唔係掛！原來真係有鬼！－現代捉鬼故事: 第九章 - Showtime - 24

「我隻眼？你指 『魔化』？」Owen 指了指已經變成全黑色的右眼，對我反問。 

我唔知道佢所謂嘅魔化到底係指乜，不過佢咁指得， 
又明我想問乜野，我亦點點頭。 

「你都知，鬼唔應該留喺陽間。如果有特別原因，當然可以同 『下面嘅部門』申請。 
不過你都知，邊度既政府都係架喇，政府工一定係hea做， 『下面嘅』亦唔例外。 
有時有好緊急嘅情況，好似頭先阿堅咁，等得下面批黎佢都可能收左皮。」 

「唔好意思呀師伯...請問邊個係阿堅？」喺Owen解說過程中，突然出現左一個我聽都未聽過嘅人名。 師傅一聽到阿堅呢個名，亦好自然地望左Owen一望。 





「呀！Sorry，即係阿Cloud哥,你師傅。」Owen解說道，「名呢d就題外話啦，可能你又會問， 『既然唔駛拎pass都可以上黎，點解仲要申請呢』？咁當然有分別，陽間同陰間環境有絕對嘅分別，最大嘅分別，就係陽氣。簡單少少講，如果鬼魂格硬要留喺人間，除非佢只係逗留喺佢過身嘅地方；否則，任何鬼魂都會因為受唔住陽氣，而慢慢 『魔化』。」 

「如果 『魔化』完成，會有咩後果？」我追問道。 

Owen決定用例子黎答我。 
Owen 指了指 依然掛喺牆上嘅半張女性遺照。 

「當 『魔化』完成，鬼魂就會失去理智，只會記得番上黎人間嘅 『目的』， 
其他乜都唔會再記得，大部份甚至連理智都冇埋。 




最後，邊個阻佢，魔化後嘅鬼魂就會將佢鏟除。」Owen 補充。 

聽完解說之後，我諗番過往我遇過嘅唔同鬼魂: 肥鬼、校長、海灘泳褲男等等， 
所有所有，都好似真係跟住Owen提到嘅法則走，除左一個人，或者，Owen 可以幫我解答到我嘅問題。 

我將自己哄埋Owen旁邊，細細聲喺Owen耳邊問: 
「咁如果，申請左係唔係可以長期留低？又或者有乜方法可以令到一隻鬼魂可以長期留喺陽間？」我對Owen，問左一個一直都唔敢問師傅嘅問題。 

「如果申請完，政府就會比一種令我地可以唔再受陽氣影響嘅煙我地， 
只要喺人間定期吸食，就唔再怕 『魔化』，不過隻煙好Q臭架，比我都唔想食。」Owen 似是在回想煙草嘅味道，面上流露出噁心嘅表情。 





「D煙隻味，係唔係好似中藥咁？」 

「係呀！」Owen 大叫，「咪住...你點知架？」 

面對Owen 嘅質問，我支吾以對，呢一下真係有少少唔知點答。