唔係掛！原來真係有鬼！－現代捉鬼故事: 第四章－達德行－6

九點三十分。
我地各自食完野，集合地點係元朗廣場。

講真我咁大個仔都冇乜幾可入元朗，元朗對我黎講只係一個賣老婆餅既地方，
希望今晚之後唔好令我既印象有太大改變啦。

一如以往，我都早到左少少。
見仲有時間，我就自己上左三聯睇下書。
細個自己好少睇書，自從呢幾個月，對異能既事知多左，
自己都開始睇唔同既書，希望可以O係書入面得到更多既概念，




有Ｄ咩唔明都可以問師傅嘛。

「whatsapp:
Ｓ;) :到邊呀？」

「一早到左啦，O係三聯。」

「大家都到曬喇，快Ｄ黎的士站啦！」

望一望錶，原來已經9點8。




我放低手上面既蘇蜜蜂流年運程，飛奔落去集合地。

「等左好耐喇？」我已經以九秒九既速度跑落去。
的士站只有Bella，肥榮同Smoky。

「佢地三個呢？」我望望大家。

「佢地話7個人點都要分兩架的事坐，所以佢地行先喎。」肥榮雖然好似冇乜野咁，但睇佢印堂發黑，雙目無神。我唔係想話佢黑仔，但係睇佢個樣，琴晚一定已經驚到冇覺好訓。相反Bella 同Smoky 就同平時一樣，肥榮你真係男人既恥辱呀！

Smoky 食埋佢最後一啖煙，之後將煙頭掉落的士站旁既煙灰缸。




「呢度好似唔食得煙架。」我咪起雙眼，以少少教訓既語氣同Smoky講。

「呼~」Smoky 原來頭先只係吸左啖煙，仲未啖出黎。
佢對住我塊面一次過把佢肺入面既煙噴落我度。

「頂，你呢ｄ咩煙黎架，成陣中藥味既。」
與其話Smoky 噴落我度既煙臭，倒不如話陣味怪。
煙霧連丁點煙草同尼古丁味都冇，相反就係ｄ古怪中藥咁既味。
又或者我個鼻已經比佢噴到失左靈。

「上車喇！仲耍花槍！」Bella 打開車門上左後座，
肥榮正準備跟隨觀音上車。

我同smoky 對望左一下，
同佢之間從未有過如此尷尬。我只覺得有鼓熱氣湧左上塊面，希望塊面唔係好紅啦。




「你咁大隻，坐前面啦！」Bella o係我地兩個發難之前講番句人話。
趕肥榮去前座。

我隨之上車，唔想比人見到我塊面有幾紅。
「放心喎，我識做，一陣一定比機會你。」Bella o係我上車坐左中間位之後，細細聲同我講。
「....哦....多謝你先喎咁....」我已經唔知自己講緊乜。
如果語言不通可以係一種病，我諗我呢下係屬於末期語癌。

「唔駛客氣wor 關公！哈哈哈。」從Bella 呢句，我已經知道我塊面有幾紅。

「有咩咁好笑下？開心share開心share。」肥榮驚死我同佢女神有Ｄ乜野咁，見到Bella同我細聲講，大聲笑，認唔住問。

「關你咩事o者。」Bella 凶猛咁回答。

「碰！」Smoky 都上埋車。





「去邊呀？」司機大佬冇比我地繼續傾，
咁當然啦，我地一路講，佢一路開唔到車，後面其他的士佬就多得佢唔少。