【苦】《英雄聯盟》 - 一件次世代既愛情工具: 《想太多》

『你好，麻煩上３樓登記丫。』


詩娜跟在我身後，即使她不說話，我也能感受到佢而家心入面係非常害怕。

而我…相對地亦有一股莫明的緊張感。

甫進維記後，經過一條短走廊，轉彎便見到升降機，升降機旁亦有一部閉路電視。

閉路電視影到我地後，便傳來一把阿姨既聲音，叫我地二人入Lift後按三字樓登記。



我對呢種場面係見怪不怪，相反詩娜就……

『任天衡……』詩娜拉一拉我衣袖：『做咩會有其他人既…？』

「嗯？」我邊等lift邊回望著她：「應該係比左錢先掛……」


當然係要比錢先啦，唔通入左房扑扑下野先入黎問你收錢咩？



不過，我都能夠明白同體諒佢。


『拿…一…一陣…』詩娜緊張得吞吞吐吐：『一陣…你…你…』

「放心啦，」我故作自然，退後兩步，打斷道：「我同你距離唔會近過一米，咁你放心啦？」

『哼…我只係唔想返屋企咋…！你唔好誤會啊！』

「梗係啦，」我接著開玩笑說：「唔通你真係想同我爆房咩～？你肯我都唔制啦。」



『你講咩話！』語畢，她又一記招牌的重掌打在我身上：『一陣上到房…你即刻走呀！』

「下～？」我皺著眉，驚訝的望著她。


叮———的一聲後。

升降機終於到達。

當門打開後，我便說道：「入去咯。」

『嗯……』她低著頭，害羞說：『你入去先…！』

「怕左你。」



當我地兩個都入左lift後，我立即根據指示，按上升降機３字的位置。

不消一會，便到達三樓的地方。

「你幫我撳住部lift先，」我望住打開升降機的門：「我出去比錢。」

『哦…』她不安心地看著我。


幸好今日唔係週末，只係平日既日子，三樓等待處並無任何客人，只有我同身處係收銀既阿姐。

我嫻熟地走到收銀處前，透過收銀處的小窗看著阿姐。

『填左佢先。』收銀阿姐遞過一塊登記表的膠板。



「哦。」

我接過登記表後，便飛快地係上面亂填一通，果啲咩出生日期、姓名，全部都係用假名就算。

記得第一次寫呢份野果時，我仲傻傻下咁將自己啲真實資料寫哂係上面，好似去試場應考咁樣。

真係諗起都傻。

「搞掂。」我將登記表連同鈔票一同遞回：「唔該。」

『四百五十，』阿姐找錢後，遞了一包野來，接著說：『十三樓左邊果間。』

「好。」




整個過程都十分簡短，辦好一切後，我便走回一直在升降機等待我的詩娜。

「搞掂喇，」我甫進升降機後按下十三樓：「做咩啊你～？」

『唔…？』詩娜發呆地從白日夢中回過神來：『冇…冇呀…！關你咩事！』

「哈哈…」我抬頭望住樓層顯示板道：「好緊張呢～？」

『邊…邊有喎！』詩娜立即臉紅紅地澄清：『哼…！只係…有啲熱之嘛！仲有啲啤酒啊…鬼死咁重…！拎死人咩？』

「呀…係喎，」我一展風度地搶去她手中的一袋啤酒：「幫你喇。」

『哼，』她不屑地拋下一句：『我係唔～～會同你講唔該架喎～』



「哎丫…」


我心想著：「你條o靚妹丫…一陣上去我就姦左你。」


叮———

說時遲那時快，升降機便急速地去到所屬樓層。

一打開門，迎面而來既係有三間房的峽小空間，

就好似玩逃脫遊戲咁，前面有A、B、C三道門比你揀咁樣。

根據頭先阿姐既指示，應該係左邊果道門…1301室。

不過升降機門打開左之後，我便回望著身旁的詩娜，只見她一動不動的站著，而且臉頰簡直紅到頂點…！

正當我一頭霧水，唔明佢點解會咁時……

忽然聽到…


『啊…啊…嗯…啊…大力啲…！好爽啊…啊！好舒服啊老公…！』


仆你個街。

其實一間時鐘酒店，最多光顧既客人並唔係夜蒲既年青男女，反而係結婚多年既老夫老妻。

原因係因為佢地有左仔女之後，當仔女開始長大，踏入青春期時，兩公婆既房事…就唔可以盡情去做。

畢竟，屋企既隔音設施始終唔係咁好，想放縱一下都怕被子女聽見。

所以，當夫婦黎到時鐘酒店，就可以盡情去叫…叫到幾放蕩、幾誇張、幾嗨都唔會有人理。

不過…呢個時候…竟然比詩娜聽到。


「Errrrr……」我不斷地找說話道：「其實你唔洗咁在意…都…好平常…姐？」

『做咩～姐你？』詩娜竟然皺著眉，扮作自然的說：『大驚小怪咁～！』


有時候，我真係被詩娜呢種懶係大人咁既小朋友性格，弄到哭笑不得。


「啊…下…？」我猶豫地皺著眉，不知如何反應。

『行啦，』詩娜看著房間門牌：『邊間啊…？』

「嗯……」我走出升降機，行到左邊的門前：「呢度……」


咔嚓———


一打開房門，迎面而來既係一個150尺左右既房間。

門口既左手邊，係一個磨沙玻璃浴室，直立式淋浴設計雖然簡約，但卻感到像家的親切感。

右手邊係梳妝檯，檯上放有兩個杯、印有維記名字既水瓶、仲有一套準備好既沐浴包。

而當然最唔少得既，就梗係爆房必備，維記附送既———「安全套」。


正常黎講安全套都要另外收十蚊個既，不過維記就比較好，會送埋比你；亦係多人黎呢度爆房既原因之一。

其他分店既維記都會將condom放係梳妝檯之上，不過旺角唔同，係收錢時已經比埋你。

不過，我當然早就收埋左係褲袋啦！

拿大家唔好誤會呀，我唔係打算要用…只係以防萬一，以防萬一……姐……

唉，自己講出黎都好似有少少牽強咁。


『好耶～～～』


忽然間我身旁既詩娜就好似個小朋友咁，一支箭衝到前面既軟床之上。

『哈～』詩娜雀躍地飛撲到床上，攬住個枕頭：『好舒服呀～～』

「………」

老實講，佢撲埋去果時…我企係身後見到佢條短裙…入面既底底約隱約現…

而唔知佢係太攰…定係第一次黎太興奮，完全無理會身邊有一個正直血氣方剛既男仔係度。

詩娜一邊攬住個軟枕，一邊踢著小腿，將對平底既婆仔鞋飛到周圍都係。


「咁興奮做咩…」我將手上拎住既啤酒放到梳妝檯上。

『關你咩事！』詩娜坐起來，將整個枕頭飛埋黎：『你唔準行埋黎呀！知唔知…！』

「得啦…」我坐在地上，拿起罐啤酒：「就算你比鬼搞，我都唔會理你。」

『下…？！』詩娜立即皺著眉，嘴巴顫抖著說：『咩…咩鬼啊…？』


我呷了一口啤酒，回望著她時…見到佢忽然臉色一轉，我就知道…

有野玩。

「係呀…」我表情認真的說著：「乜你唔知架咩…？」

『知…？』詩娜不自覺地拿起另一個枕頭，緊緊攬著：『知咩…？』

「呢間酒店…」我打量了一下四周：「其實…之前死過人…而且仲…」

『任天衡———！！』詩娜緊閉著雙眼，嚇到閃著半點淚光：『唔好講啊…！好煩呀你！』

「唔係喎～～」我露出奸狡的笑容：「你聽我講埋先啦。」

『唔聽唔聽唔聽呀～～！！』詩娜忽然渾身顫抖地伏在床上，用張棉被包著自己。


老實講，我都係第一次見到詩娜咁驚青、咁傻既樣。

平日佢都係對我呼呼喝喝，終於都比我見到佢柔弱既一面。


「講下笑咋，唔聽就算囉～」

豈料她在棉被中大叫：『夠膽嚇我…！憎死你呀…！』

「唔嚇你喇，」我向著床上的她叫嚷：「出返黎啦…焗桑拿咩。」

詩娜掀開棉被，露出雙眼：『唔—準—再—嚇—我…！』

「唔嚇唔嚇。」我拎起一罐啤酒，拋到她身旁：「飲少少酒定下驚啦。」

『哼，』她整個人推開棉被，拎起啤酒說：『唔洗你教…！』


嘻笑怒罵一輪舒緩詩娜既緊張心情之後，我便大啖大啖咁飲哂罐嘉士伯。

呢個時候我就係度諗……俗語有話孤男寡女共處一室，女仔實有損失架嘛，

既然我都完成左任務……再留係度…對佢一個女仔好似唔係咁好咁。


我知，我知你實話架！

你想話：任天衡，你扮咩丫？陪人上酒店開房，唔係想食左條女仲想點啊你？

不過我可以認真同大家講，係呢一刻既我……完全無任何非份之想。

係，我既形象係好差，稱唔上一個好男仔；但…我唔係逸朗呀，我搞野都要睇心情架嘛。


正如阿晴呢類…咁姣、咁淫蕩既女仔，送到埋黎唔搞佢對唔住祖先啦…

但而家既詩娜……搞佢就簡直係天理不容，right？

所以，我只好做一個正確既決定，不過當我想開口之時……


「咦…？」我望住詩娜，她拎住罐啤酒呆坐在床上：「做咩發哂呆咁？」

『下…？』她回過神來，淘氣道：『關…關你咩事喎！』

「唉，又呢句，」我無奈地歎了一口氣，慢慢站起來：「咁你早啲休息喇。」

『下？』詩娜好奇地望住我：『你去邊？』

「既然你都安全咯，」我伸一伸懶腰：「呵欠……我都攰喇，咪走先囉。」

『走…？』詩娜皺著眉，鼓起臉蛋喝道：『唔準走！』

「下…？」我心感莫名的問道。

『我…我係話…』詩娜支支吾吾地說：『你話走就走…我咪好無面…！我都無批准你走…！』

「呀大小姐……」我臉上流露著氣餒的表情：「你放過我啦…好嘛…」

『……咁…』詩娜視線轉到地上的啤酒：『你…你買左咁多酒…唔飲哂佢…好浪費架嘛…！』

「唉，得！」

［嚏——］的一聲。


我立即拎起罐新既啤酒，說：「拿，我飲哂佢就走架喇。」

『車…！』詩娜一臉不屑的道：『呢度十幾罐…，你飲得哂先算喇～』

「哈，睇小我？」我嘴角上揚，露出自信的表情：「不過我一個人飲好悶姐？你都要飲。」

『我…？』詩娜黛眉緊皺著，拎住罐啤酒發呆。

「驚呀～？」

『邊…邊個話…！飲咪飲！』


雖然我故意挑釁詩娜去飲酒，而佢好勝既性格果然輕鬆上當。

但我咁樣做既目的…其實唔係想隊醉佢而乘人之危；我只係想佢可以盡快飲醉，好讓我可以盡早甩身。

事關我聽日仲要返工…而且…我真係攰到極點…！

如果可以既話…我真係想跳上張床度倒頭昏睡過去。


「哈，」我飲到第四罐時望了她一眼：「飲得咁慢架你，養金魚呀？」

『嗚…嗝…邊個話…』

詩娜惹人心憐地打了個嗝，而且因酒精影響，令到她本來就很粉白的皮膚更顯通紅。


「詩娜…」


雖然我本身酒量都唔算差，但因為疲倦既影響，令到我對酒精既抵抗力都減弱不少。

此時，我望住詩娜好勝地拿起罐酒…咕嚕咕嚕地喝下去時，覺得…呢個女仔真係好可愛…

好傻…

唔知係錯覺…定係醉醉地…四周既環境、氛圍都好似變左粉紅色一樣迷人。

詩娜側身坐在床上，使我情不自禁地從頭到腳打量了她一番…

柔順既黑啡長髮…白裡透紅既臉龐…粉嫩脖頸…微微隆起且不斷呼吸…起伏著的酥胸…

仲有短裙以下…皎潔無瑕既一雙白滑長腿…真係好吸引…


而家回想起，阿晴同其他以前食過既女仔…根本無得比。


『唔…？』詩娜側著頭，眼角餘光不自覺地橫了我一眼：『做咩…？』

「呃…」我立即搖搖頭，清醒自己道：「無…」

『嘻…』詩娜醉薰薰地爬過來：『不如…我地……』

「你…！你想點………」


頃刻之間，我雙眼不禁瞪到有生以來最大…！

而且成日好似石化左一樣動彈不得，尤如一隻等被捕食既獵物一樣…！

我望住詩娜可愛既臉孔愈來愈近，而且…她在床上爬過來時，衣領口露出一處深不可測…若隱若現既兩隻小白兔…

「嘎…嘎…」

我既呼吸愈來愈沈重，而且…心跳都愈來愈快…

有一種集緊張、期待、不安、興奮等感覺於一身既情緒。

呢種奇怪既氣氛…係我有生以來都未試過…！

明明已經開大冷氣，不過緊張既感覺…竟然令我不自覺地額角冒汗…

而且雙眼仲不由自主地緊緊閉上…！


『嘻……』


突然…我眼前一黑，耳邊卻傳來一陣勾人心魄、蝕骨縷心既銷魂聲音。


吱————

一段高頻既聲音從我四周傳來。

「嘎…嘎……」我不停地氣喘著，緩緩張開雙眼：「你……」

『唔…～？』詩娜在坐床上，抬起頭說：『做咩～？』

「呢句我問你先岩呀…！」我稍稍回復平靜：「你頭先爬過黎…做咩？」

『咩啊……』詩娜視線停留在上方：『咪開電視囉…？』

「…………」


［原來戀愛統統統統想得太多…］———我內心忽然響起呢首音樂。