我們怎麼了？: 46

「我個孫？你結咗婚喇，個老婆同個仔呢？有冇跟你返香港呀？」諾媽聽到這個消息，很緊張的問 

諾爸：「係囉係囉，唔帶埋佢地嚟嘅？」 

「佢媽咪叫Sandy，係泰國人，我同佢已經分開咗，家寶跟住佢媽咪喺泰國。」謝宣諾邊珍而重之的把照片安好回錢包邊說。 

詠莉在廚房內一直站著，未有走出大廳，她不想打擾他們重逢，也不想聽到謝宣諾所說的事。可惜這間屋的空間太小，不想聽到的還是要聽進耳內。 

「咁個小朋友你唔要返？你頭先先話以後留香港，咪即係佢成世都見唔到老豆？點得呀？」諾爸緊張的說 





謝宣諾：「冇辦法，我打算多啲返泰國睇佢囉。」 

「陰功，咁點得呀？」諾媽憂心的問 

謝宣諾：「得喇得喇媽咪，妳仲發緊燒，宜家返去訓先。阿爸，你都唔好再返工，我聽日同你地去睇地方，我同你地一齊住，好冇？」 

兩老相望，大家面上都表現出一個奇怪的表情，可能整件事都來得太快，才那半個小時內的事，失蹤了十二年的兒子在自己的面前再次出現，而且還要多跑一個孫子出來，怎教兩老不會手足無措。 

「咁你宜家去邊？唔喺度訓？」諾爸關心的問 





謝宣諾：「我送詠莉走，順便返酒店拎返小小資料同你地聽日去搵地方，我聽朝嚟接你地好嘛？」

「好，咁你同詠莉早啲走。」諾爸說 

「諾仔。」諾媽這時坐在沙發上拉著謝宣諾的手，謝宣諾蹲下，輕聲道：「點呀媽咪？」 

「你唔會呃媽咪架可？你聽日會返嚟架可？」諾媽用一種謝宣諾從來沒有見過的語氣說，那是一種接近懇求的語氣。 

謝宣諾覺得很難過，把母親輕輕的抱入懷說：「一定唔會，應承妳。」 





諾媽在謝宣諾的懷中，也用自己的手摟著他那已經變得成熟的手臂：「你宜家咁大隻，仲好攬過你阿爸，哈哈。」 

「聽唔聽到呀阿爸？哈哈。」謝宣諾向諾爸開了個玩笑，又繼續聽諾媽的說話 

「其實你知唔知自己個名點解？」諾媽問謝宣諾 

「唔知呀，有意思咩？」謝宣諾答她 

諾媽：「果時同你阿爸結婚，因為你阿公唔鐘意，所以我成日同你阿爸鬧交，果時大家感情都唔好得去邊。後來到你出世，我仲記得你啱啱兩個星期大果陣，有一日你阿爸同我講，要將你個名改做宣諾。 
我問佢乜嘢意思，佢話以前大家好似未有基礎，就算結咗婚都好似隨時會離婚咁，直到你出世果晚，佢諗咗成晚，覺得我地嘅家庭終於都完整。宣諾宣諾，就係你爸爸向我宣佈嘅一個終生承諾，永遠都唔會呃我同會照顧我，你個名嘅意思就係咁嚟。」 

「原來阿爸你溝女都幾叻喎。」謝宣諾很感動的同時，跟諾爸開了一個玩笑。「係呀，哈哈，你阿叔果時都咁笑佢。」諾媽也附和的說，不過這句話一說出，卻有如一度閃電一般擊中謝宣諾的心臟，他驚覺自己的大意。 

「咦！？」謝宣諾很大動作的叫著。 





「咩事呀諾仔？」諾爸緊張的問 

「係喎，阿爸媽咪，阿叔呢？阿叔喺邊呀？」謝宣諾看著兩老問。 

諾媽看著諾爸，暗示由他去跟謝宣諾去回答這個問題。但諾爸也也面有難色的看著諾媽。謝宣諾看著兩老的表現，反應變得愈來愈急躁：「做乜嘢事？阿叔唔係有事呀？」 

「不如我講啦世伯伯母。」詠莉這時終於從廚房走出來。 

「妳知？妳知唔一早同我講？」謝宣諾問詠莉。詠莉沒有理會謝宣諾，逕自走到沙發另一邊坐下來，然後看著兩老的回覆。 

「咁詠莉妳講啦，妳地後生講嘢易啲。」諾爸說 

「咁妳講啦。」謝宣諾蹲著身子爬到詠莉的面前問，詠莉看著他的神情，又問了一句：「今日已經咁多事，不如聽日先講你知好冇？」 

「得啦我ok，妳話我知。」謝宣諾拉著詠莉的手說 





「唉……」這次又輪到詠莉不知道怎麼去說了 

「點呀？謝宣諾一直半開著嘴巴，神情古怪的看著詠莉，在等她說出叔叔的現況。 

「佢坐緊監。」詠莉的答案，令謝宣諾難以置信。