唔係掛！原來真係有鬼！－現代捉鬼故事: 第九章 - Showtime - 23

一刻鐘前整整齊齊萬分的靈堂，
一刻鐘後已化為半個廢墟。黑色的血液在地上型成一個小小的湖泊，
散發著濃列的血腥味道。

師傅將幾張啤牌向天一揮，啤牌如散落的花瓣 ，
不偏不倚地掉到每一份女鬼殘骸上面。
每張啤牌各位產生了一個小小的旋渦，
將女鬼及黑衣男的每一部份都吸得乾乾淨淨，令靈堂上只剩下剛才強列打鬥的痕跡。

師傅慢步走到Owen 身處的位置，坐了在Owen 身邊。





「你又救多我一次喇。」師傅輕聲道。

「仲計緊？你再計落去我怕你下世做貓都還唔曬呀。」

「即係點呀？」師傅將兩隻手拍拍自己的頭。
明顯剛剛一戰已經消秏了他大部份的精神及體力。

「貓有九條命架嘛，我怕你唔夠還比我咋，哈哈哈。」





「嘩，講呢Ｄ。」二人攤了在摺櫈之上，就似兩個剛打完藍球的街場球員，
一面休息，一面互相揶揄。

Owen 回頭望望我，跟師傅細聲說了幾句。「個o靚仔邊個黎？」Owen問師傅，明確地，個o靚仔應該係講緊我。

「喂！阿俊！過黎！」師傅沒有回頭，只是大聲地叫。

「係！」聽到師傅的指示後，我快步跑了到他們二人面前。
近看之下，Owen面色就如一張白紙，但精神的樣貌，無暇嘅皮膚，
令人懷疑，眼前嘅人到低係唔係真係存在於世，或者漫畫又或者3d動畫入面，




你先會見到呢種人。
雖然Owen睇落友善，但有一點令我唔敢放鬆。
就係佢對一黑一白嘅眼。
佢右邊眼球已經全隻化為黑色，而左眼眼白亦慢慢被黑色吞噬。

「叫師.....」師傅講到一半，停左一停，回頭問問身邊Owen「喂,師叔定師伯呀你係？」

「咪咁老土啦，叫我Owen 得架喇。」Owen 笑說。

「唔係架，我地依家係叔父輩架喇，唔細架喇！」師傅一掌打到Owen 心口，
Owen 亦交足戲，扮被痛打了一下一樣。

「你老咋！我仲係12歲咋！」Owen 笑著回答。

「陽壽丫嘛！加加埋埋你同我都廿到尾喇！」師傅嘆了一聲。





「係囉！你都知架？阿嫂呢？又話幫我過埋我o個份，你就女都媾唔到！」Owen老實不客氣，繼續對師傅指三道四，似乎從未當我存在一樣。

「我D野，你知架....」師傅愈講愈細聲，似有難言之隱。

「得！我幫你講！」Owen突然起身，對住Jessie大叫。
「喂！Jessie！」

「？」

師傅立即彈起，雙手緊緊掩住Owen 的口。
並將Owen 拉點座位。
 「屌你！」

「咩呀？」Jessie 回應。





「唔唔唔唔唔唔唔！！！」
Owen的咀巴被師傅緊緊掩住，只能發出唔唔的聲音。

「冇，佢話好掛住你喎。」師傅立即搶答。

「哈。哈。哈。」Jessie 沒有理會二人，只是拿出手機低頭的按著。

「咪玩啦Owen 大哥！當我求下你，你放過我啦！」師傅細聲地說。

「唔唔！」Owen咀巴依然被緊掩，幸好鬼應該唔駛抖氣，如果唔係Owen應該又死多次。
不過從Owen的眼神，都知道他在陽間短短的時間內，在師傅身上得到唔少歡樂。
Owen 篤了篤師傅的雙手，示意要他放開，又做了個在咀上拉上拉鏈及ｏｋ的手勢。

師傅最後都放過了Owen。




不過Owen當然唔會放過師傅。

「喂阿俊，以後叫Jessie 做師母得架喇！」Owen 隨即跑離師傅身邊。

「你叫親我就送埋你落去陪呢條白頭佬！」師傅兇狠程度，
比頭先對鬼夫婦有過之而無不及。

「放心．．．我唔會講。」我也跟住Owen師叔做左個拉埋拉鏈的手勢。
「不過我有少少野想問....」我對Owen說。

「問丫？係咪想問點解我咁靚仔？」Owen 立即解開頭上的橡筋，撥了撥自己的頭髮。
突然，剛剛Owen 在我心中建立的型像整個崩壞。都係嘅，師傅嘅老死，正常極都有個譜。

「你收皮啦好冇？」師傅立即回敬Owen。





「哈哈...唔係呢樣」我尷尬地說，「點解你隻眼....」
我指了指Owen全黑色的右眼，好奇地問。