唔係掛！原來真係有鬼！－現代捉鬼故事: 第九章 - Showtime - 5

「我點解比人追？」

「嗯...」

男子將手上一路拎住嘅水晶球放左上我檯面。
喺帳幕微弱嘅燈光照射下，我見到水晶球並唔係特別清澈，
中間亦有不少雜質，加上表面有不少撞花嘅痕。
男子一手將水晶球一扭，水晶球於檯上旋轉。
水晶球將帳幕入面嘅燈光以不同角度折射，帳幕內出現了幾度彩色光芒。





男子突然板起面，語氣嚴肅地說:
「呢個水晶球其實有毀滅世界嘅力量，
你都見頭先班人兇神惡殺，點睇都唔似好人啦！
所以我喺頭先班人手上面搶左佢，佢地就黎追殺我，就係咁喇！」

我呆呆咁望住眼前呢位神秘男子，
空洞嘅眼神已經完全表達出我對佢有幾信任。

男子望望我，輕輕笑一笑。
「我又唔識你，你又唔識我，你都明知我唔會講架啦，




我都係搞個爛gag，大家好落台啫。」

其實佢講得亦唔係冇道理，
有時太八掛都未必係好事。特別係喺香港，而件事又有機會影響到你生計嘅，
作為香港人，閒事真係唔好理太多。

「不過咁！」男子補充。

「見你幫左我，呢個水晶球就送比你啦。」
男子一步步走近帳幕嘅門口。





我拎起呢個比手掌仲要細嘅低質水晶球。
細心地觀察呢個水晶球嘅每一部份，

「呢粒野當係你頭先幫我嘅回報啦！」

「下...呢粒水晶淘寶頂盡咪幾草野，
唔駛喇，你留番佢啦。」我回覆道。

「你知唔知點解冇生意呀？
你睇下你個檔，乜叉都冇，得幅死人牌！
比我都唔入黎啦！」男子毫不客氣地說。

男子走回我的檯邊，一手將我放於手上的水晶球拿起。
他以右手緊緊將水晶球按在檯上。





水晶球在男子施力壓低之時，慢慢由雪白的色轉成橙紅色。
隔住水晶球及檯的檯布慢慢出現白煙，成個情況就似男子用手將水晶球加熱，
並以水晶球對我嘅工作檯做成左一個凹位。

「嘩你搞乜呀！」我眼見呢個男人對我嘅檔口搞破壞，
當然第一時間出高阻止。

「普通人見到咁嘅情況應該嚇一跳先係，
而你只係在意你張檯，睇你閣下都唔係普通喺度呃飯食嘅人喎。」
男子一面奸笑一面說。

「你冇答我嘅問題，我諗我都唔需要答你丫。」

「你都有道理。拿！粒野一於送比你！包你生意順風順水！」





「我真係唔要呢...萬一頭先班友返黎，我咪死？！」

「放心啦，班友目標係我，唔係粒野。
粒野只係以前一個朋友比我，託我幫佢搵個新主人。
我睇你衰極有個譜丫，我諗應該冇乜問題嘅！」

「唉...怕左你。不過呢個水晶球點用？」
我用力將水晶球由檯面上嘅凹位拔出。
呢粒水晶球真係點睇都同淘寶野冇乜大分別。

「放佢喺手上面，集中精神諗你想佢幫你嘅事，就係咁簡單。
佢心情好果事就有求必應架喇。」男子嘆氣一聲。

「佢心情好？」




依家嘅我滿心疑問，當然一來我都想知呢粒野有幾有求必應，
不過事前要搞清楚嘅就係，點知知佢有冇心情...

男子點點頭。
「你慢慢會明架喇，如果佢心情唔好，你都可以拎佢當武器嘅...」

「武器？！好似綠燈俠咁？都係集中精神？」心想事成呢ｄ咁虛嘅事我真係唔係太幻想到，
不過如果話好似綠燈俠咁用想像力做武器，我諗大部份男仔都會想像得到。


「咪癲啦！拎黎掟人呀！」男子聽到我嘅回應後哭笑不得，
慢慢離開帳幕。
「點都好啦，多謝你！」

我對男子點點頭以示道別。




我拎起水晶球，將佢放回檯上嘅凹位，伸伸懶腰，再次靜待我今日嘅第一個客人。