【江湖故】《響朵砵籣街》: 第二十章

看著進來的少年，那中年男人瞳孔放大，眼眶像是有點淚亮似的，慢慢地說出一句︰「你係華仔？」
 
「係啊！我就係華仔喇，基叔叔，你記得我啊？」
 
「你真係華仔？」
 
「係啊。」
 
「你全名叫咩？」
 




「楊萬華。」
 
「你老豆全名叫咩？」
 
「楊天！」說出父親姓名時，華仔總會有點自豪感。
 
江湖上的稱呼，大多已叫朵為主，有時候就算是很好的兄弟，也不會去問別人的全名，所以記得上校全名的人不會很多。
 
聽到楊天這個名字，肯德基立即走上前抱住華仔︰「華仔！真係你！真係你！你大個左好多，基叔叔都認唔到你啦，你無事，你原來無事！無事就好喇，無事就好喇！」
「講俾我聽，點解你無事都唔嚟搵我？我搵得你好辛苦，我以為天哥要絕後喇。」




 
「對唔住啊基叔叔，我有事想你幫手……」
 
雖然肯德基有很多話想跟他的世姪說，也有很多事想要問他，但世姪突然出現向自己求助，必定是有什麼解決不了，所以肯德基馬上一臉正經地說︰「講！咩事？」
 
華仔立即將事件的經過簡短地對肯德基解釋。
 
「好！果然係楊天個仔！重義氣，而且做人夠正直，無出賣到跟你搵食嘅囡。」
 
「基叔叔，可唔可以幫我？」




 
「大個仔喇，唔好再好似細過咁叫我基叔叔，叫我基叔得喇！你有事，基叔點會唔幫你！打個電話就去。」
 
肯德基吩咐身邊的小弟打了幾個電話，不消十分鐘，餐廳門口已經站滿了人，就像變魔術一樣神奇。
一行幾十人，由肯德基及華仔帶路，浩浩蕩蕩地向碎料良的架步出發。