一場十年的夢。: 至今的轉變

因為呢件事，我有所轉變。
中三尾至中四嘅暑假好漫長。
漫長唔因為嗰年嘅暑假特別多日子，而係了無生趣。
 
中三尾選科，我嗰班所有男仔都揀左理科。
合理嘅，係雞校，理科代表你勁、成績好。
起初我係唯一揀文科嘅男仔，
我覺得讀文學比較適合我，
而我好怕物理。
更重要嘅係呀倩曾經同我講過：




｢我覺得你幾啱讀文科，你有嗰種氣質。｣
 
可惜老豆見到我張選科表，佢話：
｢呀仔，生仔都知仔心肝，你咁懶，文科咁多野背，你點得呀？！｣
然後我又問我個數學呀SIR，佢又話：
｢妖！你揀咩文科呀，睇你都算醒目仔，轉返理科啦！｣
就係咁，我比呢兩條友說咗轉返理科。
 
以後我曾經慶幸過入咗理科，亦曾埋怨過。
但總體嚟講，無呢兩個人嘅勸阻，




我都無今日。
 
而喺個暑假，我決定改變。
唔再比老豆幫我剪髮，
係窮到一星期得百五蚊飯錢嘅境況下去左剪個八十蚊嘅頭；
唔再比人笑鬍鬚仔，厚住面皮咁叫老豆送個鬚刨比我；
唔再口啞啞，多講野，唔再食玻璃。
 
《浮誇》，係我當時嘅信念。