【特工】《虔誠者》: ──傲家婚約‧牽絆篇──(76)

「好緊張？」

「唔…」我點頭。

「咁係必然…話哂都係傲家族，你可以有命番出嚟嘅機率根本唔夠一半。」西方狐狸點起一根香煙，把手按住上額無奈地說：「剛才你應該感覺到赤曲好嬲？在座佢最唔想死嘅人就係你，所以佢都特登送你去「忍部門」受訓。」

「我明白……不過，我真係唔想…明知至少會有一半成員戰死…都要去繼續執行依一個任務，或者用一人嘅力量去換取目的，係最好嘅選擇。」

「百毒小時…戰爭本來就係無奈，如果有更完美嘅方案，赤曲佢都唔會想動用總動員去依一場戰役，但人少嘅話行刺者嘅責任就越大，矛盾就在於……可以最完美擔任行刺者無聲無色殺人嘅角色，就係你。」西方狐狸吐了一口雲煙出來，說：「佢選擇咗前者。」





「我冇諗到咁深入……」

「你諗得到咁深入，就唔會有赤曲。」西方狐狸繼續解釋整個局勢，及赤曲的心態：「所以依場戰役可以話係孤注一擲嘅同歸於盡，一係就唔做，一做就……就要做到盡令敵人勢力都面臨瓦解崩潰局面，所以先要順便殺害咁多重要人物，簡單啲嚟講……佢哋只不過係陪死，一切都係為咗令敵人元氣更傷，咁之後就唔會輕易攻得入同樣因為依場戰役而元氣大傷嘅我哋。」

「赤曲佢想加快成個推翻特工部嘅進程？」

「無錯，你可以好明顯睇得出，所以今次佢預咗會賭落好大量嘅性命嚟做注碼。」

「嗄……同過往任務一樣…我永遠唔會接觸到佢最深層想法到底係點……」我嘆了一口氣：「你真係勁，居然睇得咁清。」





「只係接觸得佢多，明白佢最表層嘅想法。」

「最…表層？」

「點樣講好呢……」西方狐狸摸擦著下腮，說：「我永遠猜摸唔到赤曲佢最深入嘅想法係點，永遠你覺得自己好似終於接近到佢……到頭嚟…你先發現自己同佢仲差一大段距離，就好似一個平民望住高石上嘅帝王一樣……佢內心最深層嘅諗法係禁忌，亦都唔會容許你接近。」

「…」

「哈～」西方狐狸悶笑一聲：「其實我唔應該咁該講，廢事犯咗亂軍心罪，我都係隨口up下～」





「其實…我同你都有同一種諗法，有時會諗到底虔唔虔誠於佢好……明知對自己無利，都要繼續依佢所講去辦？但係特工部我哋已經叛變咗，再無得叛變埋赤兵隊…所以我哋接收到赤曲命令就只可以去執行，否則連赤兵隊都拋棄埋自己……就會連最後可以生存依靠嘅地方都冇，大概係依一種諗法。」

「帝王嘅風範…」西方狐狸默默唸道，然後轉為笑臉：「唔好再講陰謀論，我哋已經無時間去質疑自己團長，不如諗下點混入去傲家宴會仲好……老實講，男扮女裝係可以，不過入到會場你總要同人傾計，同時你真聲敗露就死。」

「咁我應該……？」

「入去之後再變裝。」西方狐狸輕笑著，說：「有冇曾經聽聞過香港一位特工？排行第五位，外號叫「百變行者」嘅特工。佢係暗殺上流社會人物最Top嘅特工，永遠只會以假面會人，從來冇人見過佢真樣。」

「有。」香港排行頭十之內的特工，沒有行內的人沒聽過他們的名字吧。

「所以你可以入到去再偽裝成另一個人，不斷用偽裝嚟逃脫。」

「但係在場嘅秘密特工應該會留意可疑嘅人，發現生臉孔就應該會截住我。」

「無錯，所以你要模仿會場內嘅人，將自己變成本尊。」





「……好高難道，再講輪廓要夾都好難。」

「我反而諗到個方法。」西狐狸狡笑一聲，把自己的全盤計話吐出：「當日毫無疑問會有好多知名樂隊出席宴會表演助慶，中西樂隊乜嘢類型都有，因為聽聞當日傲家嘅新娘係一個好年輕嘅女仔……所以我哋就可以趁機會混入一隊樂隊做成員，整暈樂隊其中一個本尊，之後即場提意其餘成員帶頭套或者口罩演出，點樣說服佢哋係你嘅事，之後就用佢嘅身份嚟達致暗殺目的。」

「或者…直接用人皮面具，事先綁走要偽裝嘅人。」我說。

「都得……咁，傲家婚宴依一場暗殺行動就交俾你，下個月到「忍部屋」之後，要好好學習。」西方狐狸給我最後忠告：「將自身價值發散到最大效用，唔好令赤曲失望。」

「嗯。」