唔係掛！原來真係有鬼！－現代捉鬼故事: 第四章－達德行－15

等齊大家之後，我地一行七人正式起行。
窗戶後既房間就好似步入左另一個世界，
空氣中唔再有頭先有講有笑既輕鬆氣氛，
廢校入面既頹垣敗瓦亦唔會帶比你有一絲安寧。

雖然已經破爛不堪，但係從房間入面既垃圾、木屑同殘留物黎睇，
唔難睇得出呢度曾經係一個班房。

破舊既書檯、教師檯，牆身大部份已經掉落既油漆跡，
相比之下，我寧願返返去頭先既濃霧之中。





「好喇，行喇！」Yan 見我地齊人，亦急不及待再開始旅程。
大家經過老伯一役後，大家都變得放心同輕鬆。

穿過左只餘下門框既班房門，我地黎到學校地面既走廊。
望番出操場，除左一個少少既台之外都冇乜特別既事物。
個台應該係以前學生集會時，老師又或者校長要黎發言既地方吧。

我地俗走廊一直行，每一間房都相當破爛。
不過由地上既bb彈黎睇，應該都有唔少膽粗粗既wargame 友黎到呢度打wargame。





走出左班房之後，我地續間續間房”參觀”。
教員室、資料室（照d擺設黎睇應該係好似圖書館既野)。
以幾十年前既資源黎講呢間學校其實已經相當完善。
好難令人覺得佢會因為其他原因而倒閉。

經過幾間唔同功能既房間之後，
前方有一個比剛剛每度門都要大既門框。
照門框大小黎睇，分分鐘可以裝得落兩度門。





ｕ字型既學校，兩旁分別係兩層既校舍，
而u字中間既接駁位，亦即係我地身處既位置，
就係學校建築既中間點，學校既禮堂。

我地步入禮堂，禮堂建築雖然只有一層，但係樓底就比其他地方既樓底都要高。我地不禁抬頭望望禮堂既上半。天花板既石屎 亦有部份已經剝落。
所謂既禮堂其實只係更空礦同垃圾更多。

我地慢慢一步一步深入禮堂，
慢慢我感覺到我踩住既唔單單只係石屎。

「呀！！！！！！！！！！！」Bella o係呢個時候大聲叫。
呢一刻我知道我冇feel 錯。