唔係掛！原來真係有鬼！－現代捉鬼故事: 第三章－不平凡的開始－15

「登登登櫈！麥樂雞餐！」Smoky緩緩拎住餐盤行番番黎。
「飲可樂啦你咁瘦！」問都冇問我，就幫我改左飲可樂。

餐盤放到落檯面，上面放住一盒麥樂雞，一盒粟米，同一杯可樂。

「咦？得一個餐既？」我望住我個麥樂雞餐。

「無呀，我唔餓嘛～」Smoky 大力索左我個餐一下。

「唔餓你又叫我食飯？」我望住佢，用懷疑既眼光望住佢。





「你呀！見你個樣就知你冇乜朋友啦！唔出黎咪又係返屋企自己一個打機！
反正你都冇野做，不如陪下本小姐仲好啦！」

眼前呢個人，如果唔係咁惡死，我諗我都可以同佢做到好朋友。
其實我同佢連埋上堂，都只係相處左幾個鐘，但係佢已經睇穿左我既生活習慣。
又或者其實佢只係由我個外形睇到，因為外形已經將我既生活寫曬出黎。

Your Face ,Your fate.





其實我認同呢句說話架。
冇錯，我冇乜朋友。同好多打工仔一樣，返工放工，之後返去屋企打機。
電話除左之前老媽子打比我之外，已經唔知幾耐冇響過。
朋友？如果LOL入面同我一齊打Rank 既戰友都算係朋友既，我諗我最少都有4個朋友既。
我出部 iphone 5s 主要都係拎黎打下機，連wallpaper 都係用緊lol Ahri 既低胸cosplayer 相。
不過當然啦，lock 機o個張圖我緊係用番張正常既wallpaper，再加埋自己先開到既指紋認証，除左我之外都應該冇人見到張圖。

好毒咩？還好啦，起碼我未買d 巨乳figure 放o係房。
我好似講遠左。





有咩可以令一個大好前途既mk妹約我食飯，
我真係唔知。可能就係拎100蚊買完個餐，佢搏我唔敢問佢拎找番既錢，
佢可以自己袋曬ｄ找續 呢點掛。

我冇回答Smoky 既說話，只係默默低頭食我既麥樂雞。


「呀～係呀！」Smoky 突然開聲，打破左沉默既場合。

「你d錢呀！找番比你。」Smoky 拎番幾十蚊出黎。

「一蚊都冇拎你架！」

「多謝。」唉，我咁既死樣，我諗佢一定係因為可憐我所以食我夾棍。
雖然四週圍好噪，但係我同Smoky 之間，依然係冇乜野好講。




 「喂呀～我講下笑咋～咪嬲啦，英俊。」Smoky 好似真係知自己講錯野。

「你再扁咀就唔英俊架喇！」我聽到呢句，
我不由自主咁笑左一笑。

「笑番即係唔嬲架喇～」Smoky 天真爛漫咁對住我笑，
廿二年黎都未試過有女仔咁對我笑，即使係之前女神連笑容呢d咁基本既軍糧都冇派過。
無可否認，如果一定要拎一個比喻黎形容我依家既心跳變化，
我會用小明由行，去到跑既速度分別去形容。

「喂喂，問你ｄ野。」Smoky chok曬聲，用個鄭子誠既語氣黎問我。
唔駛問，一定有陰謀。
「好呀，答到你一定答。」我一邊食住麥樂雞，一邊答。
「乜你既遺願原來係....」
「得！唔駛問！」Smoky 比我打斷左說話，冇嬲之餘仲笑笑口。





呢一刻，我紅都面曬。直頭有一下係希望自己由結至終冇出過世。

我望一望Smoky，佢用雙手托住頭，笑笑口咁望實我。

OK fine, 唔理你，我要繼續享受我呢個中產食堂帶比我既美式炸物拼盤。