【維吉爾傳-I】《維吉爾，四月是你的謊言？》: 四月二十四日---完美人生

 早上
 

 
https://www.youtube.com/watch?v=tvJ1hWljCg0

下車後，在走往新濠影滙的途中，我如常在Whatsapp上致電給藹晴，這個「Morning call」已成了我們每天必做的甜蜜舉動。




 
「嘟嘟...」
 
「嘟嘟...」
 
「呼...」：被電話喚醒的藹晴發出懶洋洋的呼氣聲。
 
「藹晴豬，肯起身未啊?」：我溫柔地哄道
 
「唔制啊，好攰啊...」：藹晴無力地說道




 
「其實次次我打比你你都係照攤起床上，收左聲你就訓番，咁我打黎做咩呢?」：我有氣無力地笑說
 
「比我嗲你一陣囉... 我中意啊!」藹晴嬌嗔道：「一陣我會起身食早餐架啦」
 
「其實上次我去住我對面果個健康專家屋企食飯，佢同我講左好多早餐唔應該食既話野」我回憶道：「佢講到其實麥皮、米粉、河粉果啲睇落好清淡好健康咁既早餐一啲都唔健康，果到全部都係Carbohydrates, 落左肚就全部變glucose，所以姐係你岩岩一起身就要將身體器官工作量開到最大黎分解啲糖份」
 
我續道：「佢又舉例喎，如果早餐食一兜麥皮、一隻蕃薯同半隻香蕉做早餐既話，聽落好似好fresh好健康，但其實就等於晨早就直接食左24粒方糖落肚!佢有個fd作息定時，唔煙唔酒，飲食清淡，仲朝朝晨運，咁健康都係高膽固純高血糖，就係因為日日晨運完番屋企食兩碗麥皮!」
 
我說的同時，看到前方馬路沒有車，便一時貪圖方便闖了個紅燈來橫過馬路...




 
電話另一邊的藹晴生氣道：「咁個健康專家有冇教你唔好衝紅燈啊?!」
 
「哇，咁都聽到?!」她居然那麼留心，聽到我這邊正響著紅燈的聲音。
 
「成日都咁!唔比衝紅燈啊!」：藹晴怒嗔道
 
「係啦係啦，我番到公司啦，今晚早啲番黎同你Video call好冇?」：我哄道
 
「好啦...」藹晴溫柔道：「加油，番工比心機啊」
 
「嗯」我一定會努力賺錢，把你這香港女生娶過來。
 
......
 




有了藹晴的打氣，我今天充滿幹勁地工作，時間很快便到了七點，我坐上巴士後，我的電話震動起來，是阿朗致電給我...
 
「喂，Vergil哥，阿豪去左香港交流幾個月，今日返黎啦，仲有個香港過黎既交流既男青年，你代表我地象徵式咁去接下佢地啦!」：阿朗笑說
 
「根架你?你地起教會近咁多都唔去接?我岩岩放工喳仲起氹仔...」：我嘆道
(注：氹仔島與澳門外港碼頭中間有海相隔，連接氹仔島和港澳碼頭的跨海大橋總長度為西區海底隧道的2.5倍有多)
 
「維哥你去啦，我、阿添同阿琴起教會要準備game’s night啊!拿你去接佢地跟住帶佢地返黎玩就岩架啦」：阿朗說
 
說到底，你還是想跟你的「女神」多待一會兒，不願意離她罷了。
 
......
 
於是我無奈地在下一站下了車，轉乘另一輛巴士前往港澳碼頭。吃醋的小藹晴沿途不斷在Whatsapp上向我撒嬌...
 




「維吉爾返屋企未啊?[紅心]」：Valentina
 
「突然比教會班友叫我去碼頭接人啊[破涕為笑]，有香港果邊啲青年過黎交流[太陽表情]」：我回覆
 
「喂啊!你去接邊個啊?!」：Valentina
 
我雖知自己是去接阿豪和另一位男青年，但我還是戲弄藹晴，說：「剩係知香港人囉，可能係女仔掛[托腮表情]」
 
「唔得啊!你有藹晴啦[不屑表情]!仲去接咩女仔啊?!」：Valentina
 
「我奉旨接佢地番黎架喳，我都唔知邊個黎，當識下新朋友囉[墨鏡表情]」：我回覆
 
藹晴傳來一段語音，可憐地嗔道：「唔制啊！維吉爾都有藹晴啦，仲去接咩女仔喎...」
 
呵呵，她向我撒嬌時真的好惹人憐愛，吃醋的女孩最可愛了。




 
我笑著回覆：「講下笑姐，我去接阿豪喳」
 
「而家好好玩咩？！[不屑表情]，」 藹晴回覆：「要咩人接喎?咁阿豪唔識自己番黎架？[哭泣表情]」
 
「我去碼頭接下佢啊嘛，咁佢黎到澳門，我地一個人都唔派去接佢既話好衰既」：我回覆
 
「我要獨佔維吉爾啊[不屑表情]，唔同人分享!」：藹晴嗔道
 
我深情地哄道：「藹晴，我起港澳碼頭接過無數個從香港過黎交流既青年入黎，但你先係我最想起碼頭接既女仔...」
 
「都唔知邊句真邊句假...[害羞表情]」：Valentina
 
......
 




戲弄了藹晴，再費盡唇舌哄了她一輪後，巴士也抵達了港澳碼頭...
 
「唔該司機」
 
故地重遊，一週前我越洋去找藹晴的勇氣、孤單旅人的空虛等多種感情一下子又湧上心頭，剎那間情感湧現，現在靜靜地凝望著這碼頭的大門，我可謂感觸良多...
 
上一次是我獨自前去她的城市，但現在，我更期望下次是藹晴來到這裡，然後我們在這裡團聚，我牽著她的手帶她暢遊這座中西交融、充滿藝術色彩、瑰麗美比的古城。


 
走進碼頭，等了幾分鐘後，金髮藍眼的英國青年阿豪和和另一位眉清目秀的香港青年便從閘口中走出來，來到抵境大堂。
(注：阿豪在現實世界中並非紫琴的親弟弟，他們是一起當過義工一段時間，頗為相熟的朋友)

阿豪一眼便認出了我，他帶著那位男青年來到面前，看著我身穿的「You'll never walk alone」紅色印字T裇，對著我大笑地唱道：「You'll always walk alone! Unbelieva poor! You'll always walk alone! Unbelieva poor!」
(注：我身穿的是利物浦隊Liverpool的T裇，口號為「You'll never walk alone」)
 
阿豪作為一名土生土長的英國人，他有自己支持的球隊，利物浦是他極不喜歡的一支球隊，他也不是第一次取笑我這件衣服了。分別了數月，我和阿豪都不禁感慨地擁抱對方。
 
「Brother Vergil啊可?」那同行的男青年微笑著，友善地對我說：「我叫Davin，起香港過黎交流幾個月，多多指教」
 
「叫Vergil得啦」我笑著對Davin說：「黎親呢到交流既男女青年都唔捨得走，包你一定歡喜!」
 
我禮貌地盡地主之誼，替Davin的拖行李箱，以及替初來乍到，身上沒有半塊澳門幣的他付過巴士的車資，我們一行三人便快樂地乘車前往教會參加歡樂的遊戲之夜。
 
阿豪在香港交流了數月，一段時間沒見的我們都急不及待地跟對方分享這幾個月來的事...
 
「So how's your bird?」：阿豪笑問道
(你女朋友點啊? 注：有些英國人慣常用「bird」表示女友)
 
「咪又係咁，剩係可以video call......」：我跟阿豪說了一下自己與藹晴熱戀中的事，他對我的戀愛生活十分感興趣。
 
「你好方便啦!我之前啊為左去探個女朋友呢，要起屋企到搭火車到Cambridge，廿幾磅一次，好spring貴啊!起火車到呆坐一個幾鐘啊，冇錢果陣就要搭啲窮人大巴坐到London再坐其他車，坐五六個鐘，坐到人都根啊!」：阿豪笑道
 
「You are 根!我由屋企去大埔啊，要坐巴士，坐船，再搭地鐵啊!......」：我反駁道
 
Davin聽著我們的對話只是笑著而不作評論，說著說著，我們也回到教會了。我帶著他們走到地下的文化廳，阿添和其他男青年看到阿豪都過來跟他敍舊，遊戲之夜的氣氛也一下子變得熱鬧高興起來。
 
在我們敍舊時，為人一向友善的阿琴也走上前主動歡迎新來交流的Davin…
 
紫琴與Davin握手，微笑說：「你係黎交流架可?我係義工組其中一個女青年」
 
「多...多指教，我叫...Davin」：與剛才在碼頭對著我時那自然的語氣成了鮮明的對比，Davin對紫琴說話時既生硬又緊張。
 
紫琴禮貌、溫柔地說：「你可以叫我Luey...」
 
琴兒這甜美動聽的聲音一瞬間使毫無準備的Davin心蕩神搖，神魂癲倒。情竇初開的Davin在琴兒那醉人的薰衣草香包圍下，徹底迷失在她那水靈靈的雙瞳中。Davin那陶醉的眼神將自己迎來人生春天的興奮心情表露無遺，他那怦然的心跳聲是他無可否認的罪證。他...戀愛了。
 
站在文化廳角落的我笑看著他，浪漫地對阿豪唱道：「如痴!如醉!」
 
阿豪看著這對男女，用他那引人發笑的國語說：「一開屎叫我奶澳門交流的屎後呢，其屎我是...豬絕的!」
 
「你不能叫我奶我焦馬上奶嘛!我不想奶了以後就加很多特效，幫那些歐門的女生化很多妝，那些義工組的女生動啊，很白、很漂亮，奶焦流的鄉港男青一看倒Luey就『動L~』!」
 
「結果鄉港的懶青年出奶一定媽禾：『根本米有這種歐門焦流!這屎假的!』所以禾就說：『你先妓Davin屎一剎』」
 
「後奶經過也枝倒紙錢(紫琴)的成份是...素顏的，米有啦種化學程糞!現在Davin奶焦流以後起媽很舒苦!他米天都孩齋奶!大家看，這個就屎他奶後的洋子，禾邀妓關眾看到，Davin奶挽以後屎這個洋子，你們奶挽以後也是這個洋子!」：阿豪誇張地說
 
我被阿豪的台詞逗得棒腹大笑，說：「頂!你去香港幾個月就係學呢啲野啊?!」
 
......
 
笑完一輪以後，我們開始遊戲之夜，有的人玩桌上、卡牌遊戲，有的人打羽毛球和籃球，我、阿朗和阿豪三人老對手重逢，再加上Phelba四人在乒乓球桌上激烈地競技了一輪後，我便坐在琴前休息一下，彈奏一曲...
 
阿豪坐下來笑說：「你上次話個online story寫左啲gang既野，ruin左個story，少左好多readers，而家點啊?」
 
「哦!差唔多半年前啦，果個故事一早寫完啦，而家寫緊個新架啦已經」：我笑道
 
「起，佢啲淫賤野你唔知架啦！」：阿朗對阿豪笑說
 
他取過我的手機，說：「寫曉琳同Franz個故寫成點啊？比哥哥幫你過下眼！」
(注：現實世界中阿朗和阿豪兩人都認識曉琳和Franz)
 
「哇！讓理智在叫著冷靜冷靜，還恃住年少氣盛，」阿朗陶醉地演繹：「Luey！哮喘藥呢？！」
 
在另一邊跟其他人玩著大富翁的紫琴聽到自己的英文名後轉過頭來，疑惑地看著我們，問道：「叫我啊?」
 
「冇野啊冇野啊」：阿豪笑說
 
我拍了阿朗的頭一下，緊張地說：「頂你!自high都注意下音量啦!」
 
他像是沒把我的話聽進耳朵一樣，繼續笑著裝出曉琳的語氣，嬌嗲地說：「你而家...都咩...啦，仲叫我Luey?」
 
阿朗再用雄厚而深情的聲線說：「曉琳...」
 
然後他再裝成曉琳，害羞、嬌嗲地說：「我中意...中意你咁叫我啊」
 
阿豪被逗得大笑，阿朗自己也捧腹大笑說：「正啊!呢個琳琳好掂啊!簡直勾起所有男人淫賤既慾望!起葡萄牙讀U既曉琳妹妹應該都讀書讀到好悶，得我send呢啲比佢睇下先...」
 
「你都真係傻既!」我立即驚慌地按著他的手，以免悲劇發生。
 
「咁跟住呢?冇啦?攬住訓，姐係有冇做先?」阿朗繼續看著我的手機上的文稿說：「拿，男女之間既感情細節你係寫得淫賤，但仲未夠!可以再淫賤啲!」
 
「你都傻既!無糖故，做你個頭!」我胸有成竹地說：「果到都未到戲玉，淫賤...頂，I mean感情...感情就唔係剩係靠做愛表達出黎咁膚淺架!」
 
我把雙手放在琴上，奏起「無人之境」一曲，將心神投入故事男主角的世界中，深情地向他們說道：「『讓我對著衝動背著宿命，渾忘自己的姓...』 年少氣盛、血氣方剛既Franz面對住同自己同曉琳兩小無猜，十幾年來累積既感情，一發不可收拾，一夜間渾忘自己表哥既身份，同曉琳衝破倫理既界限，同佢轟烈地展開一段禁忌之戀！」
 
「『若世界陷進大騙局裡面，朋友亦難以發現...』連家人都唔知，騙過成個世界所有人既背德之戀；『共你隔著空在秘密通電，挑戰道德底線…』老豆阿媽都唔知，但佢地同枱食飯果陣就深情對望電一電對方，曉琳仲要起枱底撩一撩Franz隻腳!完美演繹出一段兄妹間，挑戰道德既戀愛!」：我續道
 
「咦，黃偉文首寫得咁好既歌詞居然比你用黎寫埋哂亂倫故，真係...」：阿朗說
 
「頂你啦!呢啲係對作詞人既致敬啊!呢個故事岩岩好符合首歌既意境，將佢一首寫得咁入肉既歌詞中既感情完全展露出黎!故事最後既完結更加係呼應番佢句『浪漫到一起惹絕症...』，真係好凄美啊!」
 
「得啦得啦，亂倫維!」：阿朗笑說
 
他們繼續在乒乓球桌上廝殺。我的電話震動了兩下了，是我那遠在大埔的愛人在Whatsapp上傳了一張照片過來...
 
照片中的是一個寫滿了字的白色手機殼，殼面上寫滿了「波波」、「星瑤」等我對藹晴的稱呼，全都是藹晴親手寫的，看來她在家中真的沒事做...
 
「做咩無啦啦搞到個I-phone殼咁啊傻妹?」：我笑著回覆
 
藹晴含情脈脈地回覆：「紙製摩天輪係你既，波波係你既，星瑤係你既，Valentina係你既...」
 
我打斷她的話，回覆：「哇，有咁多啊?咁我唔洗要藹晴啦」
 
「喂啊!咩啊![哭泣表情][哭泣表情]，唔得啊[哭泣表情]」：Valentina焦急地回覆
 
「藹晴都係你既，好冇?[難堪表情]」：Valentina
 
我看著撒嬌的她會心一笑，回覆：「傻妹，最重要係藹晴啊，我梗係要啦」
 
「嘻嘻，咁In exchange呢，樓主係我既，Vergil係我既，維吉爾都係我既，好冇?[害羞表情]」
 
「你中意啦，傻豬，個心都起你到啦」：我笑著回覆
 
「維吉爾起邊啊?返屋企未?[紅心]」：Valentina
 
「起教會同人玩緊遊戲啊，就快完架啦[墨鏡表情]」：我回覆
 
「可惡的維吉爾[不屑表情]!起出面有得就唔理藹晴[哭泣表情]」：Valentina
 
結果剩餘的時間我都沒有上場競技，全程都是在哄那撒嬌的小藹晴...
 
......
 
一整晚的活動中，大家都玩得十分盡興。活動結束，大家準備離開時，英俊的主教突然帶著他的妻子和小女兒光臨文化廳，一眾男女青年都十分驚奇，立即衝去逗主教那四歲大的小女兒...
 
主教笑著摸了摸女兒的頭讓她安心後，轉過身來對我們說：「Phelba、阿朗、阿添、阿豪、Davin、Luey、Vergil ，七個青年領袖過一過黎」
 
「提一提你地，全港青年義工領袖訓練會，後日，4月26號，星期二晚，夜晚八點半，紅磡教堂，我唔會帶你地去架啦，咁多個香港人起到，自己識搵路啦，有冇問題?」：主教說話從來開門見山，言簡意賅。
 
「冇問題」：我們同聲答道
 
「今晚既活動十分開心，臨走前大家一齊影幅大合照好冇?」：阿朗喊道
 
大家都爭著站在主教那可愛的小女兒旁邊，氣氛非常和諧融洽。阿豪看著那集萬千寵愛的小女孩，衷心地微笑說：「主教好靚仔，妻子又靚女，生出黎個女咁靚，好美好既家庭。」
 
阿豪看了看我的臉，讚道：「just like 你同Valentina都會係啊」
 
我伸手搭著阿豪的肩膀，會心一笑。他所說的的確就是我心中所希望的，論人生目標，我不求創什麼鴻圖偉業、登峰造極，亦不求功成名就，為世人讚頌，我一生人最大的夢想就是能與自己心愛之人一同建立一個幸福美滿的家庭。
 
「望鏡頭!1...2...3，笑!」
 
大家都快樂地看著鏡頭，我也搭著阿豪、阿朗和阿添，衷心地笑出來...
 
我從內心最深處為我現在所擁有的一切感到真正的快樂，我的父母尚在，一家人住在澳門南區這幽靜的小城區內，生活舒適；我有一份穩定的工作，工餘時在網上寫作，獲得了一小群讀者的追棒；我是一名青年，身邊有很多良好的青年朋友與我共享這極具意義的義工生涯；我還有一位可愛的情人，雖與我身處不同的城市，但我們每天仍甜蜜到不行...
 
我在家庭、工作、興趣、朋友和愛情等各方面中都樂在其中，我覺得自己現在的人生簡直完美得不能再好了。
 
看著窗外那通往香港的海，我在想著我那光明的前途...
 
我在心中默念，自己要好好愛惜藹晴。在我的價值觀中，男人在任何方面上的成功都無法彌補他在婚姻或家庭上的失敗，婚前愛護配偶，婚後對其絕對忠貞，這不單是我對婚姻的態度，更是我為人的信條!
 
收拾好現場後，我們幾位青年領袖一起離開...
 
「後日八點半去到紅磡，最遲要搭七點去尖咀果班船啦!阿維洗唔洗返工啊果日?一係我地黎氹仔碼頭就你?」：阿朗說
 
「唔好起氹仔搭，氹仔碼頭去尖咀啲船冇咁密架。我果日要番工，不過可以申請早走半個鐘，到時我直接坐賭場車番黎教會好快，」我微笑道：「起香港留夜啲都得，我大後日放假」
 
「正啊!果晚玩盡佢啦咁!」：阿豪興奮道
 
「Okay，後日夜晚六點三教會等，」紫琴認真瞪了我一眼，微笑說：「逾時不候!」
 
正當我心花怒放之時，還多了一次外遊的機會，使我更是興奮難捺...
 
我的人生不能更精彩了，簡直是我夢寐以求的完美人生。
 
......
 
https://www.youtube.com/watch?v=eBvarz3DY00
 
後天要跟他們一起去香港，難得有機會越過伶仃洋，藹晴卻受她的怪獸家限制，不能出來與我遊玩，實在是可惜啊…
 
回想起星期一那天我與藹晴約會後，離港時在碼頭跟內地同胞一起擠那條訪港旅客通道，擠得天昏地暗，差點趕不到船，我現在還感到心有餘悸…
 


我不是看不起自己現在的身份，只是假設，如果我跟阿朗和阿添他們一樣擁有香港身份證的話，我就不用跟其他訪港旅客擠那條小小的通道，不用擔心因輪候過關手續而趕不到船。
 
「返黎啦？飲碗袪濕茶啦！」：我走進門母親就端給我一碗湯。
 
我一邊喝著，一邊嘆道：「阿嬤同阿爺都係香港人，點解佢在生果陣你同老豆唔申請香港證既？咁我咪多張證囉…」
 
「好有錢去旅行咩...特區護照百幾個國家免簽，通行度咁高仲唔夠用?唔夠你咪去申請葡國護照囉!」：母親答道
 
「起，我意思係話有張香港證去香港方便啲啊，幾次都排隊排到差啲上唔到船」：我說
 
「車，我點知你老豆姐，你老豆本身就唔係起香港出世既，你阿嬤過左黎咁耐，你老豆自己又冇話要去搞，咁咪冇囉」：母親不以為然地說
 
我和母親只是閒聊一下，但一旁的父親聽到這話題後卻認真起來，他十分嚴肅地問道：「而家你係咪好恨做香港居民，係咪做到就好威?!你而家張身份證係咪好失禮你先?」
 
「唔係，唔係咁既意思啊...」：我立即住口，不希望跟他爭論這無謂的話題。
 
「我返工果到啊，果啲香港人拎住個working visa黎，當正自己高級過人地，三句唔埋兩句就講人老母......」：父親又開始釋放自己在工作上所積下的怨氣...
 
「得啦得啦，咩證都唔要啦我」：我立即躲回自己的房間關上門。

父親的性格我又不是不知道，他那般討厭香港人，還允許我每天跟阿添、阿朗他們一起玩，已經是一個十分寬容、開通的表現了。
 
「Valentina is requesting a video call」：我回到房中，還沒換好衣服，藹晴便已經發出了視像通話請求...
 
我按下了接通，出現在螢幕中的女孩竟然穿著一件灰色的上衣連短褲，外面是一件紫色的吊帶衫，頭上還戴著一頂紅白相間的草帽!藹晴穿起了一身旅行裝出現在視像通話中...
 
「著到咁靚黎見我啊?」：我對著螢幕中的她笑說
 
「係囉，唔知邊個衰人，掛住同其他人玩就唔理我!」：藹晴嗔道
 
「梗唔係啦，就算出去玩，個心都起你到架嘛」我溫柔地哄道：「我冇帶個心番澳門架，個心留左起大埔，你唔知咩?」
 
「最好係啦」藹晴疑惑地說：「你果邊咁嘈既好似?」
 
「我老豆起到嘈姐，佢好唔中意香港人」：我不好意思地說
 
螢幕中的藹晴聽後，兩手的食指相碰，扁著嘴，難堪而可憐地看著我，嗔道：「咁藹晴點算啊?...」
 
能共你 沿途來爬天梯 不用忌諱，
 
中傷流言全悍衛...
 
「係喎，你係個起香港出世長大既正宗港女喎」我戲弄她說：「不過我有一個好好既方法!」
 
「咩港女啊?!」藹晴怒嗔道：「咩方法啊?...」
 
我笑說：「好簡單，你放棄香港身份證入番大陸籍，跟住我同老豆講話我識到個大陸女仔，咁結左婚之後我比澳門證你，你咪又揸番特區身份證囉，perfect!」
 
我說完之後自己也忍不住捧腹大笑，藹晴則是隔著鏡頭，生氣地瞪著我...
 
開過玩笑後，我溫柔地哄道：「講笑姐傻豬，我點會因為唔敢面對我老豆而要你放棄自己張證喎」
 
我眼神堅定，認真地看著她說：「我一定會說服我老豆，比佢知道，我揀邊個女仔，根本就唔到佢管」
 
我深情地看著她說：「我要娶你，要你跟我姓，比我而家擁有既身份證你，同你建立一個美滿幸福既家庭，呢個係我畢生最大既夢想...」
 
留住你 旁人如何 話過不可一世!

問我亦無愧...
 
有你可 失去我一切...
 
藹晴聽後害羞地抱著枕頭，蓋住自己的臉，不敢看我...
 
「做咩事啊傻妹?」：我溫柔地問道
 
「你岩岩呢...講比身份證我果陣好sweet好浪漫啊...」：藹晴羞澀地說
 
「維吉爾...」：藹晴溫柔地喚著我的名字
 
「做咩啊?」：我微笑看著她
 
「其實呢，我地好似我Daddy Mammy...」藹晴含羞地說：「我地同樣係7月生日，維吉爾比藹晴大一年...」
 
「而且我地都係一對」：我笑說
 
「夜啦，瞓未啊維吉爾?」：藹晴含情脈脈地說
 
「嗯，一齊訓」我溫柔道：「你關左個cam換番睡衫先?」
 
藹晴羞澀地說：「唔洗關啦，我行埋一邊你咪睇唔到囉...」
 
藹晴換好衣服後，我們關掉房燈，同樣側躺在床上，把電話放在枕邊，看著螢幕中對方的臉，感覺就好像我們正共寢著一樣...
 
幾多對 能悟到幾多精髓? 能撐 下去?
 
竭力也要為愛盡瘁...
 
「維吉爾中意仔定女架?」：藹晴笑問
 
「女，生個同你一意咁得意既女」：我溫柔地答道
 
抱緊一生未覺累。
 
藹晴反應極大地駁道：「唔制啊，唔要女啊，要生個仔，好似維吉爾一樣咁靚仔識彈琴既...」
 
「嗯?生女有咩唔好，一定要生仔啊?」：我疑惑地問道
 
藹晴扁著嘴，可憐地看著我，嬌嗲地嗔道：「唔制啊，生左個女既話到時維吉爾一定錫佢多過錫我架...」
 
我會心一笑說：「點會呢?我份人咁念舊，唔會忘記你既，兩個都錫架嘛」
 
藹晴聽後失魂了一下，然後不屑地說：「唔會囉!你講就咁講，到時一定會錫個女多啲!」
 
「呷出面街女人醋就話姐，邊有人會呷自己個女醋架?」：我有氣無力地笑說
 
藹晴指著自己，嗔道：「呢個啊!我啊!係咪唔得吖?!」
 
就在我們這樣鬧著時，藹晴突然關閉了鏡頭，不發一言，我看見情況有變，也立即關掉自己的鏡頭和麥克風，還把自己在對話中的署名改成一個女孩英文名，要是這被藹晴的怪獸家長發現了，也不至於立即完蛋...
 
我隱約聽到一把粗獷的中年女人聲，過了幾十秒後，鏡頭才再一次被打開...
 
藹晴出現在螢幕中，她扁著嘴看著我，嗔道：「比阿媽發現左我起到玩手機未瞓，而家要我瞓啦...」
 
「嗯，訓囉咁」：我不捨地答道
 
我們嘴上雖說是要睡，但熱戀中的雙方看著對方的容貌，都捨不得伸手去按那掛線的按鈕...
 
我突然想起後天去香港的事，說道：「係喎!我後日夜晚黎香港喎」
 
「星瑤唔比出夜街，同埋星期六日唔比出街...」：藹晴可憐地說道
 
「唔緊要啦，你黎澳門，我地咪可以見囉，到時我帶你周圍玩」：我哄道
 
藹晴含情脈脈地說：「咁...4月29號好冇?星期五嚟，我可以出街，即日來回左佢地都唔知!」
 
「好!」：我立即答應，雖然那天我要上班，但難得藹晴可以來澳，我可以請一天病假，再不行便請事假!
 
「咁...瞓教?」：藹晴精靈地看著我
 
「嗯，Goodnight, I love you Valentina」：我溫柔地說
 
「我愛你...」：藹晴深情地答道
 
我們千不捨萬不捨還是要掛掉電話，她的怪獸家長逼她睡，我明天也要早起上班工作，但掛了視像通話後，藹晴又忍不住傳了一段Whatsapp訊息給我...
 
「I love you, Vergil[紅心][害羞表情]」：Valentina
 
我深情地回覆：「就算我地之間隔左一個伶仃洋都好，就算我老豆幾唔通透都好，無論遇到任何挑戰或困難，我終有一日都一定，一定要你呢個香港女仔![藍心]」
 
藹晴含情脈脈地回覆：「傻瓜，我都一定會嫁你呢個澳門男仔[紅心]」
 
......
 
這晚，我們都懷著無比的甜蜜睡去。
 
我的生命因她而充滿色彩，她就是我一切快樂的泉源。有這可愛的小情人，我的人生好得不能更好了，簡直是一場完美人生。