唔係掛！原來真係有鬼！－現代捉鬼故事: 第四章－達德行－4

之前我地提過音樂可以分到每個人既性格，
其實我相信野飲都可以。

飲Mocha 既人，大部份都係社會新鮮人。
想比人知道自己同一般mk唔同，所以坐starbuck。
但係又怕自己唔係飲咖啡的話會比人睇唔起，當成小朋友。
所以飲得計我話，飲mocha 既大部份都係小學雞。

飲latte既人，嘿，我只能講呢班真連奶都未戒。
唔駛講ｄ乜，小朋友，飲奶，所以鍾意latte。





飲果汁既就更加唔駛講。

o係我面前既一檯人，全部都係飲呢3樣野。
不知所謂，等我比你地見識下乜叫真男人既飲品。

「喂你飲乜呀？我幫你買埋。」去買男人既飲品之前，
我巡例都問問Smoky 想飲乜。

「唔使喇～唔該～」





「你成日乜都唔食，因住餓死你。」

「我唔飲野咋嘛，幾時有唔食。」Smoky 對我做左個鬼臉以表不滿。

我帶住我既Espresso 返埋我既位置。
每個人都報以好奇既目光望住我。

當然啦，一班小朋友又點會識飲。
真男人，就要飲Espresso 。




濃列既咖啡味道貫徹每一個味蕾，呢種感覺一定唔係d小朋友飲品可以相提並論。
我刻意望一望肥榮同佢o個杯Ice mocha，呢一刻，我深信我已經完勝，成為本日最有魅力美男子。

其實我都係第一次飲，為左同Smoky 出街既時候唔會再出現上次自家烏冬類既事件，我刻意去留意每一樣現時年青人最常做既野：去邊買衫啦、呢排興咩ｋ歌啦、有咩好食啦、同埋去cafe 要飲乜。基本上除左去買衫，我真係乜都冇同Smoky 做過；Smoky 就好似一個除左煙乜都唔駛食既女仔。兩個月以來，大部份星期六落堂佢都會同我行街，而最後食飯既，往往都只係得我一個。

「喂喂！你地有冇睇新聞呀？」帶起話題既依然都係最多野講既Yan
「無呀，咩事呀？」三小花之一既Hidy 運用左佢既八婆能力，成為第一個回答者。
「琴日有班人去左元朗間唔知咩學校探驗，之後撞鬼呀！」
「係唔係達德呀？」Bella回答。
「係呀,你又知？」
「緊係知啦，佢真係好famous架囉，個個上去都話見到紅衫女鬼架，連national geographic 都有報導過架。」Bella 又中又英咁回答，試圖令大家覺得佢見識廣搏。
「不過呢d咁唔logical既事我係唔會信架囉。」鬼唔logical，老實講，占卜都唔logical架。

「你地....」Yan 故意將聲音扮到陰聲細氣，
「夠唔夠膽....」佢慢慢咁將自己哄埋我地每一個塊面，巡視左我地每一個既表情。




「一齊去探~險~呢~？」Yan本身想用眼神打量我，我報以一個呵欠以示我沒有半點驚慌。佢見我冇乜反應，就將視線轉移到肥榮身上。

肥榮將手收於大脾之下，緊閉雙唇，額角亦開始霧汗。
原來有時唔係大份就等於大膽既，特別係o係呢d時刻。

「點呀,你敢唔敢去呀？下？阿榮少？」Yan老早已經睇穿肥榮，特登當住佢女神面前提問。

「唔係咁好既，聽講o個度o係半山，我怕大家會易整到呀．．．」我以為肥榮咁大件，轉數一定好慢，原來又唔算。剎那間佢就為自己搵左一個唔駛去，而又可以將責任推比其他人既借口。

「下，但係我想去睇下，同身邊朋友prove 番呢個地方係冇ghost 架wor。」Bella 用佢o個把嬌嗲既聲音想拉埋肥榮落水。
如果唔係靠左兩三個位，我真係想企起身之後一巴就車埋去。

肥榮受到觀音加持，依家就緊係乜鬼都唔怕啦。
「咁好啦，你咁想去我陪你啦。」原來當兵就係咁既一回事、





「咁我當你去喇！」阿Yan送佛送到西，唔比肥榮有任何轉彎餘地。

「Smoky 你去唔去？」Hidy 呢個時候就問我身邊既Smoky。「咁大家都去，我都冇所謂架～哈哈」Smoky 回答。
「咁你呢阿俊？Smoky 話大家去佢就去呀，你唔去就分分鐘大家都冇得去架喇！」
 「咁既然大家都OK，我冇理由托手踭架。」我故意四圍望下大家。
「你話係咪？」最後將視線返到Yan 身上。

Yan 同我四目交投，深呼吸左一下，吞左啖口水。
佢開始發現同我對望既時候會有種不安感。
當然啦，學神仙ｂ話齋:死o靚仔拋我浪頭？！
我點會唔比番少少顏色你睇。

「覺唔覺突然間好凍呀？」

「無喎」「I'm okay.」 當然大家冇事啦，因為我只係針對Yan 駛左少少幻術o者。





「咪整人啦。」Smoky 細細聲同我講。
「下？唔關我事wor。」我既惡作劇得左手，而且冇証無據你又點可以話我呢。
「扮啦你～」Smoky 見到我咁得戚，都認唔住偷笑。

「咁下星期六落左堂食完野一齊坐車入去啦！」Yan 已經將佢同佢姐姐可以借到比佢既衫全部披曬上身。

見到佢咁滑稽，我真係乜仇都報曬。
我大大啖飲左啖Espresso 。

「BU！！咳咳！！！」
嘩頂！杯野苦過廿四味！