[純愛]我有隻手鈪，可以上其他人身: 廿一
自手鐲的事件完結後，阿寬又繼續他的流浪之旅。這個學期，阿寬只需要修讀兩科，本來已經很難在學校碰到他，加上他為了旅行而翹課，所以整個學期也沒見過他一次。再次遇見他的時候，已經是暑假籌備迎新活動的時候了。
「喂！阿朗！」一個長滿鬍子，皮膚黝黑的男人對我大喊。仔細一看，原來是阿寬。
「寬哥，你做咩搞成咁？」我問。
「哈哈，之前去左中東，見到D 人留鬚留得型，咪打算學下囉。點呀？好唔好睇呀？」
「...你都係剃左佢啦。」
「讚下我都唔得。今晚得唔得閒？同你食個飯，傾下計咁啦。」
今晚剛巧沒有事要幹，就與他聊一聊吧。
當晚下課後，就到了旺角找阿寬。阿寬在一家日本餐廳訂了桌子，我跟住地址來到那所餐廳，心想為什麼這裡會如此眼熟，原來就是之前他帶俞寶恩去吃飯的那一家餐廳。
坐在阿寬對面，上午才說過他的鬍子很難看，下午他就把鬍子剃掉了。我說：「依家咁咪靚仔好多。」
「不嬲都咁靚仔。嗌野食先啦，咁耐無見，我請你食飯啦。」
既然他說出這句話來，那我當然不會跟他客氣。我點了所有餐牌上最貴的東西，打算趁機會敲他一筆。
「咦...你仲帶住隻鈪呀？唔係話廢左啦咩？」阿寬問。
「係呀...不過見佢幾靚，咪戴下囉。」我摸一摸那隻手鐲。
對了，由我回到郭朗的身體之後，這隻手鐲的力量已經完全失效，變回一隻普通的手鐲。可是我越看就越喜歡這隻手鐲，所以這半年來就一直戴在手上。
「係因為靚，定係因為其他原因所以戴住呀？」阿寬問。
「咩呀...可以有咩原因？」我問。
侍應端來一大船刺身，看到那些肥美的肉，我馬上垂涎三尺。
阿寬夾起一塊魚肉，對我說：「你係咪仲掛住個女仔呀...個女仔叫咩話？好似係叫...俞寶恩。」
從別人口中聽到她的名字，胸裡一熱，心跳加速。好久沒有聽過她的名字了，本以為自己已經完全放下，可是沒想到我的反應會是這樣。我說：「你唔講我都差D 唔記得左有個咁既人。」
「唔係掛，個女仔咁靚都唔記得？眼大大，鼻高高，又白白地，塊面少少Baby fat 、牙又夠齊，而且對腳...」
「喂，食野啦，唔好再講啦。」俞寶恩的確如他所說，是個很美的女生。但，那又如何呢？
「唔係喎，諗返起真係覺得佢幾正。你有無佢FB ？或者IG 果D 呀？」
「無呀。」
記得某個晚上，想她想到瘋了，就在Facbook 上搜尋她的名字。結果還真的讓我找到了，可是只能看到Profile Picture ，其他東西全都看不了。而她的IG 也設成了私人帳號，所以也和Facebook 一樣，什麼都看不了。我想她應該是害怕陌生人會將她的相片放到網上，所以才會把所有東西都不讓陌生人看。
「嗯...我記得佢好似讀調景嶺官立...聽日揸架車去搵佢先。」阿寬將一大塊魚肉放到口中，一邊咀嚼一邊說：「呢D 妹妹仔應該好易溝，話唔定仲係乖乖女黎...」
「喂！」我見他說得過份，心裡有氣，就對他說：「你再咁講野我就走架啦。」
阿寬奸笑地說：「又話差D 唔記得人既，即係已經無再鍾意人地啦？但你依家又咁既反應喎朗哥，你到底係咪仲鍾意佢架？」
「我...」
本來這份情感已經被我抑制了很久，可是這個死阿寬卻偏偏要把它翻出來。我不答話，繼續吃東西。
侍應將另兩碟海膽放到桌上，阿寬馬上夾起一些海膽，他說：「其實你之後仲有無搵過俞寶恩？」
「無呀，見都無見過佢。」
「咁點解你唔主動去搵佢呢？」
猶記起阿寬痛罵我的那個晚上，當時我看著倒影裡的俞寶恩，心裡已經下定決心，不要再干預俞寶恩的生活。我說：「係你叫我唔好再搞住人地既。」
阿寬一怔，然後說：「我幾時咁講過？」
「我記得好清楚架，你話：『唔好再打擾俞寶恩既生活啦』咁。」我模仿當時阿寬的語氣。
阿寬的用意我當然明白，要是一直佔據著俞寶恩的身體，不單會嚴重影響她的生活，甚至連我也會遭殃。
阿寬冷笑，然後說：「我既意思係，唔好再透過控制佢黎打擾佢既生活。咁你依家可以用郭朗既身份去溝佢架嘛！」
「算啦，都過左咁耐，如果有緣既話，一早就相遇啦，點會等到依家。」我說。
「大佬呀，緣份係靠自己製造出黎架。如果你真係咁鍾意俞寶恩，點解唔試下主動出擊？」
「嗯...都要有機會先得架...」
「機會都緣份一樣，都係要自己製造出黎。坐係到係唔會追到波斯...金絲貓架。」
「得啦，我明架啦。」
我又何嘗不想嘗試博盡全力去追求她看看？只不過...我何德何能呀？照照鏡子也覺得自己配不上她了...唉...
吃過飯後，與上次一樣跟住阿寬到停車場。我說不用送我回家，於是他就把車子開走...有時候真羨慕像阿寬這種充滿自信的人，要是俞寶恩與他在一起，應該也會很幸福吧...
坐地鐵回家，每次有女生走進車廂，我也去望一下到底是不是俞寶恩。當然那些庸脂俗粉自然比不上寶恩的美...
命運讓我遇上寶恩，又令我愛上了她，可是偏偏卻沒有讓我再見她一面...
不過，這樣就正正說明了，我與俞寶恩根本沒可能發展。
所以，只得放棄了吧？
對吧？寶恩...