我的爛Gag女友: 我們的第一個2月14日
今年的2月14日我期待已久, 我深信我真正的初戀將會在當天展開, 我決定在當天向敏兒作出表白. 然而, 我沒有表白的經驗, 表白是否像TBB一樣, 只是大家將臉貼緊, 說一句我鐘意妳, 然後接吻就為之完成? 但接吻過後要如何? 很多問題, 我決定在線上找答案.
在討論區出了個帖, 有很多的膠post, 例如”帶佢去百佳啦”, “行埋去, 除左佢件衫, 然後禁低佢”, “FF 唔該收皮”, 最後還是沒有得出結論.
此時在ICQ, 我見到一個在又一城大學玩仔無數, 將男人玩弄於股掌之中的娘娘online, 她就是Kama. 她是系中的女神, 絕對稱得上是”年少萬兜鍪”. 這句用來形容她最適合不過. 基本上, 我每次見她身邊拖著的都是不同的男仔, 老實說, 我真的很想知道為何麼她的男朋友會不知道她有很多男朋友, 大家每天上學撞口撞面, 總會碰見.
聽說她現在遇上了一個浪子, 她終於掉過頭來給男人玩弄.
她經常取笑我是毒男, 我和她也算是有點交情, 她常常問我借功課抄, 也算是所謂的”吹得兩嘴”. 因為有功課抄, 所以她很樂意和我交換ICQ. 在這個時間見到她, 我知道是上天給我的一個啓示. 我立即send一句message給她.
我: hihi
Kama: hihi, 咁夜既? 掛住我呀?
可能她是職業病, 無論什麼人, 總愛發些令人誤會的message.
我: 係呀, 有野要妳幫手呀
Kama: 幫你, 咩事先?
我: 我想問呢, 點樣同女仔表白架?
Kama: 你想同我表白?
唉, 佢職業病又泥啦…
我: 唔係呀, 堅架, 真係想請教妳呀
Kama: 泥緊要交果份project, 你做好未呀?
我: 得啦, 妳答到我既, 我幫妳做埋都得呀, 唔好玩啦, 真係想問架, 急呀
Kama: 咁認真既突然間? 好啦, 你問啦
我: 我鐘意左個女仔, 約左佢下星期四出泥睇戲呀
Kama: 咦, 情人節喎, Wow~~~
我: 係呀, 所以先要請妳老人家出山打救呀麻
Kama: 咁你本身諗住點表白先?
我: 我諗住同佢食完飯, 睇完戲, 跟住送佢返屋企果陣係佢樓下講, 咁衰左都唔使對住咁耐丫麻
Kama: 第一, 你個心態好錯, 你唔可以未去做就諗住衰左點算, 第二, 你唔係諗住兩個人棟篤企, 就咁講完就算下麻? 你想佢俾咩反應你呀?
我: 咁點會好d呀?
Kama: 你至小都要有d 禮物丫, 即係好似d 手鍊, 頸鍊果d野, 送俾佢, 等佢一應承左就幫佢帶起佢, 咁帶完之後, 要抱一抱又好, 錫一錫又好, 你自己到時睇下氣氛去發揮啦, 大個仔, 自然會識架啦
我: o我!!! 係喎, 要訂情信物喎
Kama: 你d用字真係好鬼死老土
我: 唔好意思, 毒男係咁
Kama: 仲有呀, 你到時記得買花送俾佢添呀
我: 吓?? 花?? 但係佢未係我女友喎, 如果佢唔肯收我咪好燶……
Kama: 唉, 你真係好毒, 到時情人節, 成街人個個都都拎住紥花得佢一個無, 你覺得到時會係你紥花無人收燶d, 定係佢兩手空空同你一齊行燶d啦
我: o我, 妳果然係我女神呀Kama妹
Kama: 仲有呀, 你諗住點講呀到時表白?
我: 咪就咁問佢話我鐘意妳, 可唔可以做我女朋友囉
Kama: 唉, 你唔好咁講呀, 你要諗下d大家以前比較特別既回憶, 講番少少, 跟住就同佢講, 你會俾到幸福佢既咁上下野
我: Kama妹, 我真係唔知點感激妳, 我無以為報, 不如就……
Kama: 你慳d啦, 想又食又拎呀?
我: 講下笑啫
Kama: 總之唔好拎住張卡番泥凋我架呀
我: 好, 一定唔會.
Kama: 仲有, 份project你幫我攪掂啦
我: 這個當然沒問題啦
和Kama談過以後, 我開始對情人節的策略有了點方向, 於是我便在不斷的去推敲敏兒會喜愛什麼樣的首飾呢? 應該買什麼花呢?
第二天, 一放學, 我便一個人走到朗豪坊選首飾, 但這麼多店, 該從那間入手呢? 我每間店都去繞一圏看看, 仍然沒有頭緒. 然後我再想想, 之前和敏兒行朗豪坊時, 她好像有到那間”依沙啤拿”看過, 可以從這間入手.
到了依沙啤拿, 店員沒有怎麼理我, 坐在自己的位置上低頭看著雜誌. 不過, 這樣反而更好, 沒有人去煩著, 可以慢慢挑選.
看了看, 手鍊的款式不太討好, 我過去連我都覺得有點老套, 我改看吊墜. 我鄒著眉頭, 手握拳頭托著下巴, 企定定看了很久. 店員見到我這樣, 知道有魚上釣, 於是就來拉線.
店員: 你好呀先生, 呢幾款吊墜都係新返架, 拎出泥俾你睇下丫
我: 好呀, 我想睇呢三款
店員拿著一個上面墊了一塊黑色絨布的托盤, 將三個吊墜拿出來.
三個吊墜, 一個是天使公仔, 一個是音符, 一個是一條很幼的圓柱.
店員: 送俾女朋友呢? 大約幾多歲倒?
我: 大約廿頭啦
店員: 可以揀天使或者音符啦, 圓柱會比較成熟d
我: 吾吾
然後, 我再想想, 我和敏兒也沒有宗教信仰, 買天使好似無咁好. 佢鐘意周杰倫d歌, 都可以叫鐘意音樂喎, 咁揀音符都ok喎.
我: 我要個音符丫
店員: 拿, 咁你揀埋條鍊泥配個吊墜啦.
全部揀好之後.
店員: 見你送俾女朋友, 我計你平d, 俾個九折你丫, 記得下次要再泥幫襯喎
我: 係既係既.
點解”計你平d, 記得下似再泥幫襯” 呢句野好似好多年前係另一間首飾鋪聽過咁既??
然後要做的是買花. 我去花墟行了一轉, 發覺情人節買九支玫瑰最平一檔要$900圓, 還要是預訂價, 這就是所謂的界女價, 沒辦法. 我到了一間花店選花, 原本以為選花很簡單, 都是一紥紥的買, 沒有花巧, 但, 原來不同花, 和不同數目也有不同意思, 比如
1朵, 對您心有獨鍾
2朵, 我眼中的世界,只有您和我
3朵, 甜蜜戀情 , 永藏心底
4朵, 山盟海誓永不渝
5朵, 無悔無憾
6朵, 願一切順心如意
7朵, 無盡的祝福
8朵, 深深的歉意 , 請您原諒我
9朵, 相愛終生
10朵, 完美的愛情
11朵, 您是我今生的最愛
99朵, 天長地久
玫瑰花, 愛情真摯
然後, 花店的老板娘走過來.
老板娘: 係咪買花呀? 幾時要?
我: 2月14日要架.
老板娘: o我, 咁有無想要咩花?
我: 我唔知呀, 通常示愛用咩花? 用幾多枝架?
其實咁問法我覺得自己好柒, 但係唔識就真係無辦法.
老板娘: 示愛呀, 通常就用9支或者11支紅玫瑰既, 9枝個花語係相愛終生, 11枝個花語就係您是我今生的最愛. 用泥示愛既話呢兩個數目都ok.
看過後, 我選了9枝, 因為我在想, 到時紥花送完後都係我幫手拎全晚, 細紥d無咁攰.
老板娘: 咁你入泥揀下想要邊個款丫.
我揀了一個比較沉色, 用密綠色紙包裝的款式, 這樣好像比較襯敏兒的爽朗性格.
老板娘: 呢款, 得, 見你第一次幫襯, 私人時我幫你加多米仔蘭同幾支桔梗做襯花等佢靚d啦.
我: 好呀, 唔該晒妳呀老板娘.
我突然想起一個爛gag, 玫瑰花代表愛情真摯, 咁桔梗係咪代表拮緊.
萬事俱備, 現在要做的就是等待2月14日的來臨. 每天看著日曆, 日子越來越近, 我的心情越來越緊張. 為怕到時買不到戲票, 我在網上等公開發售時就立刻買下”功夫籃球”的票, 而且買的是在旁邊只有兩個位的情侶座.
日子一日一日的在數著, 終於等到了2月14日, 我們相約7:00pm在SOGO門口等, 看的是7:30pm的電影. 我6時己到花墟拿了花, 之後6:30pm就到了SOGO門口等.
7:00pm, 我電話響起來.
敏兒: 喂, 我到左啦, 你係邊呀?
我: 我企左係SOGO門口向維園果邊呀
敏兒: o我, 我見到你啦
然後, 有個女仔從後拍一拍我, 我轉身去看看.
我: 妳好呀小姐, 有咩事呀?
??: 做咩呀你?
我: ………我識妳架?
??: 我呀傻佬
我停下來, 想了一想, 再仔細看了一看, 我呆了下來, 原來她是敏兒.
平常的敏兒很樸素, 不會化妝, 帶著眼鏡, 通常是T-shirt牛仔褲. 但今天的敏兒, 帶著一頂白色冷帽, 頸圍著一條長長的橙色頸巾, 身穿一件淺啡色的粗冷冷衫, 深啡色的短裙, 加一對深啡色的長靴, 加上她帶了隱形眼鏡和化了妝, 比起平時樸實的美, 今天的她是超凡的美.
我: 敏兒???????
她望望自己的打扮
敏兒: 做咩呀? 我咁著唔好睇呀?
我: 唔係呀, 好靚呀妳今日
我拿著買好的花遞上前送給她.
我: 紥花送俾妳架.
我心想, 唔好而家話俾我知我誤會左唔收呀.
敏兒: 嘩!! 好靚喎d花, 好多謝妳呀
敏兒瞇起雙眼看著我一笑, 我鬆了一口氣, 肯定這紥花絕對沒有白費.
我: 我地食唔切野喎, 不如睇完戲先出泥食丫.
敏兒: 唔好啦, 今日情人節, 道道食野都好貴架, 不如去買Delifrance 入場食丫.
我: 好呀.
我們買了兩份餐偷運入場, 今天, 整間戲院去看戲的都是相相對對. 在等入場時, 我發現很多拖著女朋友的男人也不時閃閃縮縮的把頭轉一轉向我們的方向, 然後又擰開. 大概應該是在偷看今天盛裝打扮的敏兒.
我: 妳今日好靚呀, 妳睇, 幾多人拖住條女都偷望妳
敏兒: 梗係, 我一早就同你講過我天生就係個靚女架啦.
我點點頭, 報以一個微笑.
過一會, 收票員示意可以入場.
入場坐下後, 等一會, 電影開始, 看到有周杰倫, 敏兒基本上是目不轉晴的看著. 開場後, 冷氣開始越來越大, 敏兒今天穿的衣服厚, 她絕對夠暖. 反而, 我今天沒有穿太厚的衣服, 所以覺得越來越冷.
我們一邊吃著Delifrance, 一邊看電影. 漸漸地, 我開始將身體縮起, 然後不斷抖震, 震得越來越利害, 連敏兒也開始察覺到.
突然間, 有一股溫暖圍上我的頸上. 原來敏兒把她的長頸巾分了一半給我繫在我的頸上. 和敏兒繫著同一條頸巾, 感覺除了身體溫暖外, 連心也覺得很溫暖.
到整套戲看完以後, 我想把敏兒的頸巾拿開還給她. 敏兒拿開我的手
敏兒: 你虧呀你, 一齊帶住啦我地
雖然她在串我, 但我也微笑一下, 點一點頭, 沒有去還擊.
我們之後也是一同繫著頸巾在街上逛, 我為她拿著花, 雖然沒有拖手, 但這刻我的感覺是前所未有的幸福. 我們行了大約半小時, 因為明天還要上學, 敏兒要回家. 但今次, 我要求送她到她的家樓下, 所以我和她一同坐巴士.
在巴士的上層, 我們選了較後的位置坐. 同樣, 敏兒坐了一會就睡著, 把頭枕在我的膞頭上. 同樣, 敏兒很香, 無論是頭髮, 身體, 衣服, 總之, 她整個人也很美, 很香. 我很享受現在這一刻, 是我前所未遇的美滿.
到站後, 敏兒和我下車一起行到她所住的大廈. 行至途中一個小公園, 燈光不太強, 我停下來.
我: 敏兒呀
敏兒: 做咩呀?
我: 我有d 野送俾妳呀
敏兒: 咁好? 咩泥架
我在我的書包中拿出了我買了的頸鍊, 雙手遞上給她, 敏兒也相手去接我的禮物.
敏兒: 多謝你呀, 咁行啦
我感到自己的心在砰砰~~砰砰~~砰砰~~, 見她想走, 我有點心急, 拉一拉她的手
我: 不如……
敏兒: 你想我係度拆?
我點點頭.
敏兒拆開之後, 拿起頸鍊, 很開心地笑.
敏兒: 嘩, 好靚喎, 我好鐘意呀, 多謝你
此刻, 我開始認真起來, 身體也不知為何又再抖起來, 握緊雙拳, 而且自己聽到自己心跳的砰砰~~砰砰~~砰砰~~跳得更大聲.
我: 敏兒呀, 其實呢……我好鐘意妳呀, 係我地識左呢年幾入面, 我地經歷左好多野, 從O camp我地相識, 我地係學校一齊讀書, 我地五人組一齊去澳門玩, 到我地一齊睇住阿K走, 我地都係一齊, 我發覺我唔可以無左妳, 我……我……
而家我連口都震埋.
唔知點解, 我好似日本漫畫咁, 九十度彎身向住佢, 諗起都好柒
我: 我好鐘意妳呀, 我求下妳做我女朋友啦, 我會俾幸福妳架.
敏兒: 咁你又唔使躹晒躬咁大陣仗, 平身啦.
我: 咁即係點呀?
我握著敏兒的雙手互相對望, 敏兒的臉在昏暗光下, 有一點點的變紅. 然後, 她低下頭, 點一點頭
敏兒: 嗯
我開心得即時像個小孩般跳起.
我: 好野, 好野
亢奮完後, 我想起了有點東西還沒有做.
我: 丫, 係喎, 我幫妳帶起條鍊佢丫
敏兒: 好呀, 唔該阿月.
我企在敏兒前面, 將雙手伸向她頸背, 為她帶起頸鍊, 帶好後, 我的手沒有拿走, 直接就把她抱住. 此時我還帶著微笑, 還是後開心興奮.
我們像TBB的劇一樣, 兩人額頭貼著額頭, 雙眼看著對方的眼珠, 在看著對方眼中的自己. 然後, 我把臉再貼緊一點, 我們的鼻也貼在一起. 再之後, 再貼一點, 我終於把我的雙唇貼在敏兒的雙唇之上.
此刻, 我們交換了大家的初吻, 我們都緊抱著, 閉上眼睛, 享受著四唇緊貼, 甜美, 溫軟的初吻.
因為大家都沒有接吻的經驗, 我們不懂什麼濕吻之類的東西, 只是在享受著普通接吻的奇妙感覺.
我們都不捨得失去這種感覺, 所以我們抱在一起, 抱了很久, 我都不知到有多久了.
表白成功後, 我送敏兒到她樓下, 現在的她, 帶著頸鍊, 抱著我的花, 嘴上帶上戀愛的甜蜜, 向我揮揮手道別. 我看著她入電梯後才離去.
行一會, 敏兒來電.
敏兒: 係喎, 有d 野我要同你講清楚先個喎
我即刻好淆底.
我: 妳唔係想反悔呀? 唔好咁對我呀~~~
敏兒: 唔係, 我只係想提你, 我出年九月, 即係畢業之後會同尹兒去日本讀書讀幾年個喎, 你要有心理準備喎
我: 無問題, 莫講話幾年, 我等一世都會等妳架
敏兒: 等一世? 我唔番泥既話你點呀?
我: 咁我搬去日本同妳住囉.
敏兒: 係你至好講. 仲有呀, 而家你係我男朋友我先至提出呢個要求.
我: 咩呀?
敏兒: 其實你個look真係要執執佢呀, 你d衫仲成個細路仔咁, 我地搵日一齊去買衫丫
我: 好呀, 無問題
敏兒: 仲有呢, 你記唔記得果次我好凍, 你披件褸落我個身度既
我: o我係呀, 我記得呀, 妳個樣仲好冧咁架麻
敏兒: Er……其實果下我係覺得你件褸好臭, 但係又唔好意思叫你拎開, 你幾耐無洗呀?
我: Er…….我好似前年洗過一次
敏兒: 咦……你好污嘈呀
我: 得, 我返去即刻叫阿媽洗呀
敏兒: 係喎, 都成兩點啦喎, 呢度無車, 你點番去呀?
我: 我諗應該都有d通宵車既, 我係附近搵下啦
敏兒: 你去xx商場果度丫, 果度有個巴士站, 有通宵車出旺角架
我: o我, 好呀, 都夜架啦, 妳聽日仲要返學, 妳快d 訓啦, 我得架啦
敏兒: 好啦, 咁你番到屋企send個sms俾我啦喎
我: 係!!! 敏敏!!!
敏兒: 你好肉麻呀你.
最後, 我五點先返到屋企, 雖然好辛苦, 但係今年的情人節是我有生以來感覺最幸福的一年. 我期望和敏兒可以一起將這份幸福永永遠遠的延續下去.