[粵][RPG][粗口慎入]Gladys-迪詩娜之泉: Ch1. 甦醒
Ch1.
我恢復意識。
我開始郁動手腳,並且睜開雙眼。
但係望到嘅,並唔係平時熟悉嘅地方。
「依度係邊度…」我坐咗喺身,問自己。
我打量附近嘅環境,再望下自己啱啱瞓緊嘅地方,依度好明顯就係一個石洞。
我撫摸一下我啱啱瞓過嘅大石床,雖然話就話係一塊石頭,但係並唔係平時馬路上果種粗糙嘅碎石,而係明顯打磨過、比較平滑嘅大石。
石床嘅隔黎有一張石凳,兩塊石頭相映成趣。
我慢慢落床,想走去依個石房唯一嘅出口。
但係依個時候,有一個中年男人由果個空洞行咗入嚟。
「風兒,你醒咗啦?」果個男人望住我問。
佢嘅一句說話就好似一股衝擊波,令我腦袋一片混亂。「風…風兒!?我叫風兒!?」我腦海突然有一種撕裂嘅痛楚,令我冇辦法唔跪低撳住個頭。
「風兒,發生咩事!?」男人立刻跑去我身邊,察看我嘅情況。
風兒…風兒…唔係…我並唔係咩風兒…我嘅感覺話比我聽,我有一段遺忘咗嘅記憶,我好清楚我唔係佢口中嘅風兒,但係如果唔係風兒,我係邊個?
我愈諗,就好似愈接近果段記憶,但係愈接近,我頭就愈痛,痛到連世界都彷彿裂開,我大喝一聲:「呀!!我到底係邊個?」
「你咪寧風囉,風兒,到底發生咩事!?」男人見到我嘅情況亦都好緊張,佢嘅手上亮起咗一啲光芒。
「寧風…寧風?唔係…我唔係寧風…我到底係邊個…點解我會係到…」極度嘅痛楚令我依幾句說話係近乎咆哮咁嗌出嚟,但係即使我不停咁搜索自己嘅記憶,都係冇辦法搵得到答案。
「主人!」突然喺洞口附近傳嚟一把少女聲,我反射性咁望咗眼,係一隻有三隻角嘅白色生物。
然後,我條頸好似比人批咗一下,我就眼前一黑。
……
我嘅意識進入咗一個熟悉嘅地方,依度係一個屋企,係一個好細嘅單位,有個廁所,有個廚房,有間房。房入面放咗一張床,床上面有一隻羊毛公仔,好熟悉,係,就係依張床,我醒來之前就係瞓喺依張床上面。
咁到底點解,我會去咗果個石洞嘅地方?仲有寧風到底係邊個?
「!」當我問自己寧風係邊個嘅時候,一股記憶湧咗入嚟我嘅腦海,一段喺森林同石洞生活咗十五年嘅記憶。記憶開始喺我腦海快播,由啱啱開始被叫我做風兒嘅果個男人撿起、到遇到果隻白色生物、到喺石洞日復一日嘅生活、到打敗咗一隻外貌猙獰嘅狼型怪物。
依段就係寧風嘅記憶,咁我嘅記憶呢?我嘅記憶又去左邊?
喺我咁樣問自己嘅同時,一股力量將我由夢境拉扯返去現實,強行打開咗我嘅雙眼。
但其實,邊度先係夢境?邊度先至係現實呢?
我望一望,白色生物坐咗喺石凳之上,男人就喺石床附近不停踱步。
依隻白色生物叫雷米,係一隻三角天馬。
依個男人叫寧威,係寧風嘅師父,亦係一直養活寧風嘅人。
但係我呢?
我將我兩隻手拉去眼前,發現雙手非常之粗糙,而且有一個蝌蚪型嘅印記喺掌心。同埋最重要嘅一點係,我左掌上天生嘅黑痣,唔見咗。
依對唔係我對手,係寧風對手。
我又坐起身,準備落床。
依個時候雷米關心地問我:「主人你冇事喇?」
我苦笑回答:「我唔係你主人,我係唔知點解去咗寧風嘅身體,話說我幾高?」
我印象中我身高有180CM,但係唔知依個世界有冇CM依個概念。
「172公分。」寧威答道。
Oops,咁睇嚟喺依個世界,我仲未夠資格做_登仔。
「你講野嘅節奏同音頻,同風兒有少少唔同。」寧威講,「雖然唔明顯,但係,你應該真係唔係寧風。」
「我的確唔係。」我企喺身,望住寧威回應佢。
「咁你到底係邊個?」佢嘅聲線一剎那變得十分威嚴,同時,佢手掌上嘅魔印閃閃發光。
得到寧風記憶嘅我,知道寧威喺到準備緊魔法。
好不幸地,依度似乎唔係現實世界,而係一個有魔法嘅RPG世界,佢對付我係唔需要用武器。
「我都唔知,我失咗憶。」我老實咁講,雖然我覺得依個答案好難令人滿意。
「望住我雙眼,比機會你答多次。」寧威走近我,雙眼一直啤住我。
「對於我個名、身份嘅記憶,我完全諗唔起,我淨係知道,我本身唔係依個世界嘅人。」
「世界?」雷米發出疑問。
佢地竟然唔知「世界」依個詞語?我喺腦海尋找一個可以用來代替嘅字眼,未幾,比我搵到。
「Gladys,我唔係生存喺Gladys嘅人。」
Gladys,係依個世界上「世界」嘅代名詞。
聽罷,寧威手掌上嘅光消失咗,緩緩講道:「好可惜,依個人冇講大話。既然係咁,我更加冇理由阻止你離開依度。」
我諗起寧風記憶中同寧威嘅約定,只要打贏咗魔風狼王,寧威就會比寧風自己出去闖盪。
「唉,原本只係一個無聊嘅約定,估唔到竟然會令風兒一去不返。我係咪做錯咗?」寧威一邊走向洞口,一邊自責。
「絕對唔係。」我講。
寧威因為我依句說話,企咗喺原地。
「既然命運令我嚟到依度,一定有佢嘅安排,一定有我要去追尋嘅野喺到。而且,我繼承咗寧風嘅身體同記憶,寧風想做嘅事,我都一定會幫佢完成。」
寧威聽完,留低咗一句:「三日後,依度等。」就慢慢咁走出石室洞口。
依家石室入面就得返我同埋雷米,雷米走嚟我隔黎,我為咗同佢保持水平視線,就踎低咗。
雷米望住我,用佢果把少女聲音講:「主人…」
「對唔住呀,但係我唔係你主人。」佢有一身雪白嘅毛,令我忍唔住輕撫咗佢一下。
唔…好滑,好柔順。
我一路摸雷米個頭,發現佢耳仔豎起咗,好似好舒服咁,令我忍唔住繼續摸。
「主人以前又係鍾意咁樣摸我…」雷米嘀咕道。「但係自從佢知道咗關於佢家族嘅真相,佢就比仇恨蒙蔽咗佢自己。」
「除咗恭喜之外,我都唔知講咩好。」我唔知以我宜家依個身份,究竟可以點樣安慰佢。
「但無論你係邊個都好,你都仍然係我主人。」雷米望住我講。
唔,依句說話好似好合理,但又好似出咗少少問題咁…
「既然係咁,多多指教。」我伸出我嘅右手,第一次見女性要握手是常識吧。
佢用佢嘅「手」,唔…前腳?Anyways,我同雷米握咗「手」。
我翻閱寧風嘅記憶,應該已經再冇熟悉嘅人。
既然宜家解決咗寧風嘅人際關係,當務之急就係了解依個世界嘅設定。
我望住雷米眉頭一皺,出現咗佢嘅資訊:
雷米
天馬族
血 量:2484/2484
魔 力:4839/4839
等 級:22
物 攻:59
魔 攻:355
物 防:132
魔 防:114
天 賦:三角印記(魔印上限提升為三個,但無法轉換印記)
魔印屬性:光,火,雷
(佢天賦同屬性果欄並唔係文字,而係一啲圖案,但為咗方便,會全部以文字顯示)
屌你老母,望到依啲屬性,我第一個諗法就係,我根本就玩緊RPG。
我二話不說即刻望下自己。
寧風
人類
血 量:4173/4173
魔 力:3577/3577
等 級:25
物 攻:309
魔 攻:251
物 防:176
魔 防:131
天 賦:無
魔印屬性:空
就咁睇嚟,雷米比較偏向喺法師型,而且有三種魔法屬法,可以配搭非常多嘅組合。
而寧風同時有空間魔法同弓箭嘅修煉,物魔攻比例比較平均,體質亦都比法師型嘅雷米高,有少少拉打/游擊型嘅感覺。
咦,等等先,明明我淨係高雷米3lv,但係平均數值好似高佢好多咁嘅?
我即刻打開裝備欄,發現到有樣紫色裝備喺我身上。
神秘的 守護者項鍊
飾品-項鍊
屬於守護者的項鍊,隨守護者力量提升而增加能力。
已綁定
等級需求:1
生 命:300
魔 力:150
力 量:15
敏 捷:15
耐 力:15
韌 性:15
智 力:15
回 復:15
魔 抗:0
耐 久:975/999
重 量:50
根據Gladys,唔,都係用返依個世界算。根據依個世界嘅裝備標準,品質嘅排序係咁樣嘅:傳說的(橙)>神秘的(紫)>稀有的(紅)>珍貴的(金)>精緻的(藍)>優良的(綠)>普通的(黑)>破碎的(灰)
正所謂認色唔認字,打開機嘅朋友都知道,基本上玩Online Game果陣,隻Game入面嘅玩家都只係會藍裝、紫裝咁叫,係冇人會理佢個XX的係乜野嚟。
以我對RPG嘅觸感,通常3,40lv之前,都淨係會出到三、四個級別嘅裝,對應返依個世界,金裝喺40lv怪物之前應該已經算好稀有,因乜解究寧風竟然有件紫裝喺身?
我又用個腦回憶一下,原來係寧威喺寧風十五歲生日嘅時候送比佢。
但係我愈望依條鍊,就覺得愈奇怪。
「屬於守護者的項鍊,隨守護者力量提升而增加能力。」先唔理點解寧風係啲咩守護者,到底守護者係守護緊啲乜野?
跟住我腦海入面又浮現咗不久前寧風同魔風狼王嘅一戰。
……
「好啊好啊。這麼多年來我的同伴們一直遭受你們的『關注』。礙於『牠』的存在,我才不敢幹些甚麼。但現在你們倒送上門來了,這下我終於能為同伴報仇。」魔風狼王轉身跟少年說道。
「牠?誰是牠?」魔風狼王的說話引起了少年的好奇。
「哦?身為守護者卻不知道『牠』是誰嗎?」魔風狼王反問。
……
好明顯,依個石洞同依條鍊係大有來頭,連緣風林嘅Boss級怪物都唔夠膽直呼其名字,一定係佛_魔啲fd。
「好,等我一於喺到探索下。」好奇心勝於一切,好奇心能殺死貓。
既然要探索,首先,你要有充足嘅準備。
我好自然咁打開自己個袋,摷下寧風有啲咩裝備同物品。一打開,袋口就彈咗一條長方條出嚟,一格格就好似Online Game果啲背包欄咁,寧風啲野就放晒喺入面,就好似有藥呀弓呀箭呀同一堆戰利品咁,而且仲有3頁咁多。
喺我搜索嘅同時,雷米就同我講:「背包係可以無限量儲存物品,但係重量係有限制。」
咁姐係話格數係無限,唔似得啲Online Game咁得一頁,之後要擴充就要課金咁狗。
強迫症發作嘅我將寧風啲野稍為分好類之後,就行出石室。
依個時候,視線嘅左上角彈出咗一個透明框框,上面寫住:
廢棄礦洞
所 在:緣風林
所 屬:無
等級需求:1
進入限制:無限制
睇嚟當場景轉換嘅時候,就會有依個地方嘅基本資訊。
我行出石室之後,發現依度好似一個礦坑。
兩邊都係一條曲長嘅通道,因為係曲嘅關係,所以睇唔到出口,亦因此唔會有光傳入嚟。但係因為兩頭都插滿火把,所以唔會太過暗。
我瞓覺嘅石室附近仲有幾個石室,睇嚟就係平時寧風佢地生活嘅範圍。我望一望右邊,寧風嘅記憶話比我聽右邊係通向緣風林嘅出口;我再望一望左邊,並冇任何記憶。
「好,咁姐係依邊。」
「主人,等等,師父話過…」雷米睇嚟想阻止我。
「放心,去睇下有啲咩姐,帽事嘅。」我對雷米講。
雷米跟住我一直行果條曲長嘅通道,沿路上都係石牆同石牆同火把同石牆。
行咗將近五分鐘左右,都仲未到盡頭,依個時候,雷米問我:「主人,點解你唔用空間魔法嘅?」
呀屌,真係一言驚醒洛克人,差啲就唔記得咗我玩緊RPG。
我心念一動,攤開手板,兩隻手掌上嘅蝌蚪型印記亮起一股淡淡嘅光芒,依種光芒同施法果陣嘅光唔同,只係大約去到遠處嘅火把嘅強度,而施法嘅時候係好似用隻手揸住個電燈膽咁。
返回正題,兩隻手掌嘅印記上面,浮現咗幾格欄位出嚟,就類似RPG要Set F1、F2、F3技能,或者LOL入面啲QWER咁,我數一數,兩邊各有5個Slot。
為咗方便辨認,我姑且將左手5格叫做L1~L5,右手5格叫做R1~R5。
我用右手督一督L1果格,彈出咗一個空間魔法嘅技能樹,大概係咁:
![](http://i.imgur.com/wNila6Q.png)
驟眼睇,可以用嘅空間魔法基本上係4招。
我再督一督,發現L1~L3都係用嚟放技能樹上嘅技能(又稱本系技能),而L4同L5就係放啲另外自己學嘅技能,但遺憾嘅係寧風宜家暫時冇學過任何技。
寧風本身次元炸彈放喺LR2,次元轟炸放喺LR3,L1係傳送,R1係瞬移,LR45係吉嘅。
但係我望一望個Slot,LR3係暗啞色嘅,姐係話好可能係要處於極限狀態先至有機會用到,平時嘅我以lv嚟計係用唔到依招專業級技能。
所以我就將L1改做瞬移,R3改做傳送,加強返移動能力。
OK,調整完魔法技能之後,我拎咗兩把弓出嚟。
寧風本身背包已經有長、短弓各一。短弓適合喺森林依啲障礙物較多嘅地方使用,但射程較近。長弓威力大、射程遠,但係長度接近我嘅身高,喺森林狩獵用嘅話就會非常不便。
所以短弓係適合單挑、狩獵、或者騎射,長弓就適合用喺打仗或者團體戰,可以喺有掩護嘅情況下盡情輸出。
當我左右手各執一把弓嘅情況下,發現L1~L3同R1~R3下面都多咗3個Slot,係用嚟放弓系技能嘅,姑且叫佢做L6~L8同R6~R8,而L4~L5同R4~R5就移高咗,對返LR3同LR8嘅中間。
![](http://i.imgur.com/QaUoQy7.png)
我又督一督入去睇技能樹,發現低級嘅弓箭系技能比空間魔法更少,基本上寧風用到嘅係得兩招,連射同破甲箭。而且弓箭絕大部分情況下都係一手揸弓一手揸箭,所以裝一邊已經夠。
OK,技能就ready,係時候繼續起行。
我將短弓掛定係背脊,然後拖住雷米出發。
「瞬。」依個世界有技能依啲野,基本上係唔使自己儲氣或者點樣唸咒語,只要用技能果隻手郁一郁、再諗一諗招技,或者直頭戇鳩鳩咁叫出嚟就得。
喺我嗌咗「瞬」嘅果剎,我同雷米就閃咗去上一秒我望緊嘅地方。
跟住我放返開雷米,試下瞬去道牆度。
「瞬」一聲,我企咗喺道牆到,面向地面。
「哇屌!」由於道牆唔係好高,大概得兩米幾,接近地鐵果個高度,所以喺半秒之後,由於地心吸力嘅關係,我塊面已經非常接近地面。
「瞬瞬瞬瞬瞬!」為免仆街,我連續嗌咗幾個瞬,最後無事故站地。
喺啱啱嘅防仆街瞬移,我發現到瞬移大概有一個0.75秒左右嘅cd(冷卻時間)。
很好,一切準備就緒。
......
我帶住雷米瞬移,好快就去到通道嘅盡頭。
通道嘅盡頭係一道石門,而佢隔黎就有一柄拉桿。
我將雙手放喺拉桿上面,就彈出咗一個類似系統提示嘅框框。
「
提示:
警告,前方區域為副本區域,你必須滿足下列條件之一方可進入。
一、持有守護者的信物;或
二、等級50或以上、並且為組隊狀態(未達成)
模式:多人副本(推薦五人以上進入)
獎勵:守護者系列裝備、???的碎片、???
」
根據寧風嘅知識,副本規模有三種,單人副本,多人副本同大型副本。依點同Online Game都係十分相似,通常多人副本嘅怪物血量同防禦都係高好幾倍,而且boss嘅能力會有更明顯嘅增幅。同一個lv嘅怪物嘅大技,喺單人副本嘅時候可能只係扣你幾%、無關痛癢嘅血量;但係喺多人副本果陣,防禦力唔高嘅玩家,食一招就已經要退下戰線。而且依度雖然我一路話係RPG,但喺度死咗嘅話,係真係會死。
不過,既然我冇啦啦咁樣嚟咗依度,肯肯定會有主角光環嘅加持。
我思忖咗一陣,就將拉桿拉咗落去另一邊。
石門緩慢咁打開,我同雷米行咗入去之後,石門就突然好快咁刪埋咗。
「唔,老土野。」
我望一望前方,有左右兩條路揀。
兩條路都係好似獨木橋咁窄,兩邊都各有好幾隻巡邏嘅魔獸,而且條路大概只有1.5個人嘅闊度,而路嘅兩邊就係無底嘅深淵。
姐是話一唔小心,你就會差錯腳跌落去。
不過小弟係被選中嘅細佬,我有恃無恐咁拉住雷米行。
我求其揀咗行左邊果條路,慢慢接近第一個敵人,佢係一個全副盔甲嘅騎士,透過佢嘅面甲,可以發現到入面一定係冇人,有少少幽靈騎士咁嘅感覺。我望一望佢資訊,由於等差太大,除咗佢接近十萬嘅血量之外我乜都睇唔到。
我一手準備定瞬移魔法,一手拎住條守護者項鍊。
幽靈騎士一發現到我同雷米,佢頭上顯示嘅名稱,立刻由中立嘅綠色變成咗敵對嘅紅色,同時,佢舉起佢嘅長槍準備隊過嚟。
依個時候,我Show一Show我條守護者項鍊。
幽靈騎士望到我條鍊之後,就停止咗動作,由敵對嘅紅色變返綠色。
跟住,佢慢慢行返原位,又開始跟佢固定嘅路線巡邏。
冇錯,就係咁,Exact7ly!我就知道只要有條鍊就冇事,只有咁先可以解釋到,點解有條鍊就可以入副本,而無視任何lv差。
之後,我利用條鍊一直無視怪物咁前進,幾經兜轉之後終於嚟到迷宮嘅盡頭──第二道石門。
今次依道門並唔係玩拉桿機關嘅,係用推嘅。
而且,就算我將對手放上去,都冇任何提示出現。
帽事嘅,我就唔信係陷阱。我懷住咁樣嘅心情,雙手準備往前推。
喺依個時候,雷米驚叫咗一聲。「阿!係師父!」
我擰轉頭一望,寧威就企咗喺我同雷米面前。
「少年,你嘅探索只可以去到依度。」寧威用極度嚴肅嘅語氣講。
「如果我堅持要入去呢?」我笑笑口咁問寧威。
寧威冇直接答我,佢劃咗一個傳送陣,講:「你有兩條路揀,一、過嚟依個傳送陣,會送返你去緣風林;二、死。」