我的爛Gag女友: 東京之旅
自從和敏兒開始以後, 我的每天都是充滿著繽紛色彩. 因為敏兒為人比較外向, 鬼主意特別多, 我們即使沒有任何活動, 走在行上也會笑. 除了很多爛gag自娛之外, 我們的無聊遊戲有試過吃腸粉時拿竹籤掉進水杯鬥準, 猜包剪揼猜輸左要去麥當勞叫牛河.
有時我也會互相整蠱, 當她嘴上塗好潤唇膏後, 我會用嘴吻她, 然後按著她的頭不給她縮開, 把她的潤唇膏抹到我的唇上. 而她知我很怕搽hand cream, 因為痴笠笠的感覺會令我毛管棟, 她就在手上塗上大量的hand cream, 然後等我用手拖著她的時候, 她就用塗滿hand cream的雙手去捉著我, 把hand cream 抹在我手上. 她很愛用蟹樹牌的Summer hill, 所以, 在我的印象中, Summer hill幽香味道就代表了敏兒.
我們自己原先也沒估計到, 以我的內向, 自閉性格和敏兒的外向, 活潑性格會如此合拍. 我們開始了大半年, 兩人的默契越來越好. 很多時和阿王, 阿禮一起的活動就連服兵役中的阿王和苦戀中的阿禮也在慨嘆”這些機會不屬於我”.
開心的日子過得很快, Year 2完結了, 我們都升上Year 3. Year 3 是大學的最後一年, 我們現在9月開學, 到明天大約5月就考試完畢, 換句話說, 漫長的學習生涯, 自幼稚園至今, 還有8個月就完結. 心中有點不捨, 但卻又對不用讀書溫習的日子充滿著期待.
9月份是敏兒的生日, 這是我們開始以後, 她的第一年生日. 我在想著為敏兒做一點驚喜, 給她一個難忘的生日, 但竟然先開口的是她.
敏兒: 係喎阿月, 我生日正日加前後兩日你得唔得閒呀?
我拍拍心口.
我: 得, 我會幫妳諗好活動架啦, 妳放心啦.
敏兒: 唔係呀, 我想你陪一陪我去日本三日呀.
雖然現在對我來說, 錢不是大問題, 但突然間要去日本, 對從未出國的我, 還要是女朋友主動要請, 我有點不懂反應.
我:……得既…做咩咁突然想去日本玩呀?
敏兒: 唔係去玩架, 我諗住同尹兒過去睇睇情況先呀.
我: 睇咩情況呀?
敏兒: 你唔記得啦? 我咪話左我出年九月要去日本讀幾年書既
我被她提一提, 突然間醒起. 大半年前的2月14日, 我被快樂麻醉了, 聽到這句時沒有特別的感覺, 但現在想起來, 原來我和敏兒的快樂日子只剩下一年時間. 我突然臉上失去了笑容.
我: 妳地咁認真飛過去日本睇, 咁即係都唔會唔去架啦呵?
經過這大半年的相處, 我和敏兒己經是不用說話也能明白對方的想法. 聽到我問這句, 她伸手摸著我的臉, 看著我說.
敏兒: 唔好咁啦, 呢個係我由細到大既夢想泥架, 我好想完成佢呀
我: 無, 問下啫
敏兒: 你講過, 你會等我架麻
我: 係~~我記得
敏兒: 我地而家離出年九月仲有一年時間, 至多我抽多d 時間陪你啦, 笑番啦
我勉強地作了一點微笑.
看來敏兒和尹兒是作好了準備, 她們為我買了三天的機票連酒店, 總共加起來只是二千多圓, 而且還安排好三天要做的事情. 出發前的兩天, 敏兒打電話給我, 提醒我要拿些什麼上機.
敏兒: 阿月呀, 你記得後日朝早七點係機場等呀呵?
我: 梗記得啦, 我第一次出國旅遊, 點會唔記得?
敏兒: 咁就好啦, 你記得到時要帶定d毛巾, 牙膏牙刷果d 日用品呀, 同埋要帶插蘇轉頭泥叉手提電話呀. 厚衫就應該唔使帶咁多啦, 九月果邊都未係好凍架. 電話要開埋漫遊先, 唔係去度用唔到架. 你記得帶埋東京旅遊書去呀, 多個人幫手睇地圖會好d架麻……
我: 得架啦敏婆婆, 我會帶架啦, 妳放心啦
敏兒: 而家嫌我長氣啦係咪呀?
我: 唔係咁意思, 不過妳放心啦, 我會帶齊架啦. 係喎, 妳唱好Yen 未呀?
敏兒: 哎吔!! 係喎我未唱呀, 聽日去銀行唱先
我: 唱Yen要預早打去銀行留架, 我唱左幾千蚊港幣Yen, 不過應該用唔晒, 你要幾多呀? 我換d俾妳啦,
敏兒: 我要去買好多手信呀, 又要幫朋友買野, 今次大劑, 得返聽日, 點算呀? 唔講住啦, 我要打俾尹兒問佢有無唱Yen先呀, bye bye.
敏兒就是這樣的大頭蝦, 一年後, 只有她們二人去日本生活, 我的確有點擔心.
幸好, 我預留Yen的銀行有很多儲備可以給我換, 我替敏兒和尹兒各自換了6千元港幣的Yen.
接下來要做的就是要去準備敏兒的生日禮物, 因為要放入行李夾, 我不能送真花, 我到麥兜專門店買了一支有幾塊花瓣包著一隻麥兜在花蕾的公仔花. 另外, 我在半個月前, 到潮流特區賣木的鋪頭預訂了一個音樂盒給敏兒. 我打算將敏兒平日最愛吃的朱古力都放在盒內然後送給她.
萬事俱備, 到了出發當天, 我坐機場巴6:45am就到了機場, 在大堂找到位置後, 我坐著等她們來到.
一直等到7:30am, 我見她們拖著行李夾跑過來.
尹兒: 唔好意思呀, 遲左
敏兒: 我地快d 去check in先啦, 阿月, 你第一次坐飛機, 爭個窗口位俾你呀
我: 乜妳唔係都係第一次咩?
敏兒: 我唔係呀, 我好細個果陣阿姨帶我坐過一次飛機架
我: 哦, 咁快d行啦.
去到check in counter, 我們三個人獲編到窗口旁的坐位, 我坐窗口位, 敏兒坐中間, 尹兒坐走廊位. 寄完行李, 進了機場禁區, 我們一起去Popeye 吃了份早餐後才到我們的閘口.
在閘口看到外面一架很巨型, 寫著JAL的飛機, 相信是將會載我們到日本的飛機. 尹兒替我們和飛機拍了一張照片. 過了一會, 有一大班穿著空姐制服的女人在登機閘口前圍起來說著一堆日文, 我不太了解她們說什麼, 但見到她們都很漂亮, 濃妝艷抹, 我忍不住把目光放到她們那兒.
敏兒看到我在看空姐, 可能有點醋意.
敏兒: 咁鐘意望, 上去抄佢地牌囉.
我: 吓, 無呀, 我睇下佢地做乜咋麻.
敏兒: 狡辯, 啍!!!
上機後, 我替敏兒和君兒把行李放上機上的行李櫃, 然後我自己坐下. 這是我第一次坐飛機, 心情不是怎樣緊張. 到飛機起跑離地後, 我看出窗口, 感覺很奇妙. 景物慢慢在眼前越縮越小, 越變越遠, 最後升至雲端, 看下方, 除了雲, 什麼都看不見. 看著這些很有質感的雲層, 我在想究竟海賊王的空島是否有機會存在呢?
飛了大約一個多小時, 突然飛機劇烈震盪, 而且還有一種好像坐過山車的離心力. 我拉緊安全帶, 身緊貼坐椅, 手緊握著敏兒.
我: 仆街啦, 仆街啦, 係咪墜機呀要?
敏兒: 嘻, 唔使驚, 呢個月份成日都有氣流, 係咁架.
雖然敏兒咁講, 但第一次遇到這情況, 我的確好淆底. 這個情況一直持續到離著陸前大約十五分鐘才停下.
下機後, 拿了行李, 過了海關, 我隨著她們坐火車, 然後轉巴士, 到了池袋酒店. 敏兒和尹兒一間房, 我自己一間房. 大家放下行李, 休息了一會, 敏兒和尹兒來拍我房門, 她們到我房間, 大家坐在床上, 講述三天的行程.
今天, 我會跟她們到新宿區, 看看那邊租房價格和附近環境, 還有是到日語學校看看實際情況, 詢問一些資料和查問一下留學時的兼職安排.
第二天, 是敏兒生日, 我們會到日本迪迪尼玩一天.
第三天, 因為是下午航班, 所以會一朝早會拿著行李到銀座區購物.
介紹過後, 我跟著她們走. 其實我不懂日語, 當年街上又沒有大多中文字, 究竟自己去到那裏我是不太了解.
我跟著她們兩人到處走, 聽到敏兒和日本人的對答, 雖然不及日本人流利, 但看著她們和日本人可以溝通. 我突然覺得自己和敏兒有點距離.
我們行到了一個住宅區, 那個區很乾淨, 寧靜, 像我在動漫中看到的日本房屋的格局.
敏兒: 阿月呀, 你睇下, 我同尹兒第時就會係呢區搵間屋住架啦. 呢度環境唔會複雜, 而且好寧靜, 乾淨, 好好架.
我: 嗯, 係呀, 我都覺得呢度環境唔錯, 好過我香港住果度呀
敏兒: 咪係囉, 真係唔錯架.
我們在這個住宅區行了大約兩小時, 仔細的看清整個住宅區. 整個住宅區看來也很和諧, 像蠟筆小新般大的小朋友都是自己上學, 沒有人帶著. 街上看到街坊也會和小朋友打招呼.
觀察過後, 我們步行至一間日本語學校, 敏兒和尹兒和職員一輪日語之後, 職員帶我們到課室外面看學生的上課情況, 像當年入大學mentor帶我們遊學校一樣介紹, 當然, 我不知他說什麼. 看了大約半小時, 我們又坐下聽職員的介紹, 又是一大輪日語, 不知說什麼. 一論日語過後, 職員站起, 送我們到門口, 一個九十度躹躬, 然後呢句我識” Sai 唷啦啦”.
我著我一臉茫然, 敏兒對我說.
敏兒: 我地頭先同佢講我地泥緊想入讀佢地學校, 想睇下情況, 咁佢就帶我地睇佢地上堂情況. 之後我地再問佢有關我地半工讀的話工作安排係點樣.
我: 哦, 明白.
尹兒: 阿月, 其實你唔使咁擔心啦, 到時我地兩個人一齊, 有咩都有照應, 拆得掂架啦.
我: 都係既, 你地d日文都咁叻, 應該無問題.
敏兒: 喂, 都成六點幾啦喎, 不如過去歌舞妓町果邊行下街順便食埋飯囉.
君兒: 好呀
我們看看地圖, 然後坐巴士去到歌舞妓町下車. 兩個女仔直奔化妝品店掃貨, 我就站著負責拿東西, 可能己經有點土餓, 我的嘴不自覺扁起來被敏兒看見.
敏兒: 唔准扁嘴呀, 就快買完啦.
最後, 我們到九點才在找了一家拉面店吃飯然後回酒店. 果然, 購物中的女人是絕對不可信.
到了晚上大約11:55pm, 我拍敏兒的房門叫他到我房間. 我把預先準備的麥兜花和音樂盒放在床上用被蓋著, 敏兒進房後.
我: 敏兒, 妳嗑埋眼坐係床度丫.
敏兒: 點呀? 古古惑惑咁
我: 唔好開眼呀
4分幾鐘之後
我: 10, 9, 8, 7, 6, 5, 4, 3, 2, 1,
然後我揭開被, 扭動音樂盒, 響著<童話>, 遞上一支麥兜花給敏兒.
我: 生日快樂
我吻了敏兒一下, 然後打開音樂盒. 敏兒見到盒內的朱古力, 眼睛立即放光.
敏兒: 多謝你呀阿月, 泥到日本都仲有生日禮物送俾我.
我: 緊係啦, 對我泥講妳係最重要架
敏兒突然陰陰咀笑一笑, 我瞇起雙眼對著她
我: 妳又諗緊d 咩gag野呀?
敏兒: 無呀, 我突然間諗起, 日本比香港快左一個鐘, 所以而家未到我生日啫麻
我: 頂, 俾妳吹脹.
敏兒吐出舌頭, 手摸摸頭, 她的樣子很像個頑皮小孩一樣.
我忽然低頭靜下.
敏兒: 做咩咁down呀無端端
我: 無, 我諗起出年唔知仲可唔可以幫妳慶祝生日啫
敏兒: 唔好咁啦, 我地要珍惜眼前淨低既日子呀, 阿K教架麻
我: 我明, 但係一諗到之後妳要離開去到咁遠地方生活, 有咩事都無得幫妳手, 又無得成日睇住妳……我真係有d 擔心
敏兒: 我知你會擔心, 所以我今次泥睇環境先至帶埋你泥等你睇過之後會放心d啫麻
我: 我知妳好好, 但係始終, 我地要分開幾年, 幾年之後都唔知會點
敏兒用手摸摸我的頭, 嘆了一口氣.
敏兒: 我地要對大家有信心呀, 只係幾年, 我地一定無問題架
我仍然低著頭在鄒眉.
我: 都係既, 應該無問題既.
敏兒: 唔好咁啦, 至多今晚我唔返過尹兒度, 係度陪你啦.
聽到這句, 我立即抬起頭來雙眼放光的看著敏兒.
我: 咁筍??
敏兒見我咁高興, 立即補番句
敏兒: 嗱嗱嗱, 我地一人訓一張床, 你唔好諗住我會同你做d 咩呀
聽到她這句, 我的臉又變熱了. 她果然很了解我, 我確實有這樣想過 =.=”
我: 我download左套極地雪犬, 不如我地一路食朱古力一路睇丫.
我坐在床上, 挨在床頭, 敏兒被我用雙手抱著腰, 挨在我身上, 坐在床上看戲. 聽說表面越外向, 開心的女仔越易哭, 原來是真的, 敏兒看得淚流滿面.
而我, 始終是毒男一個, 孤男寡女, 還要如此親密的抱著看電影, 雖然是很浪漫, 但我確實有點反應, 身體很熱, 而且不斷的在抖.
敏兒因為未曾試過有男朋友, 所以不了解男人這方面的反應. 老實說, 我的確想和她……但理智上, 我控制著自己不做傷害敏兒的事, 所以, 我唯有獨個兒走到廁所JJ……完事後, 我返回床上和敏兒繼續看電影.
敏兒: 你肚痛呀? 去咁耐既?
我在不斷眨眼, 眼珠右望.
我: Er……係呀, 可能有d水土不服呀
敏兒: 吓!!!咁使唔使要d藥呀? 我有呀
我: ok架啦, 我地繼續睇戲啦.
看過戲後, 我們在同一張床相擁而睡. 第一次抱著女仔睡覺, 感覺很幸福, 敏兒身體軟綿綿, 抱上去, 感覺很舒服. 我們就此一直到天亮.
第二天一早, 是敏兒生日的正日. 一早起身敏兒就走回尹兒房間那邊梳洗, 然後我們到酒店餐廳吃早餐. 尹兒見敏兒早上才回房間, 低聲的提醒了敏兒一句.
尹兒: 係呢敏兒呀, 妳記得大肚係唔可以申請泥日本讀書架呵?
敏兒和我的臉變得火紅.
敏兒: 咩呀? 我地好守規矩, 咩事都無喎
我: 咪係, 我地淨係睇戲咋
尹兒: 唉, 大家成年人, 明架啦, 不過想提提你地記得做安全措施啫
敏兒: 尹兒妳個死妹釘, 唔好越講越核突呀吓
尹兒: 哈哈, 得啦得啦, 提醒下妳啫.
我只有搖頭輕嘆, 沒有說話.
吃過早餐, 又是坐JR出發, 可能是閒日, 東京的迪士尼比我們想像中少人. 完全不用排隊. 我們三個人幾乎玩過了所有的機動遊戲, 時間也只是下午四時左右. 因為有尹兒在, 我和敏兒沒有獨處時間, 但沒辦法, 這個電燈膽就是敏兒之後幾年的依靠, 不可以撇下她. 到了晚上, 我們看過花車巡遊後, 才離去.
我們到了附近一個叫新舞濱的車站, 找到一個商場food court吃飯. 我看到一家蛋糕店, 打算偷偷的買一個小蛋糕放在書包.
我: Hello, I want to buy this cake
店員: XXXXXXXXXXX (日文)
我知道英文用不著, 唯有用國際語言. 我指一指那件朱古力蛋糕,
店員笑著臉拿出來.
然後我拿出一張一萬Yen指一指.
他用筆寫了價錢在紙上.
我點點頭遞上我的一萬Yen給他. 然後我伸出手指, 呼, 吹一吹.
店員又笑笑口的給我一支蠟燭.
整個過程很像原始人一樣指手劃腳完成.
我又到便利店買了一個火機.
回去後, 我買了個飯盒.
敏兒: 你行左去邊呀? 買飯買咁耐既?
我: 係呀, 唔識溝通, 攪左好耐
敏兒: 傻瓜, 你搵我幫丫麻
我: 唔使, 手指指咁就攪掂啦我
敏兒: 嗯, 都係
我們吃完飯後回到酒店. 在房間準備一會後, 我把燈關掉. 我在書枱上放著插上蠟燭的蛋糕, 然後又去拍敏兒的房門叫她去我的房間.
敏兒走進來後一臉疑惑.
敏兒: 做咩唔開燈呀你?
我把門關上, 拖著她摸黑的走到書枱前, 拿出火機點著蠟燭.
然後,
Happy Birthday to you! Happy Birthday to you!
Happy Birthday to敏兒! Happy Birthday to you!
敏兒看著點點的火光, 沒有說話.
我: 快d 許個願先啦.
敏兒閉上雙眼許願後, 吹熄蠟燭, 然後吻了我的嘴一下.
敏兒: 多謝你呀阿月, 你幾時買左個蛋糕架?
我: 妳估下
敏兒笑一笑, 沒有回答.
我們把小小的蛋糕一人一口的分享.
我: 今次係我第一次以男朋友身份同妳做生日, 我點都要有個蛋糕先似樣既.
敏兒: 多謝你呀.
吃過蛋糕後, 敏兒這次沒有留下陪我睡.
敏兒: 我要過番去先啦, 廢時果個死人尹兒又話我過泥攪d 咩野呀
我: 好啦, 我送妳過去啦
敏兒: 好呀.
旅程的最後一天, 同樣是兩女力拼銀座商業區, 我帶著三個行李夾走著, 心想, 下次去旅行的話還是兩個人去比較好.
旅程完結, 回到了香港機場, 我送敏兒到她的巴士站上車, 她臨上車前拿了一個疾風傳的鳴門公仔給我.
敏兒: 送俾你架, 你咁乖俾我地勞役左三日, 獎你既
我看著這個公仔, 雙眼閃閃發光看著敏兒, 一來是奇怪不知她何時買下, 二來我確實是對這個公仔愛不惜手.
我: 多謝妳呀敏兒!!
敏兒: 咦, 你睇你個樣幾毒丫, 收好佢呀, 記得好似鳴門咁堅強, 唔好放棄夢想呀
我: 妳咪就係我夢想囉
敏兒: 埋口乖, 我上車啦, bye bye
就此, 我們的東京之旅結束了. 這個旅程的結束代表著我和敏兒一年相處時間的倒數開始.