我們怎麼了？: 32
建倫的一摔把我摔得很痛，理智清醒了點，才定神一下看著他們幾個人。
建倫：「宜家咁大件事，你地兩個仲打乜嘢呀？」
祖立：「佢郁手先，自己有問題就郁手郁腳。」
「打你唔得呀？再嚟囉賤種！」我跳起來，又再衝向祖立。
「停手啦諾，你癲夠未呀？」簡仁左手拉著我衣領，然後右手狠狠的橫扣在我的頸項前。
肥文：「到底發生乜嘢事？」
我：「簡仁，放手！」
「你唔好再打呀。」簡仁說
「放手呀！」我用力掙脫簡仁的手，然後在建倫和肥文面前指著祖立說：「呢條賤種一早就同秋凝一齊，阿斌走之前仲俾佢地呃緊。」
建倫：「諾，你收聲啦，就算係都係佢地嘅事，幾時到你理？」
建倫為他們反駁的一句，令我愕然。一是因為他的語氣，二是他主動為祖立和秋凝的辯護。
那不是他一直的作風。
建倫：「佢地兩個就算係有對唔住阿斌，都係佢地自己同阿斌交待，你咁緊張做乜？」
建倫的一句，所以人的焦點都跑到我身上，我喜歡秋凝的事只有祖立知道，所以肥文跟簡仁都用帶有一點奇怪的眼光看著我。
我沒說話，因為這個問題，在秋凝面前，我說不了謊。
「係你自己一直背住詠莉私底下想追秋凝，宜家鬧我？唔係你，阿斌會出事？到宜家都未知佢有冇事呀！？」祖立將整個真相刺破，肥文和簡仁立即以不可置信的眼神看著我。只有建倫，好像已經一早預知一樣。
「我同你講咗好多次，我同祖立係一早就一齊，我地冇呃阿斌。」秋凝在祖立身邊向我說，很憤怒、很委屈的說。
「諾仔你唔使再講，秋凝同祖立嘅事我一早就知，佢有私下同我傾過，我再講多一次，唔關你事，唔到你理，你野蠻都冇用。」建倫鐵著臉說，彷彿在嘲諷的對秋凝的自作多情。簡仁：「諾仔你搞乜呀？阿斌果度我地都未問你，你宜家明明自己唔啱仲打祖立？」
建倫：「阿斌阿媽已經訂緊機票去美國，都未知幾時可以過到去，阿斌仲未打電話返香港報平安，我特登嚟呢度就係問你，你地今朝個電話阿斌仲有冇講低佢有可能會去邊？宜家多一個線索就係多一個線索，我唔該你真係咁重視阿斌就做咗正事先，唔好把口話重視阿斌呢個朋友，其實個腦諗另一樣嘢。」
「我唔知，我講哂喇！」我極力的大咆哮著。
肥文：「建倫問你你咁大聲做乜呀？」
我：「宜家係我錯哂嘛，你地全部都啱，得未呀？」
簡仁：「冇人咁嘅意思呀，你仲知乜嘢就講啦。」
我嘴巴中一句又一句的不知道，但聽在他們耳中，彷彿是一時之氣。他們不相信我已經知無不言，他們覺得，我會為了秋凝，而放棄阿斌的安危，甚至是…
我希望阿斌會死掉。
肥文：「你諗真小小啦。」
祖立：「佢點會講，佢會講就唔會秋凝打俾佢先聽，佢自己諗乜嘢佢最清楚。」
秋凝：「你講啦，謝宣諾。」
「講呀諾仔你！」「你係唔係想阿斌死呀？」「你到底有冇當阿斌係兄弟呀？」「你好殘忍呀，謝宣諾。」「你仲知乜嘢呀？講啦！」
他們幾個人圍住我不斷的說話，我已經分不清楚到底是那個人說那一句話，我只是覺得腦內一片暈眩，我覺得整個人也很累，不想再理會眼前的事，我……
我要離開，我要走！
「我唔知呀，全部收聲呀！」我大聲還擊，然後掉頭便走，用上人生中最快的速度離開這個地方。
我以接近逃跑的模樣離開，忘了跑到什麼距離，還聽到建倫在我背後大聲叱罵：「走啦！阿斌冇你呢種朋友！」
我很傷心，我用最快的速度回家，一路上，我已經有了一個打算，回家後，我便立即跟爸爸媽咪說。
回家後，打開門，我看見所有人都站在大廳之內，氣氛好像有點古怪。我想，大概是因為剛才電視上的新聞吧。
坐在沙發上的爸爸看著我，很慈祥的向我問候一句：「諾仔，你去邊？你朋友搵到未？冇事嘛？」
「你有冇事？」詠莉走到我身旁輕聲問。」
「冇事。」我冷淡的回應她，我沒有心情裝開心。
「媽咪。」我看著媽咪
媽咪：「點呀？有事？」
我看著媽咪，又看看她身旁的爸爸跟叔叔。猶豫了幾秒，腦內想起阿斌的事和剛才的畫面，終於都鼓起了勇氣：「我可唔可以唔去美國？」
她們三個人因為我的問題，停頓了一會，面上的表情是驚訝，或者是憤怒…失望，特別是叔叔。
媽咪看看爸爸，再看著我問：「唔係講好咗陪爸爸去醫病？你點解唔去？」
「我唔想去。」我鐵了心的說，爸爸已經接近康復，所以這個階段沒有什麼比我的心情更重要。
「啪！」突然我感動到左險被人大力的摑了一巴掌。
媽咪：「阿晨！」
打我的是叔叔，他站起來，拉起我的衣領，跟我面對面只有五公分的情況下質問了我一句：「你到底知唔知自己講緊乜嘢呀？我之前同你講嘅嘢你又跌咗去邊呀？謝宣諾？」
四個小時內，接二連三所發生的事，我受夠了。
我用力的推了叔叔的肩膀一下，然後很生氣很生氣的說道：「打夠未呀？」
「還手？宜家大個仔識還手？」叔叔史無前例的惱火，向我衝上來就是一拳，我覺得很害怕，因為我從來沒有見過這樣的一個叔叔。
爸爸：「晨。」
媽咪：「晨，等我同佢講。」
叔叔：「識還手仲使講乜？仲有幾日就要過去美國，明知個阿爸有事，乜都整好哂先話唔去，呢啲人我幫你地打醒佢。」
叔叔將我推到沙發，完全不留力的情況下向我飽以老拳，在混亂間我看到他的眼神，我好像看到一個帶有淚光的眼神。
不過那只是一瞬間的事。
爸爸和媽咪拉開叔叔，而詠莉和霜姐則立即走過來看我。
霜姐：「大官你有冇事呀？哎呀，二少你唔使咁勞氣，小朋友咪慢慢教囉。」
詠莉：「你有冇事呀諾？」
媽咪：「晨，你唔好咁，等我教返。」
爸爸：「晨，我知道，阿哥知道，我知道你想講嘅野。」
「你知，但你個仔唔知呀哥。」叔叔掙開爸媽的手，兩眼通紅，狠狠的指著我說：「謝宣諾，我講過你阿爸唔舒服，你就要陪住阿嫂去解決你屋企嘅所有事。係你話俾我知你明白，係你應承我你會幫我睇住我阿哥，宜家你小小事就反口？」
我：「我唔係小事呀！你有冇聽我講呀？一嚟就郁手郁腳，你係我邊個呀？」
叔叔：「有幾大件事？有乜嘢重要過自己阿爸？」
我：「你自己當年咪一樣係咁，你有理阿爺咩？有口話人冇口話自己！」
爸爸：「諾，收聲！」
詠莉：「諾你忍一忍先啦。」
我：「忍咩呀？點解我要忍？點解我唔可以揀自己嘅路？」
「你真係冇用呀，謝宣諾！」最後一巴掌，叔叔向我打了那最後的一巴掌，我被打中後覺得頭暈轉向，因為這一巴掌，非常、非常的重。
叔叔：「就係我冇理我阿爸，我先知道當日我自己做嘅事有幾錯，我冇理自己阿爸，去搵一啲我以為自己過得好嘅日子，我到宜家都幾咁後悔。
如果呢一巴我可以打醒你，你可以憎我呢個阿叔一世，但如果我仲未打醒你，我會繼續打多十巴，一百巴。我只有呢個阿哥，我為咗佢可以做任何事，所以你同我聽住，九月十五號，就算要我做任何嘅事，都一定要將你送上飛機。」
叔叔說完，便走回他的房間，爸爸和媽咪的表情很擔心。但轉看看我後，那感覺好像又是很失望。
「媽咪，我入去睇睇阿晨。」爸爸站起來，就算走過我身邊也沒有跟我說什麼，我看著他的背影，在那玄關下顯得特別疲倦，我一直看著他，一步、一步的，然後轉入叔叔的房間，離開了我的視線。
這是，我最後一次看見爸爸。爸爸走進叔叔房間後，媽咪一直看著我：「諾，其實屋企人對你嚟講係唔係唔太重要？」
「唔知。」我賭氣，被人揍了頓還有什麼心情說話？
媽咪：「唔知唔緊要，你自己諗清楚，如果真係唔想去，我唔會逼你。既然你覺得我同你爸爸係唔重要……」
媽咪說了又停下，像要儲存勇氣才說得了下半句。
「我地都唔使將你去唔去美國呢件事睇得咁重。」媽咪說完，又起來走回房間。
「哎呀太太，妳唔好咁講啦，大官佢仲細呀，同佢慢慢傾啦，一家人講嘢唔好講得太盡呀太太。」霜姐追著媽咪，一邊拉著媽咪的手走進房間，我又定眼的看著她們倆的背影，感覺，愈來愈古怪。
這一次，也是我最後看見媽媽的背影。
「諾呀，你唔好激到你爸爸媽咪咁嬲啦，我見你阿叔咁耐都冇見過佢咁嬲，你就講句對唔住，同佢地去美國啦，最多呢幾日我都陪你好冇？一係我一放假就去搵你。」詠莉抱著我說，但我沒有反應。
我進入了混沌的思維，由阿斌的意外開始，我一直的遇上了幾件就算要我單一面對也處理不了的事情，偏偏這幾件事就在短短的幾個小時內發生。
他們每個人都不知道也不理解我的心情，只是單向的用自己意思一直向我轟炸，完全沒有想過，我能不能承受得了。
我生活中各方面像在短短幾個小時內被瓦解，像是一個不會游泳的人，跌進了一個大海之中。
我想離開這個地方。
「我出一出去，我送妳返屋企先。」我跟詠莉說
詠莉：「你仲去邊呀？」
我：「唔想留喺呢度，我出一出去透下氣。」
詠莉：「唔好啦。」
「係咪仲煩呀？妳地一個二個阻夠我未呀？俾我自己決定返得唔得呀？妳返唔返？唔返就自己留喺度。」我發脾氣，打開門便離開。
最後詠莉還是跟著我走，我坐計程車送她回家，到她的樓下時，她死命要我送她回家。
就在那個電梯前，我們留下了最後一次的對話。
「你俾心機，去到美國好好地照顧世伯，我地好快會見。」
「嗯。」
「唔好再激佢地兩個喇，佢地始終都係你爸爸媽咪。」
「嗯。」
「你去行一陣好返屋企，返到屋企你會俾電話我嘛？」
「嗯。」
「同我講句拜拜好冇？我聽日嚟搵你。」
「拜拜。」
「咁我返入屋企喇，拜拜。」
「嗯。」
我轉身，詠莉又突然叫停我。
「謝宣諾，你話會娶我。」
我看著詠莉的臉，突然湧起很多感覺，她對我很好，其實我也應該是很愛她。但對的人，不一定有對的時間和空間。
「知喇。」我點點頭，然後轉身就離開了。
這一次，是我最後一次見到詠莉。
我離開詠莉的家，跳上計程車便走到我心目中的安全島 – G4 。
到這裡的原因，是因為我回家時，用短訊相約了蔡卓妍來這裡見面。一到埗，我已經看見阿力和蔡卓妍在等我，我急不及待的將今晚所有的事跟他們說了一片。
當然，我全都是用自己的觀點出發。
最後我們聊了四個小時，到接近天亮的時候，蔡卓妍給了我一個結論。
然後，他給了我一個建議。
「諾仔，唔可以再靠任何人，你要靠自己。」這是他的結論。
「諾仔，你不如跟我去泰國。」這是他的建議。