，我都要見下我個孫嘅媽咪係邊個呀。」 

「係囉，咁到底你係簽咗文件，阿家寶係正式跟住佢媽咪，定係暫時放喺佢度等你返去再慢慢商量？你都要同阿爸媽咪講聲呀。」諾爸續說 





「我同Sandy提過，佢話要幫家寶整護照，一係咁啦，我打電話過去問問。」謝宣諾拿起手機，走到小偏廳那邊。 

諾媽和諾爸看著謝宣諾先是說了幾句英語，然後便是語帶激動以機關槍式的說出一連串泰語。諾媽此時看一看諾爸，然後輕聲說：「好似關係唔係幾好。」 

「兩個人分得手有幾融洽呀媽咪。」諾爸苦笑的說 

突然… 

「喂！家寶？係唔係家寶呀？」謝宣諾此時才走回兩老的身邊，一邊摟著諾媽的肩膀一邊繼續向電話說：「家寶，你聽爸爸講嘢先…你聽住先…宜家爸爸喺香港，香港呀，即係爸爸平時同你講爸爸長大嘅地方。我宜家俾你同嫲嫲爺爺傾兩句，但你話俾我知你要點做呀？」





這時兩老已開心得伸出四隻手準備接過電話，但謝宣諾仍然對著電話筒一直吩咐另一邊的兒子：「係喇，嫲嫲即係我媽咪，爺爺即係我爸爸，我以前咪同你講過囉。」 

「俾我聽啦，等我講。」諾媽用接近強搶的方式碰著謝宣諾的電話，謝宣諾哭笑不得，最後還是乖乖就範：「好喇好喇，媽咪妳聽。」 

「喂，家寶係唔係呀？我係嫲嫲呀，你叫我先啦。」諾媽搶過電話，便非常雀躍的跟家寶問好，諾爸也將自己的耳朵靠近，希望可以聽得到自己孫兒的聲音。 

「你叫我啦，你叫我我去買糖帶嚟泰國請你食。」諾媽一直逗樂著家寶，然後電話筒另一邊傳來一句很大聲的「嫲嫲」。 

「乖，家寶乖。」謝宣諾這時才看到，兩條淚痕已沿著諾媽的雙眼一直往下流。這畫面看得謝宣諾很驚訝，他想不到一個從來沒有見過面的孫兒說的一句，會令自己媽媽立即流下淚來。 





謝宣諾很壓抑的緊緊摟著兩老，一直笑著陪伴他們這一次跟家寶的「首次對話」，因為他回來香港之後開始慢慢意識到，原來時間過了就是過了，有些事，不能等，也不可以等。 

最後這一通電話聊了一個小時，兩老差不多由家寶出生到現在的事情都問過之後，才開開心心的掛線，而且還約定了下一次會在香港見面。 

晚上，謝宣諾襯著兩老入睡之後，倒了一杯紅酒，邊看著那個維港海灣，邊繼續收拾那一堆放在士多房的舊物。終於在一個紙皮箱內，找到了那本寫下很多雜項的本子，翻了幾頁，終於找到了他想找的東西。 

那個遠古的Msn登入帳號和密碼。