《第一次 我說我會記得妳 第二次 我說我會約定妳》: 偶然湊巧初相遇(上)
天朗氣清，惠風和暢，簡直為中三暑假，添了不少生氣！
差點忘記介紹自己。
我叫Dennis，將是一名商科生，過了暑假，就踏進高中。樣貌平平庸庸，戴眼鏡，身高約176cm，略帶一點毒，因為喜歡看動漫，閒時會打羽毛球。成績算是比上不足，比下有餘。雖然有點毒，但是口才還算挺好，牙尖嘴利，出口術無人能及。最喜歡開懷大笑，可以笑到著了魔，性格尚算樂觀。有一點很像女孩，特別喜歡吃甜食，尤其是蛋糕。
暑假天天補課真的悶透了，功課又已經做好，已經沒東西可做，唯有找些少事情消磨時間。本身自己的廚藝都不錯，基本上講得出就做到，煮餸煲湯，易如反掌。因為自以為是的心態作祟，所以就想嘗試去做蛋糕。我就找表姐幫手，表姐是蛋糕師傅，希望拜師學藝。
我：表姐，Dennis啊！
表姐：找我有事？表弟！
我：嗯嗯！我想學做蛋糕啊！
表姐：男人老狗學來做咩？
我：你知道我有多喜歡吃蛋糕啦！想吃就自然想整呢！
表姐：你想食，我可以做俾你，要人教，好麻煩啊！大佬，我要返工㗎！
我：唓......
表姐：好啦！好啦！講明先啊，我搵人幫手教你啦下，搵唔到唔好賴我啊！
我：好嘢！
三日後......
我：表姐，係咪幫我搵到人啦？
表姐：可以咁講啦！我個Friend就唔得閒，佢堂妹就可以啊！
我：堂妹！幾歲啊？(冇誠意就咪教啦！)
表姐：同你一樣咁大囉！
我：咩料啊，搵個細路女嚟教我，好敷衍啫！(細路女教到咩出嚟咁巴閉！)
表姐：你咪又係細路一個，人地好叻㗎，整蛋糕好好食，又識寫食譜，我可能都唔及佢，佢仲可以改良西廚學院啲蛋糕𠻹啊！
我：係咪咁勁啊？
表姐：咁學定唔學？
我：學學學！
表姐：你好彩啦，人地差不多日日整蛋糕，唔駛你俾錢！
我：咁唔該晒啦，表姐！
表姐：過幾日帶你上去啦，警告你啊，唔好失禮我啊！同埋人地係女仔嚟，你唔好毛手毛腳啊！
我：係係係！
表姐：十一點，太古站等啦！
我：乜要過海㗎？
表姐：你將軍澳去太古好近啫！嫌三嫌四，麻鬼煩！
我：得得得！唔好意思啊！
終日可以擺脫沉悶的日子，人生有寄託了，還可以有味蕾上的享受，或者學藝有成後，超越表姐！我是處於最終幻想狀態！
與表姐會合後，我在沿途問個不停，不斷問，不斷問，表姐說：「夠啦！就到啦！」我馬上自動收聲！噹~噹~噹~噹~
堂姐：你地嚟嗱？入嚟坐啦！
表姐：真係打攪你啦！一日都係我表弟唔好啦，係咁話要整蛋糕！
堂姐：都唔算打攪！打攪既係我堂妹啫！(她面帶親切笑容！)
我：姐姐，打攪晒！(等我扮晒野先！)
表姐：(表弟，幾好戲吖！)
我：(表姐，彼此彼此啦！)
我環視這家裡的四周，陽光細細地從屋外滲透，加上有淡淡清香，感覺十分舒服。整間屋非常整潔，一塵不染，但潔淨得有點奇怪突兀，甚至像一個陌生無人的地方。
堂姐：哈哈，聽講你同我堂妹差唔多大，不如你都叫我堂姐啦！
我：好既！(依位姐姐都真係幾好人，又有禮貌，笑容可掬，不過咁耐都未見到佢堂妹嘅？)
表姐：你堂妹呢？
堂姐：啱啱去咗洗手廁梳洗啊！應該就出嚟！
我：梳洗？(啱啱先醒？)
堂姐：出嚟嗱！同你介紹吖！我堂妹Stephanie！
Stephanie：你哋好，頭先唔好意思，瞓晏咗！(她有禮地鞠躬，初見感覺很舒服！)
我：我叫Dennis，多多指教！(我被她的少許東西所吸引，呆滯咗兩秒......)
堂姐：Stephanie，麻煩你教Dennis整蛋糕啦！唔該你啦！我係時候要走啦！
表姐：我都差唔多啦！
堂姐：我堂妹好易氹㗎！(她在我耳邊講！)
我：(點解咁講呢？)
表姐 & 堂姐：Bye！
究竟我被什麼吸引呢？沒錯，是Stephanie。因為本人實在很喜歡長腿。Stephanie身型很好，並不是玲瓏浮凸，是一種優雅的輕盈，潔白的皮膚，一把長髮，身穿藍色短裙。雖然面容有點憔悴，但水汪汪的眼睛、幼小的臥蠶卻抓住我的目光，在我眼中，彷彿看到她眼裡的故事，她真的很吸引。作為一個「美學大師」，我都忍不住看多兩眼！回神過來後，我感到些少不習慣，可能是孤男寡女吧！她亦有少許害羞，可能因為想做蛋糕的男孩的確少有。
Stephanie：Dennis，不如我哋開始啦！(她的聲線細聲溫柔！)
我：好啊！
Stephanie：聽堂姐講，你好似係初學，我哋今日整簡單啲先啦！
我：嗯嗯！
Stephanie：份量要精準，大約咁可以就準確啲。
我：係！(隨手落都咁準唔係呀嗎！)
Stephanie：同埋落麵粉要分散啲，因為可以溝埋啲！
我：係！
我站在Stephanie的身旁，她身上散發出陣陣葡萄香氣，我隱約地面紅起來，呼吸急速，所以做蛋糕顯然有些不專心！終於，我辛辛苦苦地將蛋糕推入烤爐。嘩！真是累透！做蛋糕與煮餸真是兩碼子的事情，未免太難吧！我真的不及她的耐性！我坐在沙發上，簡直不想起來。我雙眼又突然地朝向Stephanie的身軀了，原來她很高挑，應該有168cm，雙腿簡直......唉！我真是變態！
Stephanie：得啦！嚟試下自己手勢吖！不過等我一陣！
我：好啊！
Stephanie：嗱！(她及時遞上一杯紅茶。)
我：錫蘭紅茶？
Stephanie：係呀！點解你知嘅？(她的樣子十分驚訝！)
我：我係一個蛋糕痴嚟㗎，如果係富有質感嘅海綿蛋糕，最好係配錫蘭紅茶啊！
Stephanie：(淡淡的微笑使炎夏的朝陽出現......)
我：真係好好食，多謝你啊師父！
Stephanie：你叫我師父？唔好啦，我同你一樣大，你一係叫我Stephanie，一係叫我小S吖！
我：知道！小S你好靚啊！(死啦，發神經講咗出嚟！)
Stephanie：...我........唔好意思...失陪一陣！(她面紅地尷尬低頭。)
我：(唉，做咩亂講嘢，失禮表姐啦，但究竟堂姐講個句我堂妹好易氹係咩意思呢！)
Stephanie：個蛋糕真係好好食咩，真係咁好食？睇嚟你真係好鍾意食蛋糕，我整嘅蛋糕成日都食唔晒......(她的樣子猶疑中帶點快樂。)
我：如果有蛋糕食，我可以代勞㗎！
Stephanie：真係？
我：嗯嗯！
到了晚上，我即將離開，臨走前，我們交換了電話，若果我想再做蛋糕，就可以找她。其實Stephanie真是很棒呢！做蛋糕又好，又夠耐心，心想自己都不是做蛋糕的材料，都是品嚐蛋糕才是我專利。既然Stephanie做蛋糕這麼好，當然不要浪費這些人間極品啦！不過，總覺得小S不是太開心，好像很多難言之隱，是我想太多？