【苦】《英雄聯盟》 - 一件次世代既愛情工具: 《放棄》
翌日
咯咯咯———
「經理早晨。」
『早。』經理坐在辦工桌前，看著電腦說：『咁早返黎？仲有一個鐘先到返晏時間喎。』
「無……」我低聲道：「見早左起身，咪諗住早啲返黎……」
『哦。食左早餐未？』經理問候了我一番：『搏殺還搏殺，唔好搞壞身子呀。』
「知道…」我禮貌地回答後，從肩袋中取出一份文件：「經理…呢份係黎緊一個星期既落貨編程，公司所有需要既貨品…我都按所需Request左，交比你睇下…。」
『咁快做定下星期既工作？』經理停下手頭上的文件，回望著我：『阿衡，唔係話你努力唔好，不過長命功夫長命做呀。』
「經理…我明白…」我的眼神閃縮，低頭迴避著：「同埋…我仲有一個請求……」
『咩請求？』
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
超市門口的收銀處位置。
中午十二點，係超市平日最平靜既時候。
因為既未到打工仔既放飯時間，又過左最繁忙既上班時段；所以，門口兩個收銀處坐係度既嬸嬸，都經常會係度閒話家常，無所事事。
當門外出現一名身影靠近時。
『喂～』坐在收銀處的大嬸熱情道：『早晨喎蚊蚊，咦？有男朋友仔送你返工呀～？』
另一名亦和應著：『係咩係咩？嘩…又幾高幾大隻架喎。』
『早晨呀姨姨…』依雯尷尬地笑了笑，便回過頭說：『家豪…你送到我呢度得架喇…！』
『傻婆，』家豪摸摸依雯的額頭，笑說：『你咪照返工，唔洗理我。』
『但……哎吔…呢度…』依雯不好意思地看著身後的收銀處：『你知…佢地幾八卦架啦…！一陣佢地又拎我黎開玩笑架喇…』
依雯呢個怕醜既樣，在場人仕個個都係第一次見。
『嗯，咁好。』家豪爽快地回答：『我收工再黎接你。』
『嗯～好啦。』依雯開朗的笑著：『食飯打比我啊。』
『好，你返工都小心啲。』家豪表現得著緊。
『知喇…長氣！』
『哎唷唷唷…』身旁的大嬸道：『你兩個真係冤氣架姐～～』
『靚姐你唔好笑我啦…！』依雯的臉頰紅得像蘋果一樣。
咔嚓————
我係經理房聽到呢個時段明明無咩人，但出面都可以咁熱鬧…就知道依雯應該已經返左黎。
正當我甫出房門外，忽然驟見超市門外長得密密麻麻既樹木開始乾涸，枯葉橫生。
原來唔經唔覺，已經漸漸踏入深秋，雖然天氣仍然幾熱…但望一望經理房門外既日曆，仲有唔夠幾日…就到左中秋節既日子。
依雯係呢段時間，唔單止多左假期，更多左返工既機會。
換句話說…我地見面既時間…會變得更多。
但試問；家豪已經係依雯既男朋友，如果我繼續同依雯咁接近，家豪會點做？
為免夜長夢多，我只能選擇逃避。
『喂！』依雯一如以往的向我大呼小叫著：『點啊～主任哥哥。』
「早晨。」我冷漠地回應。
『早晨……』依雯被我的語氣弄得一頭霧水：『喂…任生～你今日怪怪地咁既？』
「怪？」我好奇的問：「邊度怪。」
『冇啊…好似黑口黑咁面囉！』依雯又說：『係咪有咩唔開心啊，唔怕講比姐姐知喎。』
「阿蚊。」我第一次這樣叫她：「你就遲到喇，仲唔好去換衫？」
當然我是掛著一副虛偽的上司笑容。
『…………』依雯一臉呆滯，嗔道：『唓，好叻咩！扮哂野咁！』
「…」
依雯轉身向著大倉的更衣室離去後，我…沒有想太多。
因為…我知道就算我講咩都好，依雯已經有男朋友，呢個係事實。
無論我做啲咩，我同依雯已經唔可以再返去好似以前一樣。
與其不三不四咁拖拖拉拉、曖昧落去，倒不如盡快彌清關係…做返普通同事更好。
可能你會問…我點解可以咁決絕，或者……係詩娜曾經教識我既事。
做人…要拎得起…放得低。
『衡仔。』忽然，背後傳來一道男聲：『原來你都係度做野？』
「……」我回望過去，出現一個熟悉的身影：「家豪？…做咩你會係度…」
『無，我頭先送依雯返工，』家豪一臉嚴肅地看著我：『所以咪黎睇下個傻婆有咩同事。』
「哦……」我的目光不斷逃避著。
『係呢，我想請問一下，』家豪語氣一轉。
「咩事……」我邊整理貨架邊回應著。
『其實都冇咩特別。』家豪走近說：『我想問…你同我個妹，係咪認識既？』
「………」
忽然，我一聽到家豪問呢句時…
令到我整個人全身都僵硬了起來，而且…還感到一股由心而發的灼熱…直襲到腦際間。
豆大的汗珠立時在我額頭上冒出。
「你想問啲咩…」我橫了他一眼。
『衡仔。』家豪目不斜視地盯著我說：『我唔敢話自己有幾成熟，但，我相信我既經歷會比你多。』
「………」我緊張得哼不出半聲。
『你係一個咩人，就算我個妹唔講，』家豪擺出一副帶敵意的笑容：『單憑我雙眼就已經睇穿你。』
「我都唔知…你講咩……」我仍在裝傻道。
『聽講依雯既爸爸好似當你係仔一樣？』家豪問。
「我唔知…我係工作上一向都好努力！」我澄清：「絕對唔係算關係上位既人。」
『我明白。』家豪細聲說：『如果我將你既事話比依雯一家人聽，你估…你仲會唔會好似呢一刻咁？』
「你…！」
『放心，』家豪退了一步說：『我無惡意，我只係唔想我女朋友…身邊有呢種人存在。』
「咩呢種人，」我懷著敵意說：「我唔知你係度講緊咩！」
『衡仔，希望你真係可以體諒我。』家豪的態度開始軟化：『換轉你係我，你知道你女朋友身邊有一個周圍食女既人，你會點睇？』
「…………」我竟然吐不出半句反駁。
『相信你同我都會一樣。』家豪轉身而去：『只要你識做，我地都仲係朋友。』
「……我明白…」我接著說：「你放心…就算你唔黎搵我…我都早已做左決定。」
『係就最好。』
家豪離去後，我只能站在原地望住佢既背影，而不安既心情更是揮之不去。
老實講，家豪講得一啲都無錯。
我比大家既印象，就只係一個終日靠打機食女既賤男，甚至係狗公。
試問你地身邊有同我一樣既人出現…相信大家都會好似家豪咁做。
畢竟，依雯已經係佢女朋友；得到男朋友身分後既家豪，唔再需要閃閃縮縮，更可以名正言順咁…用佢既身分，去守護最重要既人。
當然，就算家豪唔黎搵我，我亦一早估到自己應該要點做。
我今日之所以咁早返公司既原因，其實都不外乎關於依雯既事。
自從琴晚同依雯分別，返到屋企後我已經諗得好清楚。
既然…依雯都已經得到幸福，而我…亦重新踏上工作既軌道，為免我地互相影響到對方。
我只能做出一個決定。
「調舖」
由於我岩岩升職仲有好多野要學，基本上係調舖既最好時機。
起初經理都有問過我有冇興趣轉換下工作環境，學多啲野等等，但果時…我好想留係依雯身邊多一陣。
想聽依雯分享自己經歷又好…好聽佢鬧我都好……只要呢段日子有依雯既支持…我就別無所求。
不過…事到如今…我同依雯已經唔可以好似最初既時候一樣，
就算依雯可以；我都過唔到自己果一關。
啪啪—
『主任，請問今日有咩工作呢？』依雯換上一身男生裝束出現在我眼前。
雖然依雯同平日一樣，但自從我頭先既態度之後…
佢就好似get到我比佢既signal咁，變得非常冷淡。
其實…我都唔想咁…
當我交托完一切今日既工作比依雯後，我便走到她身旁。
「阿蚊。」我站在依雯旁。
『又點呢主任？』依雯從蹲姿站起，發悔氣道：『上班時間唔可以傾計架喎。』
「………其實…」
『冇咩我去忙先啦，仲有好多貨未上。』依雯極不耐煩的回應。
「依雯…！」我叫停了她：「一陣lunch time…我地可唔可以傾下？」
『傾？』依雯捧著紙箱，好奇地回望著我：『傾咩啊，有咩好傾？你都咁冷淡～～』
「今朝…對唔住…」我鼓起勇氣說：「我已經同經理要求左調鋪，恐怕…我之後都無機會再你聯絡……」
啪勒—————
紙皮箱應聲跌落地下，滿滿地貨物立時散到一地。
「依雯…？」
我仔細的看著依雯的雙眼，只見她整個人好像呆了呆，櫻桃色的嘴唇強忍的蹶著。
眉宇間似是懷著一些複雜的心情…
『你頭先講咩話…？』