唔係掛！原來真係有鬼！－現代捉鬼故事: 第五章 - 供與求 - 14（續）

我拎住個手提盒步出呢一間以成人用品超市黎做掩飾古怪既商店， 
電梯大堂內依然有一班小朋友拎隻手不停Fing。 
雖然班家長已經唔同左，但係佢地對我既眼光依然都係不抱一絲好感。 

我冇理到佢地。 
我只在意手上呢一個盒。 

冇錯，我只係做左一個小小既消息者， 
又或者o係世人眼中，我已經做左條超級大水魚（其實係我師傅）。 
不過我自己唔在意，因為今日呢一刻，係對自己既一個肯定。 





我依家既心情就好似一個o岩o岩準備升讀中學既小學雞， 
身邊既一切對我黎講我已經唔再在意， 
在意既係自己未來會行一條咩路，會成為一個咩人。 

由褲袋傳黎既震動，令我不禁拿出我既手提電話。 
「你o係邊呀？」原來係Smoky 既whatsapp。 

「師傅來左我去買野呀！」 





「又係買毒男figure呀？唔好群佢咁多呀！」 

「唔係呀，係d捉鬼器材。」 
當我醒覺既時候，已經太遲。 
呢一句說話已經發送到Smoky 既手提入面。 

「仆街喇！」我心諗， 
竟然對一個留o係人間既靈體講我依家要做捉鬼天師， 
咁同個豬肉佬同隻豬講我要同你做好朋友有乜分別？！ 





正坐緊地鐵返屋企既我恨不能即刻跳軌， 
轉車去搵Smoky 解釋，不過我諗呢個結會比女朋友發現自己電腦入面有一個叫「棍波驅動程式」既影片folder更難解。

正當我苦惱要如何解畫之時，電話再次傳來震動。 

「係呀？咁你要小心呀！你咁大頭蝦！」Smoky 如常對答。 

「你唔反對？始終你都係...」 

「傻佬，我又唔係你邊個，點會反對呢！而且你爸爸又係做呢行，你會行上呢條路都理所當然。」 

「咁又係...喂！咪住！你點知我老豆做呢行？」我突然醒起，我好似由始至終都冇提過我老豆姓甚名誰，又或者係從事咩工。 

「你估香港好大咩？香港又得o個三幾間捉鬼公司，你日日師傅前師傅後，要搵你師傅出黎有幾難！再者你爸爸o係呢行好出名架！不過我都係識左你之後先知你有個咁勁既阿爸！」 





「下，乜我老豆好勁既咩？」大半個鐘之前，我都仲以為我老豆係一個普通以裝修師傅黎包裝既風水佬。 

「呢ｄ留番其他人同你講啦！哈哈～」 

望住個電話，再望一望地鐵既車箱。 
我對面既車門附近既位置，天花燈一閃一閃。 
燈下有幾位 『朋友』站於角落位。 
我對佢地輕輕點點頭。 

『朋友』落車之後，天花燈亦慢慢回復正常。 
突然我諗番起，以前細個好多人都話，電器如果突然唔正常， 
只要拍一拍佢就會好番。 

可能靈體會令到電器出現異常干擾，而拍一拍電器只係請附近既朋友離開。 
突然我發現，我對身邊既世界，原來太一知半解。