唔係掛！原來真係有鬼！－現代捉鬼故事: 第一章－離別訣－2

香港後生日十個有八個人都有戴眼鏡，
我亦唔例外。記得十零歲o個時，突然有一日睇野有個影，
但係好奇怪，我就算學曬ｄ教育電視咁講，坐到離電視老遠，
我都清楚見到宣萱點比人綁架，或睇到鄭子誠點樣有陰謀。
但硬係望人o個時，先有機會見到有個重疊既影。

俊媽當然好似平時既家長咁想捉我去驗眼啦，
我記得當時老豆就死都話唔駛配，但係點解就真係唔係好記得喇，話曬都咁多年前。
不過點解我記得呢件事，係因為老豆由細到大都唔理我，亦唔會因為我而同老媽子噪，
o個次係第一次，亦係唯一一次。




 眼鏡鋪，一個唔戴眼鏡就九成都冇入過既鋪頭。
老媽子同個四眼視光師講左幾句，個四眼仔就行左埋黎。

「小朋友，你係唔係睇野唔清楚呀？不如等叔叔幫你驗下隻眼仔先啦。」

「眼仔」。大叔，我話曬都十歲(大約啦,唔好問我當時實際係幾歲。)，
仲乜都加個「仔」，諗番起都真係起曬雞皮。
 呢個時候我只能肉隨針板上，唔好話「眼仔」啦，依家就算你要驗我「屎眼仔」我都冇得say no 架啦。 視光怪叔叔帶左我去一部米白色既機前面，佢叫我將個頭放上個座度，隻眼就望入一個好似萬花筒既隆入面，照完左眼，照右眼。照完之後部機就出左張飛仔。

「．．．．．．」




「小朋友不如我地再驗多次好嘛？」

都係o個句啦~我邊有得say no？
如事者又比佢照多次，照完左，又照右。
又有一張飛仔彈左出黎。

視光師皺一皺眉。

「太太，你個仔對眼冇問題喎。」





有時真係不得不配服師拉既耐性。

一間如是，第二第三間亦係咁。
最後俊媽去到第四間既時候，格硬要個視光師幫我配左副眼鏡，
如果唔係俊媽，我諗我到依家都唔駛戴眼鏡。