【苦】《英雄聯盟》 - 一件次世代既愛情工具: 《挑釁》
此時眾人都將目光集中到我身上。
我從阿Sam既眼神睇得出，佢知道我住係依雯隔離雖然有點意外，但卻並無擔心之處。
而依雯就醉醺醺咁，根本唔知而家既情況發生緊咩事，只係傻傻地亂講野…
相反，家豪就向我投下一個不信任既眼神，甚至…令我感到有點壓力。
正係我躊躇到不知所措之時。
『唔怕啦！』依雯腳步浮浮的走到我身旁：『家豪都攰架喇…聽日仲要返工架嘛你。』
家豪並沒有說話，只是用施疑的眼神瞪著我。
「呀～！」我分析了一下後心領神會，便叫嚷道：「唔洗啦，我仲有啲野要做嘛，我自己搭車走先喇。」
『下……』依雯不為所意的道：『咁夜…仲有乜鬼野要做啊？你聽日仲要返工架喎…唔係阿爸實……』
「你唔明架啦，」我立即想了一個籍口：「我…仲要搵人傾啲野嘛，你唔記得左喇咩？」
『咩人啊…？』依雯心感好奇地望住我。
「你琴晚咪叫我咪再咁傷心既？」我笑笑口說：「我而家無事架啦，我會搵返佢…真正咁道歉。」
『唔……』依雯正在思考之時。
「走先啦～！」我立即調頭轉身離去：「下次見喇！」
『洗唔洗走得咁快啊…』阿Sam望住遠去的背影說道：『喂，咁我都走先喇，蚊蚊你takecare好自己啊～！』
『知喇長氣鬼！』依雯淘氣地說。
阿Sam往另一邊離去後…
『阿蚊。』家豪的聲音從依雯的身後傳來。
『做咩～？』
『你呢個朋友…』家豪頓了頓卻欲言又止：『係咪識左好耐？』
『嗯？』依雯莫名的看著家豪：『做咩咁問既？』
『無野…』家豪不敢再追問下去，便說：『我地…行去搭車。』
『做咩啊～～？』依雯卻追問道：『家豪你今日咁奇怪既？頭先已經覺得你今日好似黑口黑面咁…係咪返工唔開心啊？』
二人步行了沒幾步，家豪便停了下來。
『我覺得果個人…』家豪正氣凜然地看著依雯：『應該……』
『應該…？』依雯一臉無奈，心煩地說：『哎呀！做咩連家豪你都變得咁婆媽架！』
『總之，依雯你要小心你果個朋友。』
『小心…佢…？』
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
我拋下一句後就頭也不回地，一支箭咁跑走離開果個場地。
我走得咁急，事關係因為氣氛實在太尷尬！
而且…某程度上我都唔算係講大話丫？
依雯不論係琴晚，定抑或係今日帶我黎認識新朋友都好，都係想我可以忘記痛苦；
可以搵返自己…然後再道歉姐？我而家走左去…都係為左詩娜，相信…依雯都會想我可以盡快氹返詩娜…
唔洗再終日哭哭涕涕，否則…我咪浪費左依雯琴晚既一番苦心囉？
琴晚既一番苦心…
咪住先…
我頭先臨走之前講既野…好似係……
「你琴晚咪叫我咪再咁傷心既？我而家無事架啦，我會搵返佢…真正咁道歉。」
仆…仆街！
我咁講左…咪即係連阿Sam都知道琴晚依雯陪左我一晚？！
弊…弊喇…根據我同阿Sam傾左成晚，以佢呢種八卦既性格…肯定好快會將我同依雯既事揚出去！
唔單止係咁…！
最大鑊係頭先家豪都在場，萬一佢以為我故意散佈同依雯琴晚發生既事，
以為我向佢示威既話…我咪水洗都唔清！？
唉…呢次真係大撚鑊喇！
我一邊皺著眉，一邊搵交通工具返屋企…
未幾，我就坐車去到旺角轉車，準備乘坐通宵小巴返馬鞍山。
嘟———
今晚搭車既人唔係好多，車上仍有很多空位，而我就習慣坐係車既最後排聽歌。
但今晚…雖然依雯既事…我唔知道會唔會係自己杞人憂天，可能…阿Sam根本都無在意聽到。
不過就算家豪對我有敵意，咁又點？反正我都唔洗成日見住佢…
諗完一番之後，我終於稍為鬆一口氣。
不過而家最重要既事，都係打比詩娜先……
『嘟—咔——你已被接駁到———』
唉…仲係封鎖左我…
都已經過左幾日啦，點解佢可以咁絕情？
就連少少既機會都唔比我解釋？！我真係唔明。
其實諗深一層，可能詩娜未接觸過社會，自細又嬌生慣養，先會將謊言睇得咁重要。
如果佢出黎做過野，有社會經驗都應該明白…其實講大話同食兵一樣，都係基本野黎。
不過即使搵唔到佢，我依然嘗試用其他方法。
先係Whatsapp，之後line，然後係Skype，甚至係telegram，IG，FB等等，
我全部都試過哂，可惜…仍然係一無所獲。
正當我灰心不已之時…我見到…通訊APP入面，尚有一個軟件。
「Lolchat。」
呢一個軟件，係專屬比英雄聯盟呢個遊戲而開發。
基本上…LOL呢隻game到左今時今日，已經唔單止係一隻遊戲咁簡單。
除左係食女工具之外，更甚者，已經慢慢演變為通訊工具。
而呢個app就係for你身處街外，唔係屋企時…都可以比你登入自己既LOL帳戶，從而睇到有咩朋友上線。
我打開左程式之後，指尖飛快地於螢光幕上掃來掃去，直到…
見到一個熟悉人名。
此時，即使我已疲憊不堪，但當我見到詩娜個Game名時，內心卻感到無比興奮！
而且…！
詩娜個game名仲要係綠色，顯示為online！
「嗨……here？」我立即輸入了一道訊息。
發送左出去之後，我雙眼停留左螢光幕上目不轉睛。
可惜…等左一陣後…仍然未有回覆。
「詩娜…求下你係度就覆我一句啦！」
無論我send左幾多句道歉過去都好，詩娜仍然都係冇理會我。
時間…唔知過左幾耐，我只知…小巴車上面既人開始愈來愈多，幾近滿座。
就係呢個時候。
嘟———
『喂，兩位等等。』前方傳來司機響亮的聲線：『冇撚哂位喇。』
『下？咁……』一把女聲續道：『家豪你返去先啦…送到呢度得架喇…』
嘩屌！
竟然係呢個時候撞到依雯…有冇咁好彩啊！？
不過…諗深一層…其實返去都係得呢條小巴線…依雯九成都係係度搭車架喇。
我聽到依雯把聲後，即刻將個身拖低，希望家豪唔好見到我，如果唔係又有排煩！
『嗯，』家豪續道：『咁你小心啲。』
家豪落左車後，依雯便向住車尾既方向走過來。
「喂…」我尷尬地望住依雯：「嗨……」
『頂～！』依雯坐下來便道：『都估到撞到你架喇！』
「係…係囉可…咁岩既……」我充裝自然的說。
『點啊你？』依雯低頭看著我手：『打左比人未？』
「打左……」我續道：「不過無人聽……而且…我係LOL搵佢都無應我…」
『乜佢都有玩LOL架咩？』依雯感興趣的問。
「有啊……」我回想起甜蜜的邂逅：「其實…都係因為LOL…我先可以識到佢…」
『咁係抵你死架喇～！』依雯不留情面的說：『激嬲女仔～預左比人嬲架啦！』
「唉……」我只能搖頭歎氣。
我望住手機螢幕上既對話…詩娜…
點解仲唔應我…又唔開始同人玩？
已經過左二十分鐘…一直由顯示Online變到away…點解都仲唔覆我…
詩娜唔打機，但又唔offline…到底係度等緊乜……？