【第三者】《只不過有些感覺，不到我來控制》: 六
(六)
「岩岩條女幾得喎」走左無幾遠，呀樂即刻同Hinson係度討論雪瞳佢地。
「你講邊個先」Hinson一路行，一路另轉頭望住已經縮細左既雪瞳佢地。
「同呀宇say hi個條女呀，睇落幾正」
「你想點呀，咪打佢主意呀」我一聽到佢講緊雪瞳，唔知點解即刻爆左呢句出黎。
「咁緊張做咩呀，條女你架咩」
「今日全日係度媾部電話，掛住搵人地呀」
「唔怪得成日望住個mon係度淫笑啦」
依家佢兩條友個矛頭都指向我
「我... 做咩姐你地」
「你死啦，呀嫂點算呀」
「呀嫂咁撚正，喂呀宇你唔要既記得益兄弟呀」
「屌鳩你啦，想死呀」我一下批肘落Hinson度，條友講野永遠都係咁嘴賤。
「唔玩喇，去食糖水！」
「去邊度食好呢...」
佢兩個一路講一路行左去前面，淨底我一個係尾跟住佢地既腳步。
點解... 我會咁著緊崔雪瞳?
「吱～」
我解鎖左電話屏幕，whatsapp有兩個未讀訊息。
「我會帶多兩個fd黎helloween喎(笑喊)」我笑左一笑，然後輸入訊息「好呀(笑喊)」
我撳入另一個對話欄
「你真係唔搵番我... 我地冷靜下啦」
我望住呢個msg，諗左幾秒，然後將個電話放番入褲袋。
「叮噹叮噹叮噹...」
「拍拍拍！」
「屌！邊撚個呀！」一大早就俾人拍門嘈醒既呀宇好燥底咁起身去開門。
「肯開門啦咩！」門外面既係一個有一頭啡色捲髮，眼大大既混血靚女。
「妳唔係有我鎖匙架咩，妳自己開門啦大小姐」呀宇好明顯係俾人嘈醒而極度唔耐煩。
「湘志宇，你琴晚到底去左邊。」ashley啤住呀宇咁問。
「屌，妳神早走上黎就係問呢啲？」
「我問你呀！答我啦！」
「咪話左同呀樂佢地去左船p飲野囉，做乜野呀妳！」
「呢條女係邊個呀！」
Ashley舉起佢電話，show左一張facebook入面啲相俾呀宇睇。
入面見到Hinson個fd，呀文，佢有張相係呀宇同雪瞳攝左鏡，而個個鏡頭影到佢地嘴緊咁，而條友好衰唔衰，係facebook度tag埋呀宇。
屌鳩佢，三唔識七，tag我做乜撚野呀。
「我問你條女係邊個呀！」
「呀峰啲fd黎架，佢咁岩坐我隔離咋嘛，角度影到咁咋」
「會唔會似係嘴嘴似到咁呀？」Ashley繼續咄咄逼人
「你咩意思阿依家」呀宇開始唔耐煩。
「我咩意思？我辛辛苦苦去番工搵錢，你就係度去玩去飲酒，依家仲要同第二條女痴咁埋，你想點呀湘志宇」Ashley對眼紅曬咁講。
「我掛著去玩？我當初咁辛苦努力考入UST係為左邊個呀？妳唔係唔知我資質點架？妳又知唔知我好大壓力呀！裴思藍，原來妳對我一啲信任都無，我對妳真係好失望。」
「我唔信你？我就係太信你先俾你跟Hinson佢地去船p，我就係信你先全日淨係打過一個電話俾你，我就係太信你先有機會俾你出去識女呀！」
「講咩呀妳！」呀宇捉住ashley隻手，然後好大聲咁吆喝左佢一句。
「...係，咩都係我錯... 我最錯就係同左你一齊」ashley喊住咁講完呢句說話之後，就甩開呀宇，然後轉身離開。
「聽晚得唔得閒呀」我wtsapp左雪瞳
唔洗兩分鐘，佢就覆左我「都得既，做咩呀」
「無呀，hinson想約妳上次海旁另外個fd去食飯」
「咁關我咩事先(黑超emoji)」
「幫下手... 囉(笑喊)」
「拿我盡量問下啦，我唔知我fd得唔得架」
「yes！」Hinson係我隔離見到雪瞳個msg，即刻好興奮咁搶左我個電話，然後作狀想嘴我「我愛你呀宇宇」
「屌，死開啦死gay佬」我一野推開佢，同時搶番部電話。
「到時妳都要去架喎」我係對話欄輸入
「關我咩事呀(笑喊)」
「Hinson約妳fd，咁我約妳囉(伸利emoji)」
「你好彩，本小姐聽晚得閒(黑超emoji)」
我睇到佢呢個msg，嘴角不自覺咁上揚。
「喂係喎死仔，氹番好呀嫂未呀」係隔離癲完既Hinson冷靜左之後無啦啦一臉認真咁問我。
唔通佢岩岩睇到我同雪瞳既wtsapp？
「等陣約左佢出黎氹番佢囉唉」
「嘩，對住女朋友就唉聲嘆氣，對住個新歡就笑淫淫，你死啦你我要話俾呀嫂知」Hinson講笑咁講，同時細細力咁用拳頭打落我手臂。
「收爹啦... 我只係覺得雪瞳好特別，似係好需要人保護既細佬女咁」我好認真咁講，然後不斷諗起呢個女仔。
我對佢最深刻既印象，除左跌親，跌親都係跌親。
「嘩你睇你，又淫笑，死變態」
「我都費事同你講」我另轉面，避開Hinson既視線。
「認真架，你同呀嫂都三年幾四年，你同雪瞳識左幾耐？有時玩下就算啦，唔係同我講放真感情呀？呢啲野你自己識諗啦」Hinson拍左我膊頭兩下，然後就好識做咁行左去另一邊食煙。
我同Ashley既感情，係用左幾多時間黎培養？LongD，姐弟戀... 就黎四年，我地呢段感情真係得來不易。
係愛情路上，有幾多人可以克服到呢兩樣阻滯？
或者Hinson講得無錯，我對雪瞳，只係一霎那既新鮮感。
「Ashley！」我離遠見到呀宇行緊埋黎
「對唔住... 我個日過份左」佢一過到黎，就攬實我講。
「其實... 我都有唔岩，我唔應該咩都未問清楚就發你脾氣，sorry...」我既目光一直停留係馬路邊個塊枯葉上面而唔敢正視佢。
呀宇用手抬高我下巴，然後嘴左落黎「以後無論咩事都好，都唔準走左去，知唔知。」佢望住我雙眼講。
我攬住佢，然後輕輕點左下頭「對唔住。」
「咁我地依家去食野？睇妳都未食野架啦，次次一唔開心就絕食。」呀宇好溫柔咁講。
佢真係好了解我，甚至比我自己更加了解我自己。
我地去左一間食日本野既餐廳度食野。
「我過唔到關呀，幫我呀」我將個電話遞俾呀宇，因為我玩極都過唔到個關candy crush。
「傻婆」呀宇接過我電話，然後埋頭幫我過關。
我鍾意呢個男仔既原因，係因為佢真係好細心好溫柔。
我同呀宇係係中學個陣識既，當時我因為屋企問題，中六個年我跟左呀媽搬左番黎香港。
由於淨係得英文一科比較突圍而出既關係，我入左呀宇個間band3學校。
有一次放學落大雨我無帶遮，而我因為要補課所以留底左係學校，到走個陣學校已經無乜人。
就係呢個時候，呀宇主動走過黎話要遮埋我，一路上佢仲不斷聊我講野，後尾先知原來佢係F4仔。
個次之後佢就成日借啲易等埋我一齊放學。終於，佢F5個年我同佢一齊左。
到佢F6個年，我因為屋企問題要搬番英國。就係咁，我同呀宇展開左異地戀。
呀宇應承過我，佢要讀好書將來要養我，所以佢好努力，考到入UST。
而我係英國雖然有offer，但係我唔鍾意讀書，所以我就係個邊學調酒，後尾番到黎香港就一直係尖嘴一間留上bar做。
我望住眼前呢個人，我唔想失去佢。
所以，當我見到少少有關佢同其他女仔既野，我都會即刻呷醋，哪怕其實我知到佢地根本一啲野都無。
又或者，我咁無安全感，係出自內疚...
可能我係唔想失去一個對我咁好，百般寵愛既人。但同時，我好想有多啲人鍚。
我知我好自私。
「吱～」就係我幫緊Ashley過關既時候，wtsapp有人搵佢。本來一直都唔會check佢電話既我諗住繼續玩candy crush。
但我見到個msg係由一個叫Ryan既人sd左句咁我掛住你呀嘛(心心)過黎之後，好奇心驅使我撳左入佢whatsapp。
呢次係我同佢一齊左咁耐以黎第一次check佢電話。
「係咪度呀？」
「咪搵我住啦」
「點解先(馬騮掩眼)」
「我依家要去搵呀宇，夜啲先搵你」
「咁我掛住你呀嘛(心心)」
睇到呢度，我個心無名起火，呢條友係邊撚個。
我試圖扮到好冷靜咁同ashley講「咦，岩岩妳有whatsapp喎，個咩Ryan搵妳」
我隨即稍一稍Ashley個樣，我見到佢塊面閃過一絲不安，但好快佢就回復冷靜。
「哦，同事黎架，因為佢個schedule係同我夾，咪成日搵我囉... 」
呢一刻，我真係好嬲，但我忍住左。
有時有啲野，我寧願一世唔好知。