【第三者】《只不過有些感覺，不到我來控制》: 十四
(十四)
「你習慣等到了 倦透的深宵
瞞著你伴侶偷偷再進入 我亂透家居
抱著你的身軀 還會心虛
當相戀彷似有罪 應該比死更空虛
我試過逃避你偏失控繼續想你
就似捉心理 定會輸給你 難有驚喜」
我坐係海旁，電話既音樂播放器隨住海既浪花播起音樂，眼淚不自覺咁流落黎。
中六個陣，我識左傲言。呢個男仔好特別。
以前我識親既男仔，無一個可以維持到做朋友。每一次佢地黎識我，都係因為想媾我。
到最後，有啲就會一齊左，而有啲就因為講清楚而變到無朋友做。
好多人都話好羨慕我，甚至有啲女仔好憎我，話我收兵。
但係有時其實我只係想普普通通咁識朋友，我無諗過收兵。
而傲言，佢同個啲男仔唔一樣。
佢有女朋友，所以佢好安守本分。
但係咁樣反而更加吸引我。佢一直都唔會多手，唔會多口。
同我出親去真係純粹好朋友咁食飯吹水，同佢一齊我可以做番最真性情既我，唔洗好似因為知道左個啲男仔既企圖而就住就住咁。
呢個感覺好舒服。
慢慢咁，我開始鍾意左佢。
但我知道，我同佢無可能，因為佢好愛雪瞳。
我原本想將我既感情壓抑係心理面，直到一次佢同雪瞳嘈交。
其實傲言份人係有啲大男人。佢管得雪瞳好緊，但同時自己又要雪瞳俾自由佢。
係，我知道，人係自私既生物，唔想人地得到，但自己就越多越好。
個次佢地嘈交，詳細我唔太清楚，但係好似係傲言又發雪瞳脾氣，而雪瞳就開左個ig po，令到雪瞳啲fd係咁問佢咩事。
傲言覺得好無面，就隨即再次開火。
佢第一時間搵我渲洩情緒，我即刻去左佢屋企樓下搵佢。
我同傲言住好近，只係隔幾條街。
一去到，佢就突然攬住左我，當刻我嚇親。佢攬住我，同我講左好多好多佢同雪瞳之間既野，多數都係佢覺得攰，佢覺得辛苦之類既野。
我明。
傲言之前係一隻無腳既雀仔，今次第一次沉船，緊係著緊啲。同時，佢覺得自己逼得雪瞳咁緊係對佢好，所以當雪瞳一唔跟住佢既意思去做，又或者質疑佢，佢就會好暴燥。
佢愛雪瞳，佢想佔有雪瞳，但好多時候用錯左方法。
其實忍耐就係一個計時炸彈，去到一個臨界點既時候，係會一發不可收拾。我講緊既包括雪瞳，亦都包括我自己。
我唔知雪瞳既臨界點幾時會被觸發到，但個一刻，我將我對傲言既情緒一下爆發曬出黎。
我攬實佢，然後同佢講我好鍾意佢。
傲言先係呆左一呆，然後想推開我。
但係我攬到佢好實。我同佢講，只要同到佢一齊，我唔介意做第三者，做佢sp。
傲言靜左兩秒，最後佢應承左我。我同佢由個日起就多左個唔見得光既關係。
我個處... 都係俾左佢。
我從來無諗過要完全得到呢個男人，但係我真係好鍾意好鍾意佢。
「Let me be the one, one and only one
滴過幾次血 就算多心酸 仍然輸給這愛戀
Let me be the one, even just lie for once
對著鏡子呆望自己的講「原來我 根本不算什麼」
其實我 多麼討厭 自我」
「等陣約左呀wing？」呀宇含住啖飯問我
「係呀，今晚同啲中學fd去食飯」我將隻叉拮左落舊蕃茄度。
「係邊度食呀」
「mk咋嘛」
「mk妹出mk」佢笑住講
「咩料呀你又」
「唉妳就好，我今晚又係食自己」
「男神大把人約啦」
「繼續吹」
「你女朋友呢」我不期然望住佢
「都話佢準備整野番英國，呢期應該都無得見架啦」佢話
「唔記得呀嘛」
「所以妳呢排出街都可以唔帶鎖匙」佢係度攪緊杯凍檸水
「下？」我不解咁望住佢
「咪可以黎我度訓」佢將目光放番係我身上
「... 」我諗番起琴晚佢鍚我，然後我不自覺咁避開佢既眼神。
「...講呢啲！」我好緊張
「我講真架喎」佢好認真咁講
「... 係啦係啦，快啲食野啦你」我拍一拍佢隻手，同時冷靜緊自己情緒。
「好啦，妳要小心啲阿，今晚做完project我打俾你呀(心心)」傲言終於覆左我wtsapp
「好啦(豬)」我笑左一笑
好想... 見到傲言，好想去搵佢。但係我好驚又見到我唔想見到既情景。
「呀好飽呀」番到上呀宇屋企，我就攤左係佢梳化
「嘩，妳霸曬，我坐邊呀」佢鎖完門行過黎諗住坐低
「地下」我笑笑口咁指住地下
「真係唔知呢度係邊個屋企」佢嘴角上揚
我坐番直個人「你唔係要趕project咩」佢坐低既同時我問佢。
「係呀，依家咪諗住做」佢坐係度四周望左兩望「咦我部電腦呢」
「你出去個陣放左係邊」我都跟著佢一齊周圍望
「咦我明明放左係枱架」佢企左起身
「低能仔，電腦都無埋」我笑鳩佢
「幫手搵下啦笑」佢講完都忍唔住笑左一聲
我一路睇一路行左入佢房，見到部mac放左係書枱
「白痴，你放左係你房囉」我大嗌「但你岩岩走個陣唔係放左係出面架咩」
佢即刻行入黎「呀我臨走個陣好似拎番入房，哈唔該曬」
「真係救命」我好無奈咁講，同時坐左係佢床邊「快啲做啦」
「依家咪去做囉」佢拎住部野然後轉身諗住行出去，但係唔小心俾我離地fing fing下既雙腳踢一踢，失重心跌左落我個邊。
「呀！」我自然反應合埋左眼
...無事發生...
我擘開眼，依家呢個情境就好似琴晚咁樣，我地哄到好埋。我好緊張咁望住佢，但係佢定曬格完全無諗住企番起身既意思。
「你... 有無事呀」我嘗試平復自己既心跳咁講出呢句說話。
佢無答我，佢慢慢越哄越埋，我就一直向後縮。到最後變左佢成個人壓左係我身上面。
「呀... 呀宇... 不如你... 你起身先啦」我緊張到講野都窒曬口
「... 妳真係好可愛」佢好細聲咁講，之後佢又一次鍚左落黎。
雖然唔係第一次，但係我都係呆曬咩都諗唔到。我成個人好似僵硬左咁咩都做唔到。
我眼都唔眨咁望住呀宇，而佢就合埋左眼。
佢個樣，好吸引。
可能見我無反抗，佢開始越鍚越激動，本來拎住部mac既手將部野丟左去我斜後面個枕頭度，然後隻手慢慢伸入我件衫度開始想摸我。
佢隻手沿住我條腰一路掃上去，我好緊張，我淨係知我再唔反抗真係無得番轉頭。
佢隻手已經摸到我個bra度，然後我feel到佢想伸去我背脊。
就係呢0.1秒間，我雙手推開佢。
「...呀宇唔好...」我心跳得好快
佢先係呆左一呆，「...sorry」然後隨即彈番起身。
我慢慢坐番起身，雙眼完全唔敢望佢。
「我... 我唔係有心，我只係... 我... 唉，對唔住。」呀宇個樣好愧疚咁望住地下。
「唔... 唔緊要啦」我好熱
「我出去搞掂埋份project先」佢好尷尬咁講
「好呀，我都差唔多時間要去搵呀wing啦」
「咁... 好啦」佢終於抬高頭望住我「對唔住阿雪瞳。」
我望住佢笑左一笑「唔... 唔緊要啦，唔好再提啦好尷尬呀」其實我仲係好緊張，但係我係度懶輕鬆。
「咁... 我走先啦，琴晚唔該曬你收留我」我笑住咁講，同時企起身諗住行出去
「傻啦，唔通真係睇住妳訓街咩」佢都對住我笑
「好啦咁你做完project得閒就wtsapp下我啦」我一路著鞋一路講。
「小心啲呀妳。」佢好認真咁講
「知啦，拜拜」講完，我就轉身行出佢屋企。