我們怎麼了？: 52
祖立：「咁得閒呀諾哥，msn好耐冇玩喎，你仲記得密碼咩？」
謝宣諾：「我唔記得呀，所以問問大家。」
建偉：「我連個Login都唔記得。」
建倫：「喂，我有寫低呀，喺屋企之嘛。」
建偉：「係咩？咁搵日我又開下睇睇先。」
祖正：「我記得呀，耐不耐都有開嚟望下。」
謝宣諾：「死啦，我完全唔記得。」
建倫：「返屋企搵搵啦，可能你好似我咁有寫低呢。」
謝宣諾：「祁詠莉同簡仁做乜唔講嘢？」
詠莉：「唔使做咩，諾哥。」
簡仁：「佢真係唔使做呀妳講得啱。」
謝宣諾：「我要做呀，搵到新工喇。」
詠莉：「咁快搵到工？」
秋凝：「喂，你地好嘈呀，訓緊覺呀我。」
祖立：「嘩，老婆妳仲未起身？」
秋凝：「係呀，好好訓……」
話題被拉開，謝宣諾也再沒有說話，他打開了詠莉的Whatsapp對話欄，正想找個話題的時侯，赫然看見詠莉的一邊也正顯示著「輸入中…」。
詠莉：「你搵到工喇？咁快嘅？世伯伯母點呀？」
謝宣諾：「搵到，喺一間旅遊公司做，阿爸同阿媽搬咗去同我住，都幾好，阿媽呢幾日精神都唔錯。」詠莉：「咁咪幾好。」
謝宣諾：「好呀，妳又點呀？」
詠莉：「冇嘢呀，你講Fabio？」
謝宣諾：「其實妳隻手點解會咁，你可唔可以話我知？」
詠莉：「冇事呀，好耐喇果啲疤。」
謝宣諾：「有幾耐呀，妳同佢拍拖最多咪幾年。」
詠莉：「得啦，我冇事，我搵日去睇伯母，你都記得佢嘅覆診時間呀。」
謝宣諾：「好，再約，妳保重。」
對話結束，謝宣諾看著電話微微的笑著，看了一會，又放下電話繼續工作。他抬起頭，看著這間擁有過百員工熙來攘往的辦公室。
這裡，正是他回到香港的第一間旅遊公司。
憑著謝宣諾在泰國多年經濟渡假村的經驗，很快便在香港找到這一間旅遊公司暫時安身，始終離開了香港一段時間，所以他需要一個地方來慢慢適應回所有節奏。
當晚，謝宣諾回到他的新居。
「諾仔，你搵咩呀？」諾媽走到謝宣諾的房間問。謝宣諾整個人已經爬進那堆紙皮箱內，一時間未能立即回應諾媽。
「我搵緊見唔見我以前果堆記事薄之類嘅嘢呀媽。」滿頭灰塵的謝宣諾答道
諾媽：「我有留低呀，咪放喺阿叔果堆舊書同舊信度囉。」
「係咩？我放咗入士多房，我去搵搵先。」謝宣諾像小孩一樣立即向士多房跑去。諾媽彎下腰想為謝宣諾收拾一下雜物，冷不防被士多房那邊的謝宣諾發現訓示：「媽咪呀，妳唔好幫我執喇，一陣等阿爸返我地就去食飯。」
「你阿爸都唔知幾時返呀，又話去探你叔叔，夜晚都未返。」諾媽走到士多房門口看著謝宣諾說。
「呢度冇……果度……都冇….喺邊呀大佬？媽咪妳講咩話？」謝宣諾邊分著心翻弄著舊物邊說。
「我話你阿爸唔知去咗邊呀，又話探阿叔，到宜家都未返。」
「咁大個人佢去得邊，咦，媽咪，呢本相薄邊個架？」謝宣諾拿起一本紅色的照片薄問
「咪你阿叔囉，佢喺英國嘅相嚟嘛。」
「我未見過嘅？」謝宣諾邊說邊翻開看。諾媽聽著，想了一下，續說：「一直放英國，係你走咗之後果一兩年，佢返英國帶返嚟。」
「哦……放咗喺英國咁多年，又會冇端端帶返嚟？」謝宣諾不想諾媽面前對舊事有太大反應，一直故作無事的說著。
「佢以前成日覺得自己有機會返英國，後來打消咗呢個念頭，咪將英國所有嘢帶返香港囉。」諾媽口中所說的，謝宣諾大概明白，叔叔因為自己的離去，所以要照顧他的父母，而決定永遠留在香港。
謝宣諾知道他叔叔一直存在於英國的根，亦知道這個根，已經在很久之前被自己親手拔起。一陣內疚感驀然升起，謝宣諾同時也看著叔叔的舊照片，突然，他看到了一張很驚喜的照片。
「媽咪，呢個係叔叔朋友？」謝宣諾指著一個照片內的一個外國人說，諾媽看了眼，再說：「呢個咪成日同佢傾電話果個Alan囉，十幾年前去英國都有同佢食過飯。」
「Alan？呢個就係叔叔成日講果個Alan？」謝宣諾很激動的說
「係呀，做乜呀？」
謝宣諾：「我地香港叫佢做舒利亞，以前踢英格蘭國家隊呀，叔叔唔一早同我講？」
「唔係呀，你阿叔話同你講咗好多次，係你唔信佢。」
謝宣諾這時想起，叔叔的確曾經跟自己說過很多次，他有很多在英國職業足球聯賽打滾的朋友，只是他自己一直不相信。為什麼不相信？謝宣諾自己也解釋不了，就好像他十多年前也一直不相信，原來香港這邊有那麼人多需要他一樣而跑去泰國一樣。
結果都一一証明自己當年所想都全是錯的，不過時間已經跑不回去了。
這時，大門傳來聲音，諾媽和謝宣諾都知道諾爸回來了。謝宣諾立即走出大廳，看到爸爸後立即問：
「阿爸，點呀？我可唔可以加個名落去名單度探阿叔呀？」
諾爸表情有點愕然，但看得出並不順意，怔了一下後他再跟謝宣諾說：
「我同阿叔講咗喇，佢話…」
「佢話咩？」謝宣諾緊張的問
「佢話佢唔想見到你，唔俾我加你個名落去呀。」