《男人多情而長情，女人專情而絕情》: 第三十三章
跟住我地就食野啦，排隊拎野食呀，跟住影下相就完嫁啦。
我影既相就唔多，都係同果幾個人影姐，但我同康僑既合照卻珍而重之。
見D人影相都要疊曬膊頭咁，抽曬D女仔水。
我同康僑影就好正正經經，兩個人企埋一齊咁影。
因為我係見到其他男仔同康僑影相，係疊曬佢膊頭，抽曬佢水！
我見住班仔疊曬康僑膊頭咁，抽曬佢水。
而我就乖乖地咁企係佢隔離，無抽水，正係影相咁簡單。
以前既女，俾其他男仔抽水，個心始終有d難受。
就好像細細個咁，以前係你既玩具，唔理咩原因變左唔係你，係其他人手上玩，你都會有咁既感受。
康僑同佢地影又影得好鬼開心咁，成個明星咁。
最緊要係...班男仔我無一個係識既！
識既都無抽水，好似方子龍咁。
之後我同文西佢地去唱通宵k，咪又係一班仔，我心思都係係康僑度。
傻下傻下咁過左果晚，傻下傻下就放榜。
努力左三年，就係為左入大學讀水泡科，諗落都覺得幾悲哀。
讀完就傻下傻下咁打份牛工，傻下傻下咁就一世，我已經可以幻想到我既將來。
我無參加ocamp，我覺得果d野唔岩我，我亦唔覺得參加左就會識到好多朋友，最後咪又係hi bye fd。
最期待既係送康僑機，其實唔想嫁，唔想佢走嫁...
但係係得果個機會見到佢。
康僑佢9月頭就飛，而我就9月開學啦。
我whatsapp康僑。
我：你果日幾點機呀？
望住佢既last seen，睇返之前既record，已經係兩年前。
再一次傾返計仔，就已經係佢要走既時候。
佢未覆我，咁我就邊睇下其他野邊等佢覆。
佢到左聽朝先覆我，究竟咁長時間佢搞乜鬼？
康僑：果日我下就2點機。
果日我咁岩就要返學，俾著你，你會點做？
老系都走堂啦，唔係仲要問呀？
你心愛既人重要D，定其他事重要D？
無野比得過心愛既人重要嫁啦。
你經歷過離別就會明白嫁啦，有D野好難想像，未經歷過真係體會唔到。
我：好啦，果一日送機我會準時到。
之後我地無再講過野。
直到果日去機場，先再講返野。
果日已經係開左學幾日黎嫁啦，我朝早去左返學，一放學就直接飛去機場。
去到已經1點，我係車上面問定康僑係邊度，佢話佢係離境閘口，就黎要入去。
但我果陣先岩岩到東涌。
係好似TVBB咁戲劇性，但其實現實當中真係會好緊張，你錯過左，就無。
好似我地段關係咁，究竟要錯過幾多次先甘心？
但好彩，我真係趕得上既。
唔知你地明唔明，由驚趕唔上，到好彩趕得切既感覺。
好多香港人都唔明，好多人對時間觀念都係覺得無咩所謂。
但果一刻，我真係好多謝上帝，即使係見佢行入去都好。
一見面就首先好驚訝，然後眼濕濕咁沖去對方，最後抱起佢，黎個360度大轉圈，個鏡頭仲要不停咁圍住佢地轉。
係男女主角見面既時候，就響起動人既音樂，又加多幾分催淚既成份，從而令成個畫面感人，成套劇最值錢就係呢個位。
但可惜我地唔係戲劇入面既男女主角。
「嗨，估唔到你真係黎左。」康僑隻眼收唔住笑意。
「話左點都要黎送你既。」應承過人既真係要做得到先好。「係呢，你D朋友呢？」
我發現康僑無FD送佢機既？無女仔都一堆男仔送佢機啦，康僑身邊咁多FD。
「我驚自己見到咁多人送會喊，所以我無叫其他人送我，亦都唔俾佢地送。」
「咁你又叫我送？」
「因為我想臨走前見一見你，而我知你一定會黎。」
我第一時間係諗康僑一定係馬後炮。
「好啦，你就黎要上機啦，你自己要小心。」即使幾唔捨得，都要放佢走既。
我唔會唔記得我地之間既約定，我相信康僑都會做得到既。
「知啦，我都要入去啦，我地影返張相？」康僑提議。
「好呀。」
康僑拎起部手機，自拍左好幾張。
鏡頭入面既我真係笑唔出，而康僑都笑得好勉強。
我地無講野，無深深既擁抱，就咁樣送左佢入去。
明明好多野想講，但卻講唔出口。
呢個世代講野好方便，咩都可以講出口，可以暢所慾言。
但原來有D感情都係一樣咁難以啟齒......
佢入左去，佢入左去，佢入左去，佢入左去，佢走左啦，佢走左啦，佢走左啦，佢走左啦。
我不停咁樣同自己講，佢走左啦呢個事實。
佢走左我仲企係原地，果陣時我係有一剎那希望佢係玩勁我，呃勁我，唔係去咁遠，或者唔係去四年咁樣。
但有咩可能姐，佢屋企人就係果邊，我只係離遠望下。
我留係原地一陣，等下佢會唔會跳出黎嚇下我咁。
人就係咁傻仔，明知無可能既事都要去做下。
等左一陣，真係無人出黎，先肯死心咁走。
仲要邊有邊回頭，因為唔捨得？定因為可能佢會跳出黎？我唔知，我正係知自己已經開始掛住佢。
佢無whatsapp我係我預料之內既事，如果我要走我都唔想咁傷感咁離別。
但我都時不時拎部手機出黎，同岩岩一樣，都希望佢搵我。
點解我唔自己搵呢？我有諗過打一大段千字文同佢講嫁，但男人老狗打乜春呀，成個女人咁做咩呢？
其實我等既，係佢一句「我走啦」，咁簡單姐......
機場比起婚禮既殿堂，仲見證住更加多既真心。
入去婚禮既殿堂唔一定真係愛對方，代表既係你未來同佢生活。
婚禮係兩人踏入更親近關係既地方，機場係兩人離別既地方，唔好同我講一齊去旅行果d，果d緊係唔計啦。
我係機場度見證住自己最真摯既感情。
佢飛走左之後無再聯絡過康僑，我都唔知點解會無聯絡，成件事好似不知不覺咁。
即使我地只係朋友，但好多朋友就係你唔搵我，我唔搵你，咁就一世。
但係我仲可以係ig，facebook上面睇到康僑既消息。
好可悲既成件事，因為曾經好親近既人卻變成如此陌生。
關係就係一種循環咁：
我地由唔識，慢慢認識，去到熟悉，再一齊，然後離開，最後只係變得認識。
最後既果一種認識係，我知道佢依家點，但我無同佢經歷過果D野，純粹得個知字。
最慘既係，你望住facebook入面既佢，仍然仲係你心入面。
佢已經離開左一年，我見佢係果邊生活得好開心。
同鬼佬出去玩，又出去旅遊呀等等。
俾我都想拋開呢度既一切，去一個新既地方重新開始過。
但可惜我依家無咁既能力，我只可以留係宿舍度做自己既project，然後得閒出去打下工，補下習，同普通既大學生無咩分別。
一年黎，我識到唔少女仔，有一兩個有一齊過，但係感覺唔再好似以前咁。
一齊既感覺好公式化，比起朋友，只係多左拖手同kiss咁大把。
我試過，果陣時我岩岩同女朋友一齊左兩個禮拜左右啦，我係ig見到康僑有po文，同一個男仔既合照，而果個男仔我唔識，我見到既時候，我個心係chock左一chock咁，唔算好難受，只係有少少咁。
睇得出康僑佢真係笑得好開心，同果個男仔都影得幾close下。
我會呷醋，即使我幾唔想承認都好，不停同自己我都無呷醋，無野既，朋友黎既姐。
好等自己個心好過D，呢一種心情keep左好耐，我都無同人講過。
就連方子龍呀文西佢地都唔知。
我女朋友就更加唔會同佢講啦，過左無幾耐我地都散左。
無謂再浪費自己時間，傷害人地又傷害到自己。
幾段感情都係咁樣無疾而終，係感情世界入面，無分邊個岩邊個唔岩，只係有分邊個珍惜邊個多D，邊個愛邊個多D。
我同佢地都係好和平咁分手，衝動咁一齊，但理性地離開。
我既感情事都無定落黎，我後尾就覺得順其自然就算。
其實一開始，我真係無諗過會再拍拖，我諗住大學呢四年係唔拍拖，我想等，等康僑佢返黎。
但有時愛情既野黎既話又唔識擋，唔識得對女仔避忌一下，好快又一齊，好快又分手。
經歷過一兩段感情，我先真正咁成長，真正識得去適當咁對人好，特別係女仔。
但當我學識既時候，我就係facebook度見到康僑同一個男仔一齊左。
康僑係佢既感情狀態度set左in a relationship with XXX。
睇果個男仔既ig，唔係好靚仔，普普通通咁啦，帶點成熟穩重既氣質。
但我睇完我好似有D wing wing地咁，暈暈地。
我停左果個畫面好耐，我無熄到個moon，我由佢開住，隻眼不停咁望住個狀態。
的確我無權利去干涉佢感情，只係怪自己太傻既，以為佢會回頭。
諗真D，我又真係幾天真喎，有邊個回頭等嫁？人緊係向前望嫁啦，好正常姐。
一直活係過去既人，係睇唔到將來，呢一年幾我睇唔到將來，因為我一直留守係過去。
果一日我個腦一直係度諗緊呢樣野，諗極都諗唔通點解自己會咁，去到後尾終於都明白。
感情既野，真係需要親身經歷過你先會明白，因為有好多野係你意想不到。
有好多人可以貪新忘舊，見一個愛一個，拋棄自己身邊果個，去搵第二個。
但對於我黎講，呢D都係我做唔到既野，我無辦法放低康僑。
就算我同幾多女仔fd都好，曖昧都好，始終無以前果一種感覺同衝動令我想開始一段新關係。