【苦】《英雄聯盟》 - 一件次世代既愛情工具: 《戒心》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
『依雯，』家豪拿著咪高峰，用堅定不移的眼神凝視著依雯：『做我女朋友好嘛？』
『Wow～～～』『應承佢！應承佢！』『家豪加油！！』
『家豪……』依雯不知所措地低著頭，然後慢慢地抬起頭來，滿臉疑惑地看著家豪。
『依雯…？』家豪好奇地追問著。
『你…』依雯眼神間閃過一絲不安，熱淚盈眶的道：『真係……唔會…再令我…受傷害…？』
看到這一幕，我和周圍的眾人都愣住了情緒，彷彿能感受到依雯曾經的傷痛一樣。
『我，葉家豪應承你。』家豪走到依雯的咫尺之間：『永遠…唔會再比你受傷害。』
依雯聽到後淚線終於失守，卻破涕為笑的道：『嗯…！』
輕輕的一聲答允後，家豪便把依雯一擁入懷，並展露著幸福和滿足的笑容。
而依雯卻是哭成淚人般，依靠著家豪的胸懷，就好似一隻受傷的小鳥終於找到一個歸宿一樣。
『嘩嘩嘩！』老闆立即把咪高峰開啟：『恭喜哂一對新人……呀唔係～！係一對有情人終成眷屬先岩！』
啪啪啪啪啪啪—————
全場的所有人，就好似觀賞婚禮既賓客咁，不斷向住二人投射著無比祝福的眼神。
雖然只係正式拍拖，但大家望住佢地…就好似求婚成功一樣咁開心。
本應在場既每一個人都好應該沈醉係呢一片普世歡騰既氣氛底下，為二人去祝福；
但…只有我唔係。
係大家眼中，明明依雯同家豪係幾咁天造地設既一對黎…但點解…
點解我會有種「失去」既感覺？
果種感覺…同失去詩娜好唔同；沒有心痛，沒有悲傷，更沒有撕心裂肺的感覺…
呢刻我有既感覺…只係一種空虛。
應該點講好呢…？
就好似…我地由細細個開始追一套長篇漫畫，當我地追到去十幾年後既今日時…
我地先發覺最後一章大結局…已經被作者更新完，每次掀到漫畫最後一頁，
明明都會有好多預告、特典等等…但大結局之後…竟然只係一段又一段令人感動既文字。
結局後，我地內心剩低既…就只有無盡既回憶，同埋空虛。
明明我知道呢一日總會來臨，明明我知道凡事總有完結既一日；
但我卻不能懷著一個樂觀既心情去面對。
因為畢竟……「佢」真係陪左我渡過左好多時光……
『咳咳～～』依雯和家豪相擁完後，便推開家豪說：『比支咪我先。』
『嗯。』家豪領命地把手中的咪高峰交到依雯手上：『做咩？』
『大家～～聽我講一番說話先～～！』依雯拿起咪高峰說道。
『想講咩呀？』、『結婚啦！』、『幾時擺酒呀！』、『家豪好波！！』。
四周的歡呼聲仍未停止。
『大家靜一靜先！』依雯大聲的說道後，便望著眼前人：『家豪～你做左我男朋友～係咪會聽哂我話架先？』
『當…』家豪恍了恍神：『當然！』
『你頂得順先好喎…！』依雯嘟起小嘴道：『你知我啲脾氣好火爆好難頂架啦？』
『難頂？』家豪冷笑道：『難頂都頂左你咁多年喇，傻婆。』
『哈哈哈哈哈！』眾大忍俊不禁地大笑起來。
『哼！』依雯像是管家婆一樣說著：『你呀～以後無我批准唔準去飲酒！唔準管我！唔準鬧我！我講一你唔可以話二！知唔知！』
『嘩～家豪，後悔仲黎得切喎！』、『係囉～！不平等條約黎既！』、『縮沙啦家豪！』
眾人不斷說笑地挖苦著。
『好。』家豪再次把依雯一擁入懷：『以後所有事，我都聽哂你講。』
『嗯嗯…！』依雯感動得喜極而泣。
我望住佢地咁開心…唔知點解…連我既眼淚都忍唔住流下來。
但呢滴眼淚，我唔知道係開心，定係悲傷，定抑或懷念……
可能呢種感覺，就叫五味雜陳…。
其實我真係好羨慕家豪…可以擁有一個咁好既女朋友…
過去果一個多月既相處，就連我咁傷心既情緒…都可以被依雯安撫下來。
而且，雖然依雯好男仔頭，性格好粗魯，但…依雯所做既每一件事都出自真心，絕無半點虛假。
依雯好到…甚至……我本身可能想………
唉！仲亂諗野做咩！
『喂～』身旁的阿晴用指尖蜻蜓點水咁掂我膊頭一下。
「做…」我抹了抹眼淚：「做咩？」
『你做咩啊…？』阿晴側首追問：『做咩流眼淚既？』
「無…吹沙入眼姐。」我用了一個最老土的對白。
『嘻…扮咩姐你？』阿晴竊笑說：『係咪羨慕佢地呢？』
「羨慕……」我喃喃自語著。
『係啊～～』阿晴望住一對戀人，雙眼中帶著憧憬：『如果可以搵到一個適合自己既另一半，你有脾氣時…佢又會遷就你，你做錯事時，佢又會教導你……唔會淨係得一個主導愛情～咁唔係好好咩？』
「當然啦…」我苦笑說：「如果我可以搵到一個…我一定會好好珍惜佢。」
『係咩～？』阿晴忽地打斷。
「做咩咁問？」我回望著她。
『嘻～』阿晴偷笑了一下便說：『冇～我仲以為你已經搵到添？』
「咩啊…幾時有……」
『真係咩？』阿晴不斷試探著我：『咁…果時你唔係有個女仔好鍾意架咩～？』
「……你點知…？」
我漸漸緊張得額角冒汗，因為…我從來都無同阿晴講起其他女仔既事，更加唔好話係提起詩娜。
『呵呵～』阿晴用奇異的目光哄過來：『你個好兄弟講哂比我知喇～』
「我個好兄弟…？」我剎那間想起：「你指逸朗？」
『嗯嗯！』阿晴滿意的笑著。
「係佢…同你講既…？」
逸朗同阿晴有接觸，唯一一次應該係幫我同佢duo rank果一次，但…逸朗明明話無講出去架？
『係啊～～』阿晴雙手交叉伏在胸前：『你唔記得落club果日咩？』
我回想起一個月前…在幫璇璇clubbing的那天遇到阿晴的情況。
「記得…」
『嘻～就係果日我就識到你既好兄弟啦！』阿晴得意洋洋的說：『一問先知…原來一直都係佢幫你陪我duo rank既！衰人～！』
「呃…」我難辭其究：「你聽我解釋先……」
『唔緊要啦，』阿晴續道：『反正我都無嬲你。』
「無嬲我…？」我皺眉問。
『係啊…』阿晴毫不介懷的道：『反正我都係想升區之嘛…邊個陪我打都一樣～～』
「哦……」我終於鬆一口氣。
『不過～』阿晴目露著兇光，詭笑著：『我就唔會再搵你咩咩咩架喇～』
「咩咩咩…？」我好奇地思考了一下，驟覺道：「哦……你指……」
當我鬆一口氣既同時，忽然記起有一樣重要既事未做！
「阿晴…！」我激動的問道：「你可唔可以…唔好將我地既事講出去…？」
『我地既事～？』阿晴呆呆的望著我：『你指…之前果啲？』
「係！」
『下…？』阿晴嘴扁扁的說：『傻啦…人地又點會亂講呢啲野出去喎……』
「呼………」我的心情終於稍稍安定下來：「好彩……」
『不過……』豈料阿晴卻欲言又止。
「嗯…？」我戰戰兢兢的追問。
我全身僵硬地望住阿晴，只見她帶著微笑，拋下最後一句。
『除左我阿哥之外。』
呢一句深深地打進了我的腦海，頃刻之間…我全身好似有一股電流通過一樣。
心跳…開始慢慢加速；呼吸…亦開始變得困難。
我像是一個機械人般，將頭慢慢擰到家豪和依雯的方向。
只見到他們二人不斷向祝福的人們答謝，但有一瞬間，家豪的雙眼，恰恰與我對望著。
我望到家豪既眼神…就好似睇穿我整個人一樣。
莫非家豪同依雯表白…係為左…？