《高登獵殺遊戲》(情景題變講故 ): 掃地神僧 掃理老墓
「你再講我就真係要考慮遠離你喇，我最憎hehe，你唔記得左我鍾意睇波多野結衣咩？黎到呢度，不如睇下練咩功好過啦。」百變怪咁同我講。
之後我地一齊入左去呢座大樓，大樓四周圍都係書...
本本打開都好似高登DPost咁，記載晒所有留言...
就連「劉明」呢D字佢都記錄得好清楚。
「咁我地應該練咩呀？我睇左兩三個已經覺得自己膠化緊。」
「我都唔知，斷估方丈唔會玩鳩我地呱。咦，你睇下果邊。」百變怪講。
我另返轉頭，見到...
「掃地僧！？」百變怪大嗌。
「會唔會係天龍八部果個丫嗱？」我問。
「咪酬啦！響圖書館請保持安靜呀柒頭皮！」掃地僧回應我地。
「唔好意思呀，我想知究竟呢度其實有咩作用？」我問。
「黎圖書館問圖書館有咩作用？你戇鳩架？」掃地僧串我。
「咁老人家你又響度做乜呀？」百變怪問。
「你仲戇鳩！你睇唔到我響度掃緊地咩？」掃地僧串百變怪。
「你咪扮野喇，呢度唔係現實世界，呢度既人要生活資源方面根本唔成問題，無理由會有人會受人二分四黎做清潔工既，你好快D講清楚，唔係我就唔客氣。」百變怪佢突然認真起黎，仲恐嚇老人家。
但係老人家佢神態自若，仲咁講：
「有人鍾意屌屎忽，有人鍾意Lon雞骨，
有人鍾意靠兩手，我都唔知講緊乜。」
「你求其都作到首詩出黎，你肯定係高手，唔好扮野喇。」百變怪咁講。
「咁都叫做詩，唔好太低B。」掃地僧回應佢。
「咁…我朋友佢只係想變強D，希望你教下佢點樣睇D膠Post先有用丫。」百變怪再講。
「賜教問我正粉腸，膠Post以為練拳掌，
莫說老身無武功，妄想變強你就想。」
「咁…一係你講下呢度有咩可以俾我朋友佢學到喇！」百變怪講。
「話左唔識就唔識，仲要問喎想點Jack，
掃地阿伯都要蝦，問我不如問隻Cat。」
「算啦！百變…小強，我地走喇，唔好打攪老人家喇。」我講。
之後我仲拉走左百變怪佢。
… (我拉左佢上樓上)
我地響大樓度上左一層，仲見到一個Pantry…
決定就坐響度休息下。
「契弟，你信我丫，個老野肯定係有料架！」百變怪咁講。
「我信你，我幾時唔信你啫，但係人地老人家唔肯講都冇計架。」
「淨係得堆膠Post，真係點諗都諗唔到對練功有咩作用。」
「咦，唔係噃。其實百變怪你咁好打，不如…你做我師父丫！」
「唔得，唔得。」
「點解唔得呀？你又係男人，我又係男人，你既波多野掌好犀利噃。」
「總之唔得啦！」
「唔得！？你...其實係咪同賭撚一樣，係個閹人？」
「唉，eee...純粹係因為十日之內唔可能練成。」佢一副苦惱既樣。
「咁算啦。呢樣唔得，果樣唔得，唔通真係留響度享受食物就算咩？一係...我地再出去闖闖，睇下有冇其他奇遇啦！」
「你估拍戲咩？而家已經俾左一個奇遇你，你仲想要幾多個呀？唔通真係煮好晒飯俾你，仲要喂埋入你口咩？」
「問題而家係唔知碗飯響邊，或者話唔知邊碗飯先岩我呢。」
「我直覺就覺得膠Post本身唔係直接教你野，而係可以幫你領悟到D野。」
「但係我銳角同鈍角都覺得領悟得黎都夠左十日呢。」
「或者你再行下，我地分開行下，睇多幾個膠Post先，睇下會唔會有所領悟丫。」
結果...
我地分道揚鑣，我落返樓下行，行行下...
仲去左一個荷花池度...
「汝家池塘多膠魚...」我摸住池邊廢噏。
「幾時有膠魚呀？」
講野既係掃地僧，佢掃地掃到黎呢邊。
「乜你終於正經返，唔再數白欖喇？」我屹佢。
「你鍾意咩？咁我就講一些。」
「唔玩喇，我只係想知道我未來既方向係點啫？離唔離開到呢度，其實我都打定輸數，我屋企四大元老，即係阿爺阿嫲阿公阿婆呀，佢地早就死晒嚧，阿爸阿媽又有阿哥睇住，我都好放心，所以都冇乜牽掛，係有少少思鄉同掛住D朋友啫。」
「你都幾...唔知點形容你好添。後生仔，積極D啦！有排你捱呀！」
「捱得值得都好D，最驚係捱乜都唔知。」
「順口噃，似乎係到你玩野。」
「咁岩啫。係呢？你真係一D武功都唔識？」
「普通一個掃地阿伯，可以識D咩呀？」
「咁點解方丈要我同我朋友入黎呢？」呢句我係自言自語。
「我唔知噃。或者整鬼你地呢。」但係佢聽到都照答我。
「但係...係呢，你同方丈有咩關係呀？」我問。
「兩個男人可以有咩關係呀？」
「你地唔係真係...」我好疑惑咁發出疑問。
「屌你啦，玩屎忽果家野我唔興既。」掃地僧回應。
「咁你咪真係一個咩都唔知既普通掃街茂？」
「行行出狀元，雖然大個之後都知係假話，但係起碼我認同丫，講你都唔信，我係切切實實咁鍾意掃街既。」
「哈哈，你咁講，我覺得你好偉大添，咁你有冇咩掃街絕技，可以快速掃幾條街，或者掃得條街特別乾淨咁呀？」
「咦，你又知我有既？」
「哈哈哈，點掃法？」
「哈哈哈，咁囉！咁，咁，咁，咁...」
掃地僧佢真係捉起我D手腳黎舞...
「喂，你D招叫咩名堂呀？」我問。
「跣，九，掃！跣，係跣低個跣，形容速度之快就如跣低仆街速度之快，九係形容有九式。見同你傾得咁投契，今日我就破例教你一式玩下啦，專用黎掃墓地用既第一式，掃，理，老，墓！」