一場十年的夢。: 死因

改變過後生活有唔少變化，
從依家睇起來，
初中時期嘅生活可以用慘不忍睹嚟形容。
 
高中嘅生活不過不失，
中四下學期，同一個充滿笑容嘅學妹一齊。
揀佢係因為基於｢愛一個上一課｣嘅基礎論調，
想搵個陽光氣息重一D嘅女仔，
畢竟上一個嘅戀情太灰暗，
要我承受多次我頂唔住。




 
戀愛初期總係甜蜜，
但係又有幾多對能一直維繫。
同呢個陽光女孩嘅戀情亦都唔長，只有大半年。
 
去到中後期，每次打比佢都總係話忙，
更甚俾咗佢家姐聽。
 
雖然佢家姐同佢同校，
但兩個人性格相差好遠，




受歡迎程度相差更遠。
家姐樣貌平平，無過人之處；
呀妹笑容甜美，活潑帶少許巴辣。
所以識佢兩姐妹嘅都只會鍾意呀妹。
我係其中一個。
 
但係經過咗一輪相處，
覺得家姐性格都唔錯，
係電話會傾下D日常事：
鍾意食D咩呀、平日放學有咩做呀等等




 
而呀妹對我就愈嚟愈冷淡，
到甚至同我講：
｢你唔好咁痴身纏人得唔得呀，我有我自己嘅生活架！｣
 
無耐，我地就分開咗。
 
後來知道，真正嘅｢死因｣不在於我太痴身，
雖然我認，
但係原來佢只係當我水泡，
佢會鍾意我嘅原因係我同佢初戀男友係外貌而至性格都頗為相似。
諷刺嘅係，佢鍾意嘅並唔係真正嘅我，
而係嗰個極多野講串串貢嘅我。
分手，係因為貨不對版。
戀愛，我仍要追求做自己，




所以同佢相處我甚少講野，
慢慢佢就覺得佢唔鍾意咁樣嘅我，
就故意疏遠我。
 
原來做自己，也傷害別人。