唔係掛！原來真係有鬼！－現代捉鬼故事: 第四章－達德行－7

「達德學校丫。」坐車頭既肥榮同司機講。

司機亦隨之開車。
我以為司機會有d咩大反應，
又或者，呢個年頭上去探險既人真係太多。

「後生仔，上去撞鬼呀？」司機單刀直入，
冇花言巧語，亦冇修飾佢既用語。

「係呀，上網d人講到佢亞洲第一猛鬼地方咁。」 Bella 點答司機。





「亞洲第一？唔怪得依家咁多o靚仔上去啦。」

「司機，你...有冇聽過人...o係上面撞野呀？」肥榮帶住恐懼咁問司機，
希望可以o係司機口中証明網上既都只係傳言，亦等佢自己可以求個安心。

「緊係冇啦！有我邊敢車你地上去咩！」呢位司機其實都幾直腸直肚。
「不過傳說就聽過個！」司機補充。

「講黎聽下丫！」Bella 話口未完就搭咀，因為佢知道如果比肥榮搶先回答的話，




肥榮一定會用盡方法叫司機唔好講。

「阿叔就唔會同你講乜野真人真事既！
多數ｄ電台講得呢句都係吹水多啦！
我聽講以前呀，間學校未執o個時，有一次上面發生火警。
好多小朋友都走唔切燒死左。o個時個校長因為呢件事，
比街外人話左好耐。最後佢自己受唔住壓力o係學校入面吊頸死左。
不過呢d都係聽返黎o者，信不信就由你喇！」

司機大佬對呢個故事既純熟程度就如每個爸爸媽媽對住佢地既小朋友講狼來了既故事一樣咁熟。我敢講呢個司機大佬都應該o係呢頭打滾好多年。





「Let's see，我就唔信囉！」Bella 以佢女皇既氣質回應番司機大佬。
另一方面佢同時打量緊我個背囊 。

「咁大個背囊既？帶左d咩呀？」Bella 引起左大家對我背囊既注意。

「咪又係d 水呀，電筒同野食囉。」所謂電筒其實只係手機既flashlight，至於ｄ野食，其實係我上星期上完占卜堂之後去阿信屋買完野，冇執到個袋，所以今日成個袋帶左黎o者。

「你又幾體貼wor。」Bella 用手肘輕輕撞左我一下。

由於學校位於山腰，司機只可以送我地到山腳。
「睇黎你地今晚有伴喎。」司機大佬將車停o係行人路邊，佢口中所講既有伴，其實就係三小花。

「好喇，如果你地今晚要車走，就打比我啦。」司機大佬臨行前比左張卡片我地。





「玩得開心ｄ喇！」臨行前拋底一句。
搞到成個氣氛好似去緊效遊咁。

「好喇！我地出發喇！gogogo！」阿Yan一聲號令，
大家就開始沿上山既小路，向達德進發。