【特工】《虔誠者》: ──古時‧拯救篇──(144)
「夏林～咁耐無見，仲帶埋個外人番嚟～？」一個疑似其伯父的人物喝著紅茶說。
不過夏林她的這位伯父看起上來身材肥腫，又有點禿髮，是一副標準的英國銀行家模樣，怎會是殺手？實在很難想像他會帶住如此笨重的身軀去殺人。
「係啊伯父～帶咗個朋友番嚟，吹啊？」夏林如回答，想不到他真的是夏林的伯父。
「咁又諗住幾時離家出走～？」他的伯父繼續問。
「你再嘈下次就打劫你間銀行！」夏林指住他，面色狠毒地說：「開埋你個安全庫！」
「～你認真？」他的伯父一聽到這番說話，就面帶難色。
「哈哈～講笑。」夏林微微一笑，也讓人看不出說話是真是假。
他們一家就坐在這寬闊的飯廳中，等候著早餐的到來。稍為認真看一下，就發現到長桌座位的順序是按照年齡即應該是輩份去排坐，家族的當家應該是坐在長桌的最端處，打後左右兩側的便是伯、叔、姑、舅、姨、姆 、兄、妹，到最後便是那伙跟我坐在同一列的孩子。
有趣的是，他們不像傲家一樣對我趕盡殺絕，反而見到我這位由夏林帶來的陌生人，只稍為看了一眼就繼續專注自己的事，或是像夏林的兄長古春花一般直接無視我，令我多少也有點感覺自己像做了下人一樣尷尬。
「哈哈哈──」對面一位穿得精靈又得體的小男孩，拿著一個精緻的外國洋娃娃不斷地揭開它的裙底。
「比番我吖──」另一個坐在他旁邊的可愛小女孩則搖住他肩膊。
「二叔，你幾時同R&H間公司內幕交易～有價證劵升咗好多。」剛才喝著紅茶的伯父說。
「上星期嘅事～我已經搵人幫我槓桿收購佢期下子公司，你盡快沽空佢。」那面形瘦削的二叔說。
坐在長桌約莫中中、中下位置的老年婦人說：「上個月會展個粒「海瑪之星」的確好靚…珠寶同手工都係上盛，真係好想再望一眼。」
「我識得義大利一個設計師Marco Dal Maso。姨婆，我要唔要約佢？」另一位花容月貌的女婦人道。
「下午我有個job，叫三哥夜晚唔洗預我去木球會。」戴住單眼鏡片的男人，望一望手腕上的名錶微笑道。
夏林的家族還真熱烈，二十多個人住在了這裡，難怪要住這麼大間屋子，餐桌亦要那麼寬長，不過仍然有幾個位子是空住的，我想還有幾個人未到吧？
「咳～幾時上餐？」那夏林的伯父望一望錶，說：「我差唔多要返公司。」
「我哋好快會上餐。」一位看上十分幹練的老管家禮貌地道。
「大老爺呢？仲有當家呢，佢哋去咗邊？」伯父又問。
「佢哋陪大少爺、少奶，去咗附近嘅浸信會福音堂。」管家語速不慢不快地回答，令人聽著舒坦。
「啍～如果上帝每星期幫我賺到幾億百萬，我每星期幫佢舔鞋底又點話。」語出驚人的伯父好像等得不耐煩，就站起來先行離開：「我返公司先，你哋慢慢食。」
「夏林…你家族真係好熱鬧……」我細聲地在她的耳邊悄悄說。
「你知唔知點解我年輕個陣要離家出走？原因之一，好撚柒嘈。」夏林又向我耳邊低聲說。
「夏林，你朋友？」注意到我們交頭接耳的一位老太太以仁慈的微笑姿態望住我們。
「無錯吖…婆婆……」夏林啞然地答。
「咁就好。」婆婆微笑，不再多問。
「你家人唔會好奇你帶咩人返嚟咩…？」我繼續低聲問。
「唔會…佢哋秒秒幾千萬上落，先唔得閒理我帶咩人返屋企……」夏林答。
「你伯父唔似係一個殺手…」
「我哋係殺手家族姐…唔代表個個都係殺手……我個位伯父喺白道上面係一個銀行家、投資公司總裁同國際企業家，但喺黑道下面係一個包攬所有犯罪生意嘅大亨，高檔汽車走私、軍火交易、殺人買賣、稀有動物皮毛、人口走私、仿工藝品、藥物仲有毒品，樣樣做齊。」
「……」真想不到，剛才那位微禿的臃腫「肥佬」會是個犯罪帝王。
「喺墨西哥同美國佢有自己嘅私人傭兵軍隊，係佢嘅犯罪帝國。」夏林補充一點。
「咁我都離開下先。」那位二叔也隨伯父一同離去。
「佢呢……依個瘦骨精就係獨攬唔少賭場生意嘅地下賭王，你喺澳門至到拉斯維加斯都會見到佢身影嫁啦。」夏林少聲地指住她二叔說，使得我們十分像說人是非一般。
「好餓吖～！今日等咁耐嘅！？」剛才揭洋娃娃裙底的那位小男孩一手握住叉子一手握住碗匙打著桌子。
「小少爺請耐心等候，因為十少爺嚟緊。」管家立即慰問的說。
「啍！個嗰坐輪椅嘅有咩咁巴閉喎……好餓啊…嗚嗚……」小男孩雙眼開始水汪汪的，想要哭出來。
「邊個話我唔巴閉啊？哈哈…」隨住聲音到來的，是一個坐住輪椅的少年，看上去還年輕而且相貌秀逸，不過似是行動不便。
「為咗你！我哋等好耐呀！」小男孩走過去指住他說。
「依家咪有得食囉～？」這位叫十少爺的少年撫按他的頭，然後抬頭望向了夏林：「夏林姐姐……好耐無見。」
「喂！好耐無見。」夏林望住他，淺淺一笑。
終於，廚房那邊開始一車一人的送過來，打開鐵蓋之後更是熱騰騰得冒著白煙出來，香氣十分誘人，特別是牛排與牛油同時在鐵板散發著「滋滋滋──」的聲音時，酷如一首美妙的交響樂。
一碟一碟的早餐被捧上長桌上，原本只有橙汁、咖啡、紅茶等飲料的空虛桌子，轉眼間就變得多姿多彩，包括香煎牛油嫩牛排、奶油吐司、香草炒滑蛋、芝士千層麵、西班牙海鮮油麵、公司三文治、軟芝士三文魚蘑茹吐司、德式肉腸、生煎包、手製雞蛋火腿煙肉堡。