我們中，出了個叛徒: Line 20

　　「阿晨，我地……」阿凱停了一停，旁邊的阿儀好像打了個眼色。「我地不如聽下阿晴你地個邊揾到咩？」
　　我們的目光自然地轉到阿晴身上，不過我先搶說：「首先我要交代下，可能其他隊員唔係太知咩事。原本我同晴晴一組，阿朗同玲姐一組，咁大家知我地兩組一開始都係行大路，所以一開始我地都係一齊行既。」
　　我望向玲姐，她明白我的意思，續說：「之後因為我既能力，我地商議過，就由我去視察黑夜事件既情況，然後夠鐘就直接蒞集合。」
　　「之後阿花就同我地講阿謙唔見咗。」我刻意用述說方式，因為這場遊戲已經不簡單了。「我地決定分阿朗，去同阿花行返阿花個隊行既路，順便揾阿謙，咁結果係？」
　　阿朗立刻說：「冇！佢真係唔見咗！」
　　看他說來慚愧的臉色，我也相信他真的跑了一遍，沒有說謊。
　　「好，咁之後我同晴晴好不幸遇到伏擊，又好好彩畀我地走到，但係就整傷咗少少。冇幾耐Hugo同……」我深呼吸了一下，他們都忍不住低頭又或是搖頭。我笑了一笑，續說：「同芷君就蒞睇我地個隊，咁我其實就有私心，就想同芷君一隊……」
　　「唔係咁樣架，阿晨係因為我整親，所以先至叫Hugo睇實我，咁我真係唔行得，佢都可以孭我走。」晴晴搶住說。
　　「點都好啦，之後你地點？」阿儀問晴晴。
　　「我同Hugo其實係跟Hugo佢地本身咁樣行，周圍探索下咁，因為我整親，所以我地都係時快時慢，不過冇乜遇到怪人。」晴晴說。




　　「咁有冇搵到啲咩？」阿凱問。
　　「冇呀，Hugo，我地條路都好似冇乜特別？」晴晴說。
　　Hugo點了點頭。
　　「哦。真係冇呀？」阿凱說。
　　「你咩意思？」Hugo問。
　　「冇呀，哈哈。我想知道下唧。」阿凱說。
　　「我地條路係冇乜特別，咁有幾奇？你有好多咩而家？」Hugo說。
　　「都係我唔好，好對唔住。」晴晴說。
　　「阿凱唔係咁既意思，我地只係緊張想知揾唔揾到關於出口既線索即。」阿儀說。
　　「有我地重唔拎出蒞咩？重使留係到？金融界人，我呸！」坐在我旁的Hugo不屑卻又細聲地說。




　　「我係聽到你講嘢。」坐最遠的阿凱說。
　　「吹啊？我就剩係想你聽到啊！」Hugo說。
　　「好好玩呀而家？咁大個人啦！重係到浪費時間鬧交？如果卓狗佢地真係蒞對付我地，我地點搞？」玲姐忍不住發怒。
　　眾人無言……我見平靜了，才說：「我諗大家都太緊張，而家呢個遊戲我都重控制緊局勢。」
　　眾人的目光又開始回到我身上，我續說：「我既意思係，就算卓狗佢地真係叛變，我地都有足夠能力應付。不過呢一步我地等陣再傾，要快啲揾到出口先。」
　　「阿晨講得啱。」阿朗說。「我地個隊揾到以下呢啲記號，唔知有冇幫助？」
    他從一個小錦囊中拿出了好幾張便利貼，上面是一些奇怪的記號，有點像⋯⋯還沒看清，阿凱就拿開了，與阿儀邊看邊討論。
    「你叫我地做既野，做齊咗。我地條路係奇怪，但全部都係呢啲公仔。」阿朗說。
    「喂，你地睇到啲咩，講蒞聽下。」玲姐說。
    見阿凱說了些話，阿儀點了點頭。他們便把那幾張便利貼交到圈子中央。




    阿儀說：「冇呀，我地好奇睇下咩蒞⋯⋯但都睇唔明。」
    「蝴蝶？花？有啲屋咁樣，重有好奇怪既點點。咁樣點知代表啲乜。」晴晴說。
    「怪就怪在我地成條路有意無意都係呢啲符號。」阿朗說。
    「咁阿儀你地呢？搵到啲咩？」我說，我想不只我，感覺他倆神情帶點怪異。
    阿凱搖了搖手說：「我地初初冇留意，但係之後都搵咗啲英文字母，但係湊唔到一齊。」
    「不過我想講明先，唔好怪我地自私。我地想分開傾。」阿凱說。
    「好，咁我地分開解難？最後先再睇下點組合返一齊，做第二步。」我搶在前頭順他的意思，反正反對只會更浪費時間。
    玲姐、阿朗他們雖然不太願意，但見我一口答應這方法，也只能點頭答應。我設了個時限，為求令旁枝的說話減少。
    「點呀，你地唔信佢地？」我被阿凱一隊拉一旁，說。
    「算係啦，我地唔係好信晴晴佢地。」阿儀說。
    「佢地冇野喎，我睇落都ok。你地擔心晴晴？你地唔識佢架咋，佢係咁架，慢熱又有啲驚青。但做野ok架。」
    「阿晨，我聽既野畀你多，我勸你唔好咁早落決定。尤其係晴晴呢隊，一個搏同情，一個做野，又可以護住佢，咁樣好危險。」阿凱說。
    我無言以對，只能問：「咁你地搵我做咩？」
    「阿晨，我地想問下你，我地都搵到啲線索，但係唔識解。我知可能你而家冇乜心機，但係我地真係解⋯⋯」阿儀說。
    「得架啦。瞓咗咁耐，咩都過去。你講啦，我盡力啦。」我說。




    阿儀點了點頭，阿凱貼近我耳邊說：「s,n,l」
    「吓？」我不明白，又說：「我寫低先。」
    阿儀連忙說：「唔好呀，我地就係唔想寫低⋯⋯」
    看來他們早已進入遊戲的法則，我便說：「係得呢幾個？」
    「係，本來重有一個，但係之前出現，冇記低。」阿凱說。
     「阿晨，靠你啦。」阿儀說。
     我本應該要說點什麼，但另一邊傳來聲音：「阿晨，過一過蒞好嗎？」
    我示意一下，對他倆微笑一下，便轉身向另一方向走去。
　　三秒後，我回頭過來，對阿凱說：「既然你地想分開傾，咁阿凱你就唔好用你嘅能力，唔係就對其他人太唔公平。」
　　阿凱笑了一笑，點了點頭。但他倆如此不信任其他人，我說的話，他又真的會聽嗎？
　　「佢地揾你做咩？」玲姐焦急地問。
　　「冇呀，佢地問我身體點咋嘛。」我不知該不該告訴玲姐，阿凱他們的想法。
　　「阿晨，我驚咁樣落去，我地自己都分裂哂，咁好大獲。」玲姐說。
　　「我明，但而家好難解決。我覺得而家係去到一個中間位，我地又走唔到。揾唔到出口；又揾唔到叛徒。更加冇人回應我地一舉一動，出面嘅怪人又剩係聽命令做嘢。」我說，我只能夠說點現實，盡可能免卻個人的感覺。
　　「所以堅持落去？」阿朗想了一想，問我。




　　「堅持。但同時要諗快啲，我地每一步都畀人監視住，又唔知卓仔佢地而家係到部署啲乜，再唔團結就玩完。」我說。
　　不待他們點頭，我又問：「係呢？玲姐，你都揾到啲線索之類？」
　　玲姐正要答話，剛去洗手間回來的阿花招了招手，說：「晨晨，過蒞呀。」
　　「我等陣話你知。」玲姐示意先去見阿花。
　　我順她意思，大叫：「唔好再咁叫我。」
　　走到阿花旁，她便左看看右看看，看看我臉，又看看我的身上那些瘀青和輕輕包紮過的位置。
　　「你冇事就好啦，我一開始見到你好似條死屍咁行過蒞，不知幾驚。」阿花說。
　　「Please…唔好浪費時間啦好嗎…….」雖然感謝她的關心，但顯然我更在意當下的問題。
　　不過……這話還是沒有說出口。
　　「冇事，我識保護自己。」我說。
　　「咁得啦。你好快啲解我地個組嘅密碼，我地就一齊出去。」阿花很認真但又傻氣地說。
　　「得啦，我盡力啦。如果你個好朋友係到，佢重想解過我呀。」我說，我指的是我們一個共同朋友。我也只是隨口說說，反正他不在這世界中。
　　「佢？如果佢係叛徒，第一個就殺你先啦。你玩遊戲咁醒，實阻住佢嬴。」阿花興奮地說。就在此時，她忽然伸手碰我手臂上那個很明顯的瘀青。
　　我驚了一驚，雖然只是輕輕觸摸，但痛楚瞬間傳到全身。提示我下意識向下一退，手也一縮。
　　「Sorry啊，我唔知你咁痛。我興奮得滯，冇心架。」阿花說。




　　我也看出這下動作，只不過是阿花的興奮動作。她平時就愛莫名其妙地拍別人肩膀，又捉住別人的手什麼的，我也不是不習慣。
　　阿花邊與我往玲姐那邊走，邊細細聲說：「阿晨，唔知點解。我重係好不安。」
　　「不安？做咩不安？」我連忙問。
　　「唔知點解架咋。就好似而家咁，我地又得返八個人，跟住呢到而家又分裂做幾個幾個咁玩小圈子。係咪唔妥？」阿花問。
　　我不知道怎麼回答，也不想我成為其餘七人的心靈輔導員，我反問：「咁你會點做？」
　　「緊係你教我點做啦，我點識唧。你話我知啦，你話點做，我都可以跟。但係學玲姐講，我地八個點都要齊整。」
　　「唔一定得。」我沉了一沉，壓低聲音說了令人難受但又現實的句子。
　　「我知，咁你咁多橋，實諗到架係咪？」阿花說。
　　「其實，你係咪重有嘢想同我講？」我質疑她的動機。
　　她眼睛像發光般望住我，說：「點解你咁勁嘅。我唔肯定，不過我唔知點解覺得，係我地八個入面，一定有人係叛徒。」
　　一個本可以得知所有人身份的人，竟然用如此猶豫的句子回答，實是可笑……