「侯裕文系列」（1）《向港女說不》----------口語文: 第十五章：死亡約會（二）

此時我到了附近的提款機把八百元提出，接著我沒有即時上回去，而是在樓下抽煙。我憤怒的原因不再是金錢方面問題，而是她的態度。正常情況下你明知同人出街食飯無理由唔帶錢出街？佢真係老奉要我請。就算係要我請都算，但都希望佢擺返幾張大紙係銀包入面做下樣喇！佢連這些門面功夫也懶得做，就知道她的誠意有限。感覺上她出來的目的只是為了這一頓飯。當我上返去之後，她又在我面前提及海蓉，但她們不是已經反左面咩？她對我說：「早幾日佢同佢阿頭去左我果度飲野。」
「咁跟住點？」
「佢阿頭抄我牌囉。」
「乜佢咁猴擒呀？」
一般來說，就算對對方有多大興趣也好，如果是第一次見面，我也不會急於抄牌。當然，由女方作主動又另作別論。
「佢呢幾日係咁打俾我，又話對我有feel，但我只係同佢見左一次面咋。」
我心想：「係就好喇，我甩難！」
但我還是說：「嘩，咁離譜？」
「佢仲同我講左好多野．．．等陣，電話響！」
她拿著電話跟我說：「又係佢！」




說罷，她接聽。但她的談話內容我沒有深入去聽，只知道果隻狗公想約佢今晚出去飲野。她收線後跟我說：「不如一陣約海蓉出黎飲野。」
「都好，我都想見下佢，始終好耐無見。」
當然，如果為左見海蓉我會樂意的，但我絕不想跟這件港女有下半場。
「我打俾佢，不如你叫埋你班朋友一齊出黎喇！」
「一陣，不過而家都得，我唸我地都食唔晒D野。」
未知她是否早已察覺不妥，所以想我叫埋其他人出來「分擔」一下？或是她不想單獨對著我？但無論如何，我也覺得有需要的。我致電聰明仔說：「我同家欣係尖沙咀食飯，你黎唔黎？」
「唔得呀，我而家仲係大陸。」
「大陸？咩事？」
「我朋友生日，佢叫我陪佢北上。唔講住喇，返黎香港先傾，拜拜。」
說罷，他已掛線。




接著，我致電史敬騰，他說：「喂。」
「今晚我約左家欣食飯，你出唔出？」
「幾時？有咩人？」
「而家已經食緊，得我同佢。」
「唔喇，我都話對呢D港女無興趣。」
「咁得喇，下星期再約。」
「無問題。」
說罷，他已掛線。接著我問家欣：「海蓉果邊點？」
「佢果邊開緊餐，你呢？」
「兩個都話唔得閒，算喇！我地自己食。」接著，三文魚和象拔蚌已送上，我們邊吃邊說著，她問：「我下個月去泰國，駛唔駛買手信俾你？」




「求其得架喇，我都唸唔到要咩。」
而事實上我仍然盤算著，下次仲有機會見面先算喇！
「咁我求其買D野食返黎就得喇！」
「我無所謂。」
接著，當她提及到去旅行的時候，我的回應也只是敷衍了事，像是對她抗議似的。
吃過刺身後，當火煱送上來的時候，接下來的，就是她玩電話的時間，而我亦開始咀嚼那些放在煱裡的蟹柳和墨魚丸。期間也不時問她吃不吃火煱，但她很像只對眼前的智能手機有興趣。「佢阿頭成日煩住我，問我得唔得閒同佢聯絡感情？我同佢唔係好熟咋！」
「咁癲？擺明要食左你咁喎。」
「唔講你唔知咋，果晚同佢第一次見面佢就問我爆唔爆房？我同海蓉講返佢都話盡量同佢保持距離喎。」
「呢D人小心D好。」但我心裡卻有另一個答案，既然佢明知要同這些人保持距離，好心就唔好show佢喇！接著，我們輪流上了洗手間。當她在洗手間內的時候，我已經舉手高呼：「埋單！」（續）