唔係掛！原來真係有鬼！－現代捉鬼故事: 第四章－達德行－26

「快ｄ啦！」Smoky 見女鬼同我地愈黎愈近，亦心急催促。

我對住3個濾咀，大啖一吸。
香煙隨火光洗禮，由雪白既煙紙變成烏黑既灰燼。
香煙既味道唔似平時既煙，完全冇煙草令人辛苦既感覺。
相反呢支煙既中藥味令自己精神更集中。
有股熱氣由肺擴散到全身。

「噴佢啦！」





女鬼已經處於離自己幾步之隔。
一啖白煙由我面前飛向紅色女鬼既位置。
以我多年放飛劍既經驗同能力，
我敢講呢一啖既命中程度一定高過東洋國d 愛情片埋尾o個下”HEADSHOT”。

「呀！！！！！！！！！！！！！」
女鬼 『中彈』之後突然大叫，
其高音程度一定勁過莫華倫。

我同SMOKY蹲下，以雙手護耳，




以免被佢既叫聲令自己聽覺系統出現永久性既損害，
學歐錦棠話齋，職業性失聰係冇得醫既。

圍繞女鬼既紅色氣牆慢慢由血紅色淡化為粉紅，
光芒亦慢慢減弱。
女鬼半透明既身軀慢慢變成實色，
甚至肉眼睇起上黎，只係一個普通人既外表。
下半身本來模糊既驅體，
雙腳開始慢慢現型。
之前佢既莫華倫式高音，依家聽番頂多都只係好似May 笑o係我耳邊笑咁，




雖然惡頂，但係唔掩住耳亦可以接受。

「點解....會咁既？」我眼定定咁望住面前幾秒前仲係對我張牙舞爪，
幾秒之後變左個普通中女Miss 既女鬼，我不禁回頭問Smoky。

「你唔好理住啦！快ｄ制服佢啦，你得少少時間架咋！」

「點制呀！？佢可以穿得過架喎！」
「依家唔係架喇！你快ｄ試下啦！」

「咪老點呀！」我回頭望住Miss，
Miss 個樣依然猙獰 ，但係依家一睇，極其量只係一個去百佳買完野，
比人呃左一個印花，依家投緊數既太太。