[粵][RPG][粗口慎入]Gladys－迪詩娜之泉: Ch2. 春秋
Ch2.
「你有兩條路揀，一、過嚟依個傳送陣，會送返你去緣風林；二、死。」
我依稀記得曾經有人教過我，如果要成為一個溝女高手，你往往需要出其不意。
尤其係依類固定選擇題，喺對方問嘅果一刻，佢對於果幾個選擇都已經有晒心理準備，無論咩選擇，佢已經預備好晒反應。
就好似世紀難題「我同你呀媽跌咗落水，你救邊個先？」依啲，無論你答佢先定你老母先，佢都已經諗好晒說話反擊你。
所以話，依啲問題，你一定要跳出框框。
「你似乎以為生命對一個人好重要，但係對於一個冇任何野需要佢去保護嘅人，生死係根本無關痛癢，我喺Gladys依度，並唔係求生。」
「姐係話，」寧威唔知幾時已經拎咗佢把武器出嚟，係一根根骨頭組成嘅棒狀物體，大約一米長。
但本身喺寧威旁邊嘅雷米都準備好，已經偷偷行咗去佢後面。
「姐係話，我揀第…」雷米喺依個時候朝寧威嘅背後撲過去，我都一下子推開咗道門。
寧威冇比雷米撲倒，一個瞬移去咗我身邊，我喺同一時間瞬移咗入去，然後用唔夠0.5秒刪埋咗道門。
但係唔知點解寧威都閃咗入嚟，但係佢並冇攻擊我，佢反而收埋咗武器，雙手放咗喺背後。「喺我一時分心，搞到打擾咗閣下。」
「不，吾對此少年甚感興趣。」由於我係面向門口，所以把聲係喺我背後傳出。
我即刻擰轉身，發現眼前嘅係一名男性，著住一件浴衣，青白相間，裹以藍色腰帶，樣貌不過三十歲，睇落仲年輕過寧威。
我心諗，呀屌冇理由架，寧威同寧風咁樣住喺石洞十幾年都已經夠戇鳩，唔通仲會戇鳩到有啲咩各國政要／組織首領隱居埋一份？
我原本係覺得係啲可以活幾千年果啲老不死魔獸，甚至精靈果啲fd，點知竟然係個人。
咦，等陣，佢個外形係人姐，話晒RPG世界，我點知有冇啲咩可以變人形嘅魔獸，又或者可以擬人化嘅魔法。
「未知閣下點稱呼？」我耷低頭，行咗一個拱手禮。
「稱吾『閣下』便可。」佢笑一笑，行咗嚟我面前，「少年，抬頭。」
我抬頭望住佢，佢大概高我10cm，對眼一路望住我對眼，我又望住佢對眼。屌，淨係寫出嚟我都覺得好gay。
屌，咁我當然唔係gay，只係佢對眼有一種好特別嘅魔力，我望住佢對眼，就會有一種感覺，覺得只要我一路望住佢對眼，我就會得到所有問題嘅答案。
而佢，一路望住我，好似想睇透我咁。
「汝乃無明之人。」「閣下」發言。
「無明」依個term，好熟口面，記得好似係佛教野嚟。
「但汝知其為無明者。」
姐係話，我雖然「無明」，但係我自己知自己「無明」。
就好似有啲人，遇到唔識嘅事物果陣，淨係會一句「唔知、唔明」咁撻埋嚟，連Google同網典都唔肯查、對自己嘅無知覺得係理所當然，而冇果種求知、甚或突破自己嘅心。依種人，無知而不自知，我唔會睇唔起佢地，我只會可憐佢。但如果你最少加返句「姐係點、姐係咩嚟」，或者「求解釋」，成件事就已經唔同咗層次。
我宜家嘅情況就類似喺到搵緊自己嘅答案。
「極北之地、灼熱之流，或有汝之所求。」
「唔，」我望一望寧威，「咁姐係邊度？」
「迪詩娜之泉。」
屌，一聽個名就知係英文嚟，拼一拼先，迪，de，de詩de詩na，desire？
挑，咪姐係願望之泉，嘥Gas。「Desire？」
「你竟然識古精靈語？」寧威聽到我咁問，個樣好似好驚訝。
我挑，精乜q野靈語，咪姐係英文。「我唔知同我識嘅野係唔係一樣，我只可以話我可能識。」
「有趣。」「閣下」滿意咁點點頭。
「Anyways，咁睇嚟我喺依個世界嘅第一個目標就係佢。」一嚟就知自己應該去邊總比唔知好掛？
「難啲。」寧威冷笑。
我一臉疑惑望住寧威。
寧威好快就答咗：「迪詩娜之泉前面有個大型副本，冇返7,80lv程度嘅實力都可以慳返啖氣。」
頂，咁計法，寧風宜家15歲先25lv，lv正常嚟講係愈嚟愈難升，咁搞法我會唔會要留喺Gladys幾十年！？
寧威望一望「閣下」，「閣下」點咗一下頭。
得到「閣下」嘅首肯之後，寧威開聲趕人：「人你又見咗，去向都叫做有個方向，再加上你宜家已經唔係寧風，我唔會再比你留喺依到。」
「下次你再入嚟礦洞範圍，我唔會手下留情。」
跟住，寧威拎咗一本薄薄嘅書出嚟。
＜禁．死神的鎮魂曲＞
技能書－暗系魔法
短時間獲得大量力量的魔法，有傳說須付出靈魂作為代價。
等級需求：25
技能階級：禁忌級
技能效果：生命值和魔力值瞬間回復至上限的75%，所有能力值短暫提升50%～250%（隨樂曲的進行而提升），持續40秒或死亡。技能效果作用期間，每秒失去最大生命值的1%～5%，所有回復效果減少75%。作用完後，強制進入［死亡］狀態。
魔印限制：無限制
重 量：1
「死亡並不孤單，且聽吾頌奏一曲。」
「最後，依本技能書，係寧風同雷米打贏魔風狼王嘅戰利品。姐係話，唔係好關你事。不過，我會當係我買咗依本技能書。」喺我仲掛住望緊本技能書嘅資料果陣，寧威講完依番說話，同時，啪咗一下手指。
我嘅腳下應聲出現咗個魔法陣，睇嚟又係傳送陣。
喂喂！！等等，寧威未比錢呀！
但連我嗌嘅時間都冇，我就被傳送返出去緣風林。
……
緣風林
所 在：緣風林
所 屬：無
等級需求：10
進入限制：無限制
「屌！又話當買咗！找數呀！」我對住面前嘅森林大叫一聲。
依個時候，我面前出現咗一個提示方塊。
「
提示：
恭喜！你成功挑戰副本，並獲得以下獎勵：
＜精緻的 魔法水晶箭＞數量：2；
金錢：6水晶20金5銀；
經驗值：0
」
睇完個提示，我即刻檢查咗錢先，發現我宜家有嘅錢係：6水晶48金76銀89銅幣。
Gladys入面1,000,000銅幣＝10,000銀幣＝100金幣＝1水晶幣，係就係冇1蚊2蚊5蚊果啲硬幣方便找錢，但係依個世界同大部分Online game一樣，有交易介面，所以錢銀野都唔算麻煩。
跟住我再睇下支箭。
精緻的 魔法水晶箭
武器－箭矢
製作者：寧威
使用精緻材料製作的魔法水晶箭，內裡隱含高級魔法。
等級需求：30
智力需求：120
熟練需求：150（魔法弓）
攻 擊：40～42
附加傷害：？？？
使用次數：1／1
重 量：21
唔，睇落好似好勁咁，但我一嚟未夠lv、二嚟未夠熟練度，暫時支箭都係得個擺字。
熟練度基本上就係你款武器用得多，熟練度就會增加。有啲武器會要求你另一種武器嘅熟練度達到某個數值先可以用。
比如上面提到魔法弓咁，就要長弓有200熟練度先可以用，同樣，品質比較好嘅裝備，都可能會要求使用者達到某個熟練度先可以用。
我望完啲獎勵之後，觀察返周圍嘅環境，（點解好似次序有啲調轉咗咁），發現雷米都被傳送咗出嚟，同埋原來依到就係廢棄礦洞嘅出入口。
我望住面前嘅廢棄礦洞，突然百感交雜。
我唔知係寧風身體嘅情緒影響咗我，定點，但係對於要離開依個地方，我好似有啲唔捨得。
依個時候，腦海突然浮現咗一啲聲音，「我沒有為你傷春悲秋不配有憾事…」
「主人，」後面嘅雷米輕輕叫我，「咁我地宜家去邊好？」
「唔…」啱啱好似突然諗返起啲乜野，但係又比雷米打斷咗。屌，算數，拉返返正題，就咁睇，要去果個咩願望之泉似乎唔係易事，唔，咁應該點好？
我宜家25lv，都仲算係新手，以Online game嘅邏輯嚟講，新手通常第一步係要做啲乜呢？
唔，一入game，開新角、改名、揀種族、揀男女揀size揀聲優揀Blablabla…跟住就到新手教學，新手教學完咗之後，通常就會喺啲小村莊交下任，之後下一步就係，就係咩呢？就係去主城。
OK，冇錯，就係佢。「非常好，一於就去咗最近個城市先。」
……
正值中午，和煦嘅陽光喺頭頂照落嚟，微風不時飄過，輕掃道路兩旁嘅樹葉，樹幹帶住樹葉輕輕咁搖擺，好似喺到同我打緊招呼，我高舉雙手，伸個懶腰，依種原野嘅味道，我應該係冇點樣享受過。
雷米跟住我一齊行，佢睇落都好享受成個氛圍。
行行下嘅時候，我諗返起「閣下」，於是我開口問雷米：「係喎，頭先你冇入到嚟，咁你喺出面點樣？」
雷米：「唔，冇呀，咪等主人出嚟囉。跟住等等下就被個傳送陣傳走咗。」
「Sosad。係喎，咁你知唔知，有冇啲咩魔法係可以將魔獸變成一個人嘅形狀。」
雷米好認真咁係到諗，「唔，對唔住主人，依類特殊魔法我唔係好清楚，但係，有啲魔獸本身就可以變成人形。」
「欸！咁例如有啲咩魔獸？」我非常之感興趣，始終寧風本身嘅知識都偏向咗喺魔法、弓箭同野外生存方面，至於其他知識，尤其係魔獸同宜家成個世界嘅地理歷史政治軍事方面，就比較少涉獵到。
「魔獸有分9個階級，1係最低、9係最高，階級嘅高低同三樣野有關，一：稀有度、二：能力嘅成長程度，三：魔晶嘅品質。而大部分9階魔獸都可以變人形，好似我嘅天馬族，同埋龍族、鳳凰族等等，但係變成人形之後，就發揮唔到全部嘅實力。」
魔晶，全名魔力結晶，係所有魔獸嘅能量源，當魔獸死咗之後就會有機率掉落，品質愈高嘅魔晶可以造出更強嘅魔法武器。
「咦，等等先，咁姐係你都可以變人形？咁點解寧風之前都冇見過？」
「um，因為魔獸要變人形係起碼要成長期先得。」雷米好似有啲怕醜，講野果陣一直望住自己隻前腳。
哦，成長期，姐係魔獸又有分幾個階段，好似果套被選中嘅細路咁。
「咁你宜家係咩階段？」
「um，本身一路都係幼年期，但經過咗魔風狼王果戰之後，好似就變咗成長期。」
「！」唔怪得之雷米把聲好似啲少女咁，原來佢都只係細路女嚟。
「咁你宜家變唔變到人形？」
佢輕輕咁點頭，跟住又um，「um，應該可以，但我冇試過…」
「come on james，let’s try！」
「下…姐係咩意思？」睇嚟雷米並唔係果種要被我可憐嘅人。唔，獸？
「姐係叫你試下。」
「哦…唔好啦…」
「怕咩啫又冇人。」我望一望四周，依啲森林地方，正常人冇事都唔會入嚟。
「好啦咁…」佢講完之後，身體就開始發光，就好似啲乜q戰士變身咁。
佢身體嘅光慢慢咁變強，強到終於連有魔法使眼睛嘅我都冇辦法直視，於是我合埋雙眼。
到我再次打開雙眼，眼前嘅雷米已經變咗個不折不扣嘅少女。
人形嘅雷米大概160cm高，矮我宜家一個頭多啲，上下半身嘅比例十分好，而且佢本身都係雪白色，變咗人型反而有種白裡透紅嘅感覺。佢嘅毛髮就同本身一樣都係純白色，有種白髮魔女嘅感覺。所有野都唔錯，係除咗──佢係裸體冇著衫。
我啱啱一路望住佢，佢就夾住對腳扭扭擰擰咁。
「又唔使咁怕醜嘅，拿，著住先。」我喺背包求其拎咗啲衫出嚟，比佢笠住先。
但佢著咗件白色素衣之後，更加有果種白髮老不死嘅感覺，我將佢啲頭髮扎起，整咗條小馬尾，總算有返啲少女風。
「OK，趁我地仲喺冇乜人嘅地區，你習慣下人類啲表情同點行先。」
「係～」雷米回應。
……
我帶住人形嘅雷米重新出發，雖然一路上遇見唔少低中階魔獸，但大部分都被我依個生招牌嚇走，畢竟喺依十幾年間，比寧風同寧威食落肚嘅魔獸實在係多不勝數。
故此，一路上十分平靜。
就係咁，我順利喺依個世界度過第一日，天空開始變得昏暗，緣風林正式進入黑夜。
即使係咁，月光都係悄悄咁照入森林。
我同雷米搵咗個月光照射到嘅位置，雙雙坐起樹上歇息。
坐下坐下，過咗唔知幾耐，雷米就挨住我瞓著咗。
但可能我昏迷咗好耐嘅關係，我並唔眼瞓，只好挨喺樹幹到諗下野。
我諗下諗下諗到自己昏昏欲睡果陣，遠處傳嚟一陣嘈雜嘅聲音：「踏踏踏…」
依啲應該係…一大群生物移動嘅聲？究竟發生咗咩事？
我合埋眼聽一聽，係喺右邊傳過嚟，去唔去睇下好呢？
緣風林以我所知嘅資訊，最高階嘅魔獸只有5階，等級範圍係12～28lv，係一個適合20lv左右嘅人組團練功嘅地方。不過以野外地區嚟講，單獨行事始終有一定危險性，尤其宜家依種可能會一次遇到大量魔獸嘅情況。
「依層呢，就梗係要去喇～」我耳邊突然響起雷米嘅聲音。
「咦！你醒咗？」我嚇咗一跳。
「未醒又點同你講野呢，嚟啦，主人，一齊去睇下喇～」雷米攬住我隻手臂，一邊講一邊搖。
唔，點解我從未聽過魔獸有撒嬌依個技能？
「唉，冇你辦法。行啦。」我抱起雷米，「瞬！」然後使出瞬移。
以我宜家嘅能力，每次瞬移大約可以移動二、三十米。不過瞬移通常只可以帶多一個人，所以如果依度多個人嘅話可能我就要跑。
轉眼間，我同雷米已經去到五、六百米以外嘅地方。喺移動嘅途中，我發現果股萬馬奔騰嘅聲音已經消失咗，反而係響起咗好幾下「轟隆」聲。
「轟隆」聲響起冇耐，地面亦都跟住震動，之後再傳嚟嘅就係一片嚎叫聲。直覺話比我聽，有人係到戰鬥緊。
我一路不停咁移動，愈嚟愈接近聲音嘅源頭。
嚟到近處，果股震動終於停頓咗，我停落係一棵十幾米高嘅大樹上，依個視線啱啱好睇到面前嘅一片大空地。
空地正中心，有一個著住魔法袍嘅少年。
白色底色嘅魔法袍，用藍色物料勾畫出衣袍嘅條線，背面就印咗一個帝國標誌，睇落去第一個感覺就係啲乜乜學校嘅制服。
而果位少年正係比數量眾多嘅3階魔獸──灰狼圍繞著。
灰狼？灰狼正常唔係以森林為棲息地，點解會嚟咗依度？
雖然話灰狼嘅等級範圍得13～15，但是眼前嘅依個數量…起碼有七、八百隻以上。
而除咗活生生嘅灰狼外，地下仲有一大片屍體同戰利品，睇嚟係啱啱嘅震動造成。
我凝視戰場，昅一昅雙方嘅數據。
灰狼
狼族
群居性的魔獸，主要食用牲畜維生。
血 量：2775／2775
魔 力：605／605
等 級：15
物 攻：219
魔 攻：37
物 防：91
魔 防：32
天 賦：無
魔印屬性：無
推薦等級：15
掉落物品：狼皮
灰狼首領（小BOSS）
狼族
統領灰狼的首領，四爪較為尖銳，行動力因而提高。
血 量：48015／48015
魔 力：1133／1133
等 級：21
物 攻：465
魔 攻：67
物 防：？？？
魔 防：？？？
天 賦：尖銳利爪（敏捷增加20%）
魔印屬性：無
推薦等級：26
掉落物品：魔力結晶，銀戒指，狼皮，狼爪
千夜
人類
血 量：3822／4503
魔 力：？？？／？？？
等 級：？？？
物 攻：？？？
魔 攻：？？？
物 防：？？？
魔 防：？？？
天 賦：？？？
魔印屬性：土
同上次幽靈騎士一樣，通常喺魔獸發現自己之前，都係中立嘅綠色，但一旦被發現，就會變成敵對嘅紅色。而身為我契約魔獸嘅雷米，就長期都係友方嘅藍色。但人類之間嘅立場太複雜，數據通常都會被隱藏。
睇返數據，千夜有成4千5百血，仲多過裝咗神鍊嘅我，加埋佢用土系魔法，定位好有可能係喺坦克方面。
千夜大喝一聲，雙手嘅魔印發光，掌上同腳底有唔同嘅魔法陣係到轉動，數十根尖刺應聲從地面突出，形成大範圍攻擊。行得最前嘅一堆灰狼分別受到唔同程度嘅傷害，其中三、四十隻灰狼就此倒地不起。
依個地刺術係本系技能，啱啱嘅震動應該都係佢嘅魔法。
所謂本系技能，上次都有提過，姐係技能樹上面本身有嘅，無需要技能書或者特別傳授，只要符合等級呀、屬性呀、熟練度呀等各類條件就可以習得嘅魔法。
亦都因為咁，依啲本系魔法都比人研究透徹，記錄喺唔同嘅書籍入面。而寧風亦都係熟讀依啲書藉嘅人之一。
而且，本系技能有一個特性，就係喺出現嘅魔法陣入面，內圈會根據魔法嘅階級而平均分成數等份，就好似喺個圈入面切pizza咁。
基本系魔法大概分成四級：入門級、學徒級、專業級、魔導級，對應內圈嘅二等份、四等份、八等份同十六等份。
而本系以外嘅魔法，姐係擺喺LR4／5果啲，就唔係咁單調咁劃分，而係有各式各樣嘅形狀。
所以基本上，魔法使第一眼就區分到魔法係唔係本系，同埋大約嘅級別。
「主人，宜家點做好？」雷米發問，語氣聽落去佢有啲搞唔清狀況。
「唔使心急，睇定啲先。」
趁住地刺造成嘅空隙，千夜連續施法，幾塊大石從天而降，墜落喺千夜嘅身邊，形成一道保護牆，同時將最前方嘅灰狼壓扁。
石塊將千夜圍住，令灰狼冇辦法接近佢。
唔，條友都好似有幾下散手。
跟住，千夜又用咗一個魔法。
啱啱果幾塊大石慢慢咁融合，而且升高咗，變成咗一道無缺口嘅圍牆。
依個都係本系魔法，土流壁。
土流壁會由最頂端嘅地方不停向下流土，令外面嘅生物難以爬入裡面，而且流動嘅土會降低外來物嘅穿透力，變咗要打爛道牆並唔係咁易。依個魔法幾適合宜家嘅情況，因為有道牆就唔會比灰狼四面八方咁圍攻。
不過土流壁本身有個缺點，就係施法速度甚慢，但係千夜透過用碎石嚟增加土流壁嘅施展速度，令我開咗眼界。
見佢暫時安全，我就喺到計，啱啱地刺術係左右手都有，跟住嚟果陣有一招震動，跟住係碎石同土流壁，姐係話LR1～LR3依6個slot入面，佢最多得返一招未用過。
以佢嘅年齡嚟講應該同我差唔多lv，以廿幾lv嚟計，土系嘅技能樹應該都冇剩返啲咩大招可以用，不過宜家嘅情況，灰狼郁都郁唔到佢，佢嘅勝利只係時間嘅問題。
就咁睇，好似就嚟食完花生可以散場，但係我發現千夜係不斷咁放技，大石係咁飛落嚟，亦都經常有震動。
依個施法速度並唔尋常，唔係打持久戰果陣會用嘅速度。
因為你一次放太多技能，一下子失去太多魔力，對體力嘅消耗係十分大，如果以宜家必勝嘅局面根本係唔使咁做。
加埋依條友自己一個走入嚟緣風林而唔行官道，唯一嘅解釋就係，佢趕時間。
睇返戰場，千夜已經擊斃咗過百隻灰狼，掉落嘅貨幣同戰利品不停咁流向擊殺者。灰狼首領開始產生咗撤退嘅意慾。
依個時候，就係執雞嘅時候。「雷米，準備。」我拎把長弓同一支普通箭出嚟，諗起依次係我第一次拉弦，但係依靠寧風嘅身體記憶，問題並唔係好大。
雷米喺我隔黎準備魔法，手上嘅其中一個魔印發出咗光茫。
佢變咗人形之後，一個魔印依然喺頭部，另外兩個就變左喺手掌上，同人類一樣。
我心裡默唸個技能名，然後瞄準灰狼首領，靠住寧風嘅身體記憶，我大概感覺到我應該用咩角度射出。我一個深呼吸、然後放手，射出咗破甲箭（註１）。
與此同時，雷米都使出咗一個學徒級雷系魔法，雷元素喺半空急速匯聚。
我射出嘅箭劃破長空，射中咗灰狼首領嘅前腳，以我第一次射擊嚟講，算係唔錯。
灰狼首領因受傷而嚎叫咗一聲：「呀嗚！」與此同時，雷米嘅魔法──狂雷，正式發揮效用：一道雷電從天而降，落喺灰狼最集中之處，然後雷電好似光線咁，擴射至四方八面，擊傷一大群灰狼。
首領一時無法作出指揮，灰狼群開始混亂逃離。
喺依個空隙，我用瞬移閃咗去土流壁入面，同千夜講：「跟我走。」跟住我用手捉住佢手腕，再用瞬移帶佢逃離現場。
空地上就只剩低啱啱戰鬥留低嘅痕跡，一堆灰狼屍體，同埋潰不成軍嘅灰狼大隊。
───────────────────────────
備註：
１）
技能名稱：破甲箭
技能類別：弓系技能
技能屬性：無
技能效果：對敵方造成950（+0.2物攻）的物理傷害，無視35%防禦，有50%機率使對方物理防禦短暫降低35%，持續5秒或3次物理傷害。
冷卻時間：15秒（隨短弓／長弓熟練度增加而縮短）