《高登獵殺遊戲》(情景題變講故 ): 痴情漢子 黐筋尷尬

上集講到屎忽佢突然響肶罅抆左張紙出黎。

我隊隻手過去接左過黎睇，但係…

「屌你！臭既！」我大嗌。

「唔係呀，你睇下，我黎架！」屎忽佢咁講。

我再望一望張紙…





「你黎！？邊忽似呀？」我問。

「屎忽。」

「咁你解釋下啦，不過唔好咁埋我度。」

我想鬧佢，但係太臭，我唯有咁講，順便隊返張臭紙俾佢。

「呢張係通緝令，下面果個係一個金額，當時通緝我果陣係呢個價，但係已經變晒，我想講既係，呢度每一個人都有一個被通緝既價，而今日既你，係價值兩個高登膠幣既價，即係二萬億。」





「二…二萬億！？」我嚇到呆呆地。

「冇錯，加埋你有既兩個膠幣，你而家正確黎講係值四萬億。」

「吓！？咁…咁有錢又點呀？」我口都窒埋。

「要離開呢個森林，就需要有十個膠幣，即係現值十萬億。」

「咁…咁交俾邊個呀？」我再問。





「我淨係知道個遊戲係咁玩，相信係當你有十萬億果陣，就會有人黎帶你走。」

「咁…張通緝令邊個發出黎架？」

「唔知，不過相信就係帶我地黎呢個森林既人。」

之後我沈思左一陣。

「點呀？仲有冇野要問我？」屎忽問我。

「咁…點解你…唔出手殺我呀？」

「哈哈哈，好問題，你好彩囉。首先，你身邊個小強係高手中既高手，我唔夠佢打，另一樣，係更加令我唔會殺你住既野，因為我女人。」

「你女人！？」





「記唔記得你響邊度搵到我呀？」

「森林囉。」

「當時我係飲左好多酒，醉到暈左，因為…

我掛住佢。」

「佢！？」

「記唔記得我講過咩呀？」

「好似係…咩咩咩記得D咩就叫聲契爺咁。」





「冇錯，係…

下一年既今日仲有人記得邊個係林潔瑜既話，我就叫聲佢做契爺呀呀呀！」

「咁即係點呀？」

「我女人個名就係叫做林潔瑜，呢張係佢既相。」

佢又響肶罅抆左張相出黎俾我睇，不過今次我精，我響佢手上面睇就算。

「咁濛既？」我問。

「係我偷影佢既。」屎忽佢答。

「佢係…你愛既人？定係你只係暗戀人地呀？」





「我承認，係我暗戀佢，但係佢係知道我存在架，真係知架！佢…我仲向佢表白過，佢當時仲話『下一年既今日，如果你仲記得塵世間有個女子叫做林潔瑜既話，我或許會考慮下你』。但係呢件事已經係兩年前既事，我呢一年都…都搵唔到佢，甚至連少少消息都冇。」

「真係估唔到屎忽你會係D為女死為女亡既人噃。」我搭左一下佢既膊頭。

「所以你放心，我未搵到潔瑜佢之前，我係唔會殺你既，我根本就冇心離開呢個森林。」

「咁如果佢離開左或者你搵到佢呢？你真係會殺我？」

「以我所知，到現時為止，冇一個人離開過呢個森林。況且，我都係咁講啫，我相信如果我真係搵到潔瑜佢之後，開心都黎唔切啦，仲邊得閒諗殺唔殺你丫。」

「咁好啦，我明白晒喇，你就發返個好夢，最少可以響夢裡面享受下同佢一齊既時光丫。」

「係啦，不過尋晚唔知點解，發惡夢喎，我夢見潔瑜佢變左個火山級暗瘡大肥婆。」





我驚有肥婆聽到，所以都係早走早著…

之後，我離開左屎忽個房，仲諗住向下一個房進發…

我想去問下百變怪佢，我覺得佢瞞住我既野，比起屎忽仲要多。

(咯咯咯 ~) 我敲門。

(嘰 ~) 不過我冇開門，道門係另一個人開既。

「知你會黎搵我啦。點呀？」係百變怪行左出黎。

「你點知架？」

「希望再明天丫嘛。」

「九唔搭八。入房先講丫。」

之後我地兩個閂埋房門密密斟…

「你係咪有野隱瞞我呀？」我斬釘截鐵咁問。

「吓！？你點知我頭先去左偷睇惠那佢沖涼架？」

「唔係呢樣呀…吓！你講多次！你夠敢講多次！」我一路揈佢一路講。

「唔敢喇，唔敢喇，最多下次唔講，淨係睇啦。」

之後我忍唔住手，求其濕左佢七七八十九搥隻左眼…

再踢左佢三得個三，三百幾腳隻右眼…

「以後仲敢唔敢偷睇你阿嫂，我條女？」我問佢。

「吓，邊個係你條女呀？」

突然回應我既並唔係百變怪，而係一把女聲，但當時我仲以為係百變怪。

點知…

「清秋院惠那囉，仲問。」我大大聲咁回應呢把聲。

原來我打打下佢唔小心踢開左道門，仲咁岩…

惠那佢沖完涼行過呢個門口。