唔係掛！原來真係有鬼！－現代捉鬼故事: 第四章－達德行－13

我們再次聚集於牌匾之下，探討之後既去向。
Bella 同肥榮頭先已經比看更阿伯嚇到三魂唔見七魄，更唔好話要佢地繼續旅程。

相反Yan 頭先受過老伯刺激之後，好似對達德更加有興趣。
而Phoebe 同Hidy 知道老伯唔係鬼之後亦比上山之前睇落更大膽。

「頭先老伯比曬貼士我地，叫我地搵個窗口爬入去喎，依家點先？」
Yan 見大家企定定冇乜反應，率先睇睇大家意見。

「下...仲黎呀....頭先個阿伯同隻狗已經嚇死我喇...」雖然手提電話既燈光唔足以令我睇清楚Bella 既樣，但係聽佢把聲已經知佢依家情況。





「係啦，不如今日到呢度啦。」有時我真係覺得肥榮同Bella 幾夾。
「但係頭先有個看更o個度，都應該冇事啦，如果有鬼佢神早就唔做啦！」
Hidy 試著同大家分柝，想說服肥榮同Bella 繼續旅程。

「其實你地兩個唔去都得既，不過我地就應該會再入去學校。你都知啦，頭先條路有幾黑，一陣你地兩個有乜事就唔知點算喇。」我唔係要以退為進，
我只係真心擔心佢地有乜事。大家眼中覺得頭先個看更可能只係普通大叔，
但係事實就係，呢位高人，唔知咩原因，所以留ｏ係度做食蕉。

「咁你都o岩既。」Bella 輕輕點頭。




「應該都冇事架可？」

「唔會有乜事啦！就算有事，榮哥仔都會保護你啦！」Yan 笑住咁講。

我望一望Smoky，睇下佢想唔想行落去。
自從頭先離開左學校之後，佢就一直冇出過一句聲。
又或者話，佢今晚都冇乜點出聲。

「喂，你點呀？」我用手肘輕輕撞左Smoky 一下。





「冇..冇呀。」

「心不在焉咁，好驚呀你？」

「唔係呀...不過頭先個阿伯好怪...佢對你做左d咩？」

「咪又係o個d！」我都唔知點講解比Smoky 知。
其實Smoky 一直都知我係有d特別既方法去整蠱人，但係點做法佢就唔清楚。
如果比佢實實在在咁知我識用幻術，我諗我真係好唔得閒。

「古古怪怪咁，我話你呀！」Smoky 用食指向我鼻頭篤左兩下。
我用手捉住佢既食指，作狀要咬佢一樣。

「仲玩！佢地走曬喇！」我在望望Smoky 面向既方向，
原來大家已經沿學校外圍行，去搜索老伯口中既「第二個入口」。