【苦】《英雄聯盟》 - 一件次世代既愛情工具: 《解脫》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
正當任天衡對於詩娜的行為懷著不安心情的同時…
另一邊廂。
英國宿舍晚上九時。
咯咯咯咯———
『Cacilla…』女生捧著餐盤說道：『我煮好左晚餐，拎入黎比你好冇？』
「唔洗喇……」詩娜在房內輕聲的說道。
『咁…』女生站在門外心感不安，便說：『一係我幫你執一執間房啊…？』
「…嗯…唔該…家欣…」
家欣是詩娜唯一的室友，外表雖然平平無奇，而且鼻樑上托著一副厚厚的眼鏡，對戀愛更是一竅不通，但作為詩娜的室友，家欣卻是對詩娜如像親姐姐一樣祟拜。
不僅是羨慕詩娜的外表，更對詩娜的感情有著深厚的興趣。
可是直到前幾天，詩娜變得自暴自棄後，家欣只能一直在旁…默默地照顧著傷心欲絕的詩娜。
咔嚓———
『我入黎喇…』家欣小心奕奕地打開門，說道：『聽日八點有堂…食完記住早啲休———』
「嘎…嘎……」
『Cacilla！』
家欣看見詩娜面青唇白地躺在床上，立即跑到詩娜床邊。
然而，家欣在中午買完午飯給詩娜後，一心以為把食物放在桌上，詩娜起床時會吃掉；
但可惜…家欣留意到檯上的食物…卻是分毫沒動。
『Hey…！』家欣在座床邊，輕撥著詩娜的長髮：『嘩…你發燒呀…！』
「嘎…嘎……」詩娜不斷發生沈重的呼吸聲。
『做咩你要咁傻唔食飯呀…！』家欣立時不知所措：『我…我call救護車先啊…！Cacilla你支持住！』
家欣立即拿出電話，當她準備按下號碼鍵時——
「唔…咳…唔好……」詩娜虛弱地捉著家欣的手。
『唔得啊！你咁落去既話…』
「家欣……」詩娜打斷了她，輕聲道：「我可以聽你話去醫院…但…你可唔可以…幫我做一件事…？」
家欣攙扶著詩娜問：『咩…咩事？』
……
………
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
另一邊廂。
香港深宵的小巴高速地在寂靜無人的公路上行駛，伴隨著月色映照之下，令到一眾歸家的夜青年更顯孤獨。
小巴開左車之後，我同依雯就坐係車尾，直到駛入隧道時…仍然未有詩娜的消息。
雖然我唔知道詩娜呢一刻做緊咩，但我只知道…自己個心真係好掛住佢…
唔知…大家有冇試過一件事？
係凌晨時段，當你忙碌完一日之後，開始踏上歸家既車程時，
你會坐係靠窗口既位置，然後戴上耳機，播住一段熟悉既音樂…
當你望住車窗外如走馬燈既街景，你就會回憶起一段又一段既往事。
無論你身邊既係咩人都好，都好似唔再存在一樣，滿腦子…都係屬於佢既畫面。
你好想時光可以倒流；好想回到去果一日；甚至好想將佢留係自己身邊…
永遠永遠…唔好再分開。
『司機唔該！燈位有落。』
一名乘客的叫聲把我從回憶中拉回現實。
我仔細地打量左一下周圍，發覺…原來已經差唔多到達馬鞍山。
正當我準備拎手機出黎時——
忽然間，我感到一股力量壓在我的肩膊上。
「依雯…？」
我側首一看，發現…原來依雯已經係我膊頭上面…好甜咁訓著左。
畢竟仲有一段車程，就由她休息一下吧，反正…我今日都麻煩左依雯咁多…
原來借個膊頭比一個女仔挨…果種感覺係好奇怪…
明明自己係心有所屬，但唔知點解…我好似將依雯當左係詩娜一樣咁…？
［知不知你在濫用我的惻隱———］
當我望住依雯到入神之際，電話忽然響起來。
取出電話後，定睛一看，呢個來電……！
「喂？！」我立即把電話放在耳邊：「詩娜！？」
『喂…？』
聽筒的另一邊卻傳來一把從未聽過的聲音。
「你…」我回復冷靜地說道：「你係？」
『請…請…請問…』女聲緊張得吞吞吐吐：『請問…你…你係唔係…任…任任天衡…？』
「係，我係。」我回答完後便說道：「你係邊個？！搵我咩事？…仲有…點解用詩娜既手機打比我！？」
『我…我…』女聲頓了頓，咕嚕一聲吞了一口水後說：『我係…Cacilla既朋友…』
「Cacilla…」我回想起詩娜的英文名：「係！請問有咩事！？」
『Cacilla…話…』
「咩？！」我急不及待地追問。
『佢話…叫你以後唔好再搵佢…』
唔好…搵佢…？
「點解！」我不禁大聲的叫嚷：「點解呀！你即刻叫詩娜聽！」
『佢…佢唔會…再聽你…電話架啦…！』女生的聲音雖然顫抖，但卻繼續說：『因為…佢已經識到男朋友…！你唔好…唔好再搵…佢喇！』
男…朋友…？
「你講大話！」我生氣得火冒三丈的說：「詩娜唔會咁…唔會咁架！你唔洗再呃我！」
『呢件事…係真既！』女聲忽然理直氣壯的道：『Cacilla話容忍唔到一個會講大話呃佢既人…同…同埋…呢排每日陪住佢打機既果個男仔…就係佢既男朋友！』
陪住詩娜打機…？
的確，我留意到一直都有一個男性既人名…不斷出現係詩娜LOL既紀錄入面。
但…
「無可能…」我難以置信的搖著頭：「無可能！！詩娜係邊！…係咪佢出左事！！」
『你……』忽然女生的聲音頓了下來。
「喂！？」
『比我聽。』
呢把聲…
聽筒傳來詩娜的聲音後，我內心剎那間愣住，四周的空氣彷彿凝結了起來。
「詩娜！？」我立即問道：「係咪你？頭先既野唔係真架？係咪呀？！你知嘛…？我已經同逸朗道左歉———」
『任天衡。』雖然這是詩娜的聲音，但聲線中卻毫無感情。
「嗯…？」
『請你搞清楚一件事…』詩娜語調平淡的說：『我地從來都無開始過，你更加唔係我邊個…所以都無權干涉我既事…希望你可以明白…』
「詩娜…？」我立即續道：「你真係詩娜…？」
『任天衡…我把聲…你唔認得咩？』
「…………」
『我要講既野…係咁多。』詩娜毫不在意我的說：『我已經…有男朋友，希望你以後唔好再打擾我生活。』
「唔會…你唔會係詩娜…」我喃喃地說道：「係咪發生左啲咩事啊…？你唔怕同我講架…！」
『關你咩事？』
呢一句，狠狠地把詩娜的身分…證實無誤…
「………」
『咁你而家相信啦？』詩娜拋下最後一句：『你應該愛既人，並唔係我…。』
「詩娜……」我的淚水不禁奪眶而出：「詩娜呀…！」
『呢個電話我唔會再用，拜拜。』
嘟———————
我全身都動彈不得，右手只能拿著電話…放在耳邊發呆。
頭先詩娜既聲音…對我毫無感情可言，簡直…就好似一個陌生人一樣。
起初…有來歷不明既人打比我時…我都半信半疑。
但詩娜後來竟然親自接聽…而且…仲講出呢一番說話…
原來，我一直都唔係佢既邊個…我只係佢其中一個男性朋友…
原來，我一直都自作多情…係機場表白後…詩娜並無同我講同一句「我愛你」，我就應該要清醒。
又或者，詩娜曾經有比過機會我，但我卻一手將之摧毀。
可能詩娜對我既信任，就好似一張紙咁，皺左…就永遠唔能夠再撫平。
詩娜見到同我一齊既將來，係一段充滿著謊言既感情…
所以…詩娜先會做出呢個決定…
『喂…』依雯早已醒過來：『你…無野丫嘛…？』
「無事……」我看著她，邊流淚邊笑說：「或者…對我黎講，係一種…解脫…」
『喂…唔好嚇我喎你？』依雯戰戰兢兢地追問。
「哈…哈哈…」我的臉上沒有任何表情：「唔係咩？佢已經…搵到男朋友…我應該開心呀…」
『但…頂，你唔好咁啦…』依雯皺著眉：『你想喊你喊出黎啦！唔好諗埋一邊啊！』
我望住依雯，彷彿見到詩娜般問道…
「我呢種人…係咪唔值得被人愛…？」