【第三者】《只不過有些感覺，不到我來控制》: 八
(八)
「妳今日去hello小心啲呀知唔知呀，你知啲人玩到幾癲架啦」傲言係電話度不斷叮囑我。
「知道啦。你都係呀，同呀軒佢地咪玩咁夜」
今日係二十八號，係我約左呀宇去helloween既日子，而傲言就約左佢啲同學去飲野。
「喂你個fd係邊架。」呀瑤同埋Zoey佢地一早已經到左海洋公園門口。
「得啦依家咪打去問囉煩」我好無奈咁講
「喂呀宇你係邊呀，哦，好啦，咁我地入黎搵你啦地，拜拜。」
「佢地係入面喇已經」收左線之後，我地一行四人就入去搵佢地。
「呢個係我fd，呀瑤，同埋佢男朋友。」
「hi，我叫呀宇，佢係Hinson，同埋呀樂。」
簡單作介紹之後，呀瑤細細聲同我講既然我有fd陪，佢地想自己去玩，所以我地就分開咁玩。
一路上，Hinson不斷聊Zoey講野，而Zoey又不斷想同呀樂傾計，佢地三條友就行到好前，得番我同呀宇兩個係後面。
「好耐無見喎mk妹」條友雙手插住褲袋咁同我講。
「好耐咩，前兩日先見完咋喎」
「咁我想見到妳呀嘛」佢有意無意咁講
佢呢句說話係咩意思？
「會唔會係咁呀，哈」
「佢地三條友行得咁快架」呀宇講完就加快速度趕上Zoey佢地既腳步。
「雪瞳！」Hinson無啦啦走左過黎
「做咩呀」
「Zoey佢... 有無男朋友架」佢扯左我去最後，然後細細聲咁問我
「有就唔會應承到你出黎食飯啦」
我見到Hinson個樣閃過一絲喜悅「咁佢鍾意咩類型既男仔先」
「想點呀你」我明知故問，同時望一望同呀樂吹水吹得好開心既Zoey。
「講左先啦」
「咩料呀，你前兩日同佢睇戲個陣無問架咩」
「問左就係人都知我想點啦，黎啦，話我知呀」
「佢呀，佢份人幾好架，好就得朋友，好鍾意熱鬧囉。如果揀男朋友既話呢... 」我特登停一停
「點呀」Hinson勁心急
「佢應該鍾意啲高高地，又斯斯文文既男仔囉，哈哈」我講左呀樂既特徵出黎。
「妳覺得佢睇中呀樂？」Hinson單刀直入
「拿我無講過呀」我抬頭望住佢
「喂大家咁熟，幫下手呀」佢懶熟咁搭住我膊頭
「同你好熟咩，邊位呀你」我笑住咁講，同時甩開佢隻手。
「妳同呀宇都咁啦，差唔多啦」
「咩... 呀，九唔答八」我聽到佢個句「你同呀宇都咁啦」，唔知點解個心跳好似加速左。
呢個時候，呀樂走左過黎我度，而Hinson見大好機會降臨，即刻狗衝去聊Zoey傾計。
「呀瞳，做咩唔同呀宇行呀」佢第一句就咁問
「下，岩岩Hinson有野問我咋嘛」我一邊答佢，同時好不解呀樂做咩無啦啦走過黎同我講呢啲。
「你快啲去搵番呀宇啦，佢無啦啦bad面喎，我走去聊佢都唔理我」呀樂講完呢句，我好自然咁望去呀宇個邊，只見佢自己一個行左去好前，同我地已經有一段小距離，但佢完全無停落黎等埋我地既意思。
「喂，呀宇！」我跑上前諗住叫停佢。
呀宇聽到我叫佢，稍微減慢左速度，但係佢無另轉面「嗯？」
「做咩呀你」我依然跟住佢既速度
「咩做咩？」佢仲係無另過黎
「你唔好行咁快啦，咁cool做乜呀？」
「無呀，妳同Hinson傾計啦」
「喂呀你做咩呀」我拉住左佢
「我唔想妳同hinson行咁埋」佢停左係度另過黎望住我雙眼。
我淨係呆左係度望住佢唔識俾反應。
「咁... 我依家咪同番你行囉，拿全晚我都行你隔離啦！」靜止左幾秒，我即刻扮笑住咁講，同時間我唔敢正視佢。
「好阿。」佢講完，對住我好溫柔咁笑左一笑。
「喂雪瞳！行咁快做乜呀你兩個」Zoey係後面跑上黎
「諗住俾啲空間你呀嘛」
「不如排呢個呀！好似唔係好多人喎！」Zoey指一指一間我地就快行到既鬼屋。
「唔係好多人？咁既說話你都講得出」我好無奈咁望住個條由跳樓機排到上過山車最頂位仲要打蛇餅既人龍。
「排下就好快架啦」Zoey講完，就拉左我過去，呀宇佢地就跟住我地。
「喂高佬，做咩學呀宇咁成日望住個電話嘴角含春咁笑呀」排隊個陣，Hinson見到呀樂係咁覆wtsapp就忍唔住窒佢兩句。
「同補習個學生夾緊時間姐，話時話條女幾正」呀樂一路講，一路check緊schedule。
「哦，唔聲唔聲收埋條女！」Hinson又想搶手機
「屌，咪搞啦」米八五左右既呀樂一野伸高部電話已經完美ko只有米七左右既Hinson。
「睇過... 嘩，有幾分似雪瞳喎」佢一講完，全世界既目光放係我身上。
「咩料呀，睇下...」我哄個頭埋去想裝下呀樂部電話。
點知一睇，見到佢地講緊個個女仔原來係傲言個ex。
「... 呢個女仔係我男朋友個前度黎」我好無奈咁講「點解你會識佢既」
「無呀，佢係我fd介紹既補習學生」呀樂拎番個電話
「世界真細小小小」Hinson係度唱
「嘩，睇黎蕭傲言係鍾意呢type樣架喎」Zoey笑住咁講
「收皮啦，明明我靚佢咁多」
「咁妳男朋友咩樣架」hinson成個八公咁
「有無相睇下呀」
我眼尾稍一稍呀宇，佢玩緊電話。
「唔靚仔，無野睇」我笑住咁講，同時諗緊點樣轉移話題。
「呀係喎，佢wallpaper係合照喎！」Zoey一手拎左我部電話，我一時反應唔黎，俾佢有機可乘。
平時又唔見佢個腦轉得咁快。
「ok呀，但呀宇正咁多」
呀樂笑住咁講，講完，我見到呀宇望住我。
「咪係囉，呀宇靚仔好多喎」Hinson伸個頭埋黎搭爹。
「咩呀」我拿拿聲拎番部電話，咁岩呢個時候條隊開始郁，我見呀宇向前行，於是我就行去佢個邊。
「番英國？... 好啦，咁你執野先，有咩打俾我」正當我想叫佢既時候，佢電話響。
聽內容應該係佢女朋友喇。
「好啦，拜拜。」
「女朋友呀」我明知故問
「係呀，佢屋企有事，過兩日要番一轉英國。」
「你女朋友一定好靚女」
「點解咁講？」
「混血兒唔靚極都有個普。」我笑左一下
「... 係咩，我覺得妳可愛啲。」佢又用佢個把好輕鬆既聲講。
點解你係都要講啲咁令人有遐想既野？
「講呢啲，我男人黎架，邊忽可愛，哈哈!」
「係我眼中係就得啦」佢拎左個電話出黎「係啦妳幾時生日架」
「9月8，做咩？想候補禮物？」我講笑
「好呀，掙住妳先。」佢應該係記底左我生日，然後收番埋個電話。
排到2046，終於到我地。
呢間鬼屋有分左右兩邊，係門口有條扮鬼既職員會話你知行邊邊，姐係話隨時有機會要同班fd分開黎玩。
「你地！行呢邊！」佢咁岩係我同呀宇前面cut左人，姐係話，我地做第一個。
「嘩雪瞳好彩你行先姐，行頭我先唔要呀」Zoey見到，即刻爆左呢句出黎，而個條友見到我地幾條友係識既，即刻係Zoey度cut左，要佢地行另一邊。
「屌！唔撚係呀！」
「何素兒我都唔知你叫乜鳩」我好無奈咁講。
呢一刻我同呀宇因為Zoey既呢句而成為左要獨自上路既小孤兒。